“Mbwene kunda kuna zulu ye ndiona ovuende vana kunda. Ndiona ovuende vana kunda okezimanga nze tadi dia yasepi ye dia sadio, e nkongolo ina izietele e kunda, ikezimanga nze tadi dia emeraude.”—Lusengomono 4:2, 3.

“Mbwene vana kati e kinzieta nga tiya. Nze mpw’a nkongolo ina mun’etuti muna lumbu kia mvula. I una ukedi e mpw’a fwaniswa kia nkembo a Yave.”—Yezekele 1:27, 28.

Mona-meso kiantete kiasongwa kwa ntumwa Yoane, kianzole kiasongwa kwa Yezekele wa ngunza. E mona-meso yau yole iyikanga o nkembo a Yave wa Nzambi a Mpungu Ngolo kumosi mpe ye lekwa ina tuzeye, tadi dia nkezimi, nkongolo yo nkembo a kunda kia ntinu. Mona-meso yayi itusongele vo e fulu kina Yave kekalanga kia toma viengeswa, kiazala yo wete yo luvuvamu.

Mona-meso yayi ngwizani ina ye mvovo mia ntozi a nkunga, oku vo: “O Yave i nene yo kembelelwa kikilu. Ovuminwa ke mu nzambi zawonso ko: Kadi nzambi zawonso za zula i teke, vo i Yave wavang’ezulu. Zitu yo nkembo wina vana kena, o nkuma yo wete muna nzo andi avauka.”—Nkunga 96:4-6.

Kana una vo Yave i Nzambi a Mpungu Ngolo, okutuvovesanga vo twasambanga kwa yandi, okutusikidisanga vo owanga e sambu yeto. (Nkunga 65:2) Nzambi mfunu kekutuvuanga ye otoma kutuzolanga. I dianu Yoane wa ntumwa kasonekena vo: “Nzambi i zola.”—1 Yoane 4:8.

“[Setefano wa nlongoki a Kristu], ozele yo mwand’avelela, otadidi kuna zulu, omwene nkembo a Nzambi yo Yesu ovuende kuna koko kwalunene kwa Nzambi, ovovele vo: ‘Tala, mbwene zulu diziukidi yo Mwan’a muntu otelamene kuna koko kwalunene kwa Nzambi.’”—Mavangu 7:55, 56.

Vitila Setefano kasongwa e mona-meso kiaki, Yesu wavondwa kala kwa mfumu za dibundu dia Ayuda. Kwa yau Setefano kazayisi e mona-meso kiaki. E mona-meso kiaki kiasonga vo Yesu wafutumunwa yo vewa zitu. Mu kuma kia diambu  diadi, Paulu wa ntumwa wasoneka vo: “[Yave] i kafudila Kristu muna mafwa yo kumvuandisa kuna koko kwandi kwalunene kuna zulu, vana ntandu a luyalu lwawonso, wisa, nkuma ye umfumu ye nkumbu zawonso ziyikwanga, ke mu tandu kiaki kaka ko, kansi ye kina kikwiza mpe.”—Efeso 1:20, 21.

Vana ntandu a tunda diandi, Nkand’a Nzambi uvovanga vo Yesu wete dia wantu ketokanenanga nze una Yave kevanganga. Vava kakala ova ntoto, Yesu wawuka mbevo, avanguki yo fula mafwa. Vava katambika o moyo andi se kimenga, Yesu wasonga o zola kwandi kwampwena muna Nzambi ye kwa wantu. (Efeso 2:4, 5) Wau kavuende kuna koko kwa lunene lwa Nzambi, ke kolo ko Yesu osadila e wisa kiandi mu twasa nsambu kwa alembami omu nza yawonso.

“Mono [Daniele wa ngunza] mbwene yavan’e kunda yasiwa, omosi wa Munkulu-nkulu a Lumbu kavwende: . . . Ezunda dia mazunda dinsadidinge, kiazi kia yazi kitelamene vana ndose andi.”—Daniele 7:9, 10.

Muna mona-meso kiaki, Daniele kamona kaka mbasi mosi ko, kansi ulolo kamona. Ekwe kiese kamona! Ambasi vangwa ya mianda ya nkembo, vangwa ya ngangu yo nkuma. Vena ye buka yole ya ambasi: aserafi ye akelubi. Muna Nkand’a Nzambi o mvovo mbasi wasonama mu fulu yayingi, vioka 250.

Ambasi ke bavangwa mu zingilanga ova nza ko. Vava Nzambi kavanga ambasi, mvu miayingi miavioka i bosi kayiza vanga o muntu. Kuna semo dia nza, ambasi bakala vana ndambu mu tala yo yengoloka ye kiese.—Yobi 38:4-7.

Ambasi za kwikizi besadilanga Nzambi muna yikama e salu kia mfunu kisalwanga ova nza, kia samuna e nsangu za mbote za Kintinu kia Nzambi. (Matai 24:14) Muna mona-meso kasongwa, Yoane wa ntumwa wasoneka mu kuma kia salu kia ambasi vo: “Mbwene mbasi yankaka itilumukanga muna kati kwa zulu, ina ye nsangu zambote mu samunwina awana bekalanga ova nza, kwa zula yawonso, makanda, ndinga ye nkangu.” (Lusengomono 14:6) Kana una vo omu lumbu yeto ambasi ke bevovananga yo wantu ko, nze una bavanganga  kuna nz’ankulu, o unu ambasi bekutusonganga o wantu a ntima mia mbote muna salu kia samuna e nsangu zambote.

“Kukedi vita kuna zulu: Mikaele ye mbasi zandi banwene ye ngobodi, o ngobodi ye mbasi zandi banwene, kansi ke basundidi ko, ngatu moneka diaka e fulu kiau kuna zulu. Dianu vo, ngobodi anene ovetelo, nioka ankulu, ona oyikilwanga vo Nkadi ampemba ye Satana, ona ovukumunanga nza yawonso; ovetelo ova nza, e mbasi zandi zivetelo yandi kumosi.”—Lusengomono 12:7-9.

Vakala ye ntangwa e zulu ke diakala mu luvuvamu ko. Kuna lubantiku lwa zingu kia muntu, mbasi mosi wazola vo kasambilwa. Dianu vo, wakolamena Yave yo kituka se Satana, yovo “Ntantu.” Kuna kwalanda, mbasi zankaka zayikama ukolami wa Satana yo yikilwa vo nkuya. Zakolamena Yave ye zivukumunanga wantu ayingi ova nza bavengomoka muna nzil’a Yave wa Nzambi a zola.

Satana ye nkuya miandi wantu bekotanga o nsoki. Bakituka se atantu a wantu ye bekudikilanga e mpasi za wantu ova nza. Kasikil’owu, Satana wavonda twelezi ye selo yawonso ya Yobi wa nkwa kwikizi. I bosi, watwasa “tembwa kiangolo” kiabuisa e nzo yakala wan’a kumi a Yobi, yau awonso bafwa. Kuna kwalanda, Satana wayelesa Yobi “mavumbu mampasi tuka nsasal’a tambi yaku mbat’a ntu.”—Yobi 1:7-19; 2:7.

Kansi ke kolo ko, Satana ofwaswa e mvimba. Kana una vo otwasanga e mpasi omu nza yawonso, Satana ozeye wo vo “kolo kiandwelo kaka kasidi kiau.” (Lusengomono 12:12) Ekwe kiese wau tuzeye wo vo Satana se kefwaswa!

“[Yesu] wasumbila Nzambi nkangu muna makanda mawonso ye ndinga ye nkangu ye zula, ubakitwidi se kintinu y’anganga kuna kwa Nzambi eto, bayala e nza.”—Lusengomono 5:9, 10.

Wauna Yesu kafudilwa ova nza yo kituka se vangwa kia moyo kuna zulu, i diau mpe divangama kwa wantu ankaka. Yesu wavovesa ntumwa zandi za kwikizi vo: “Kwenda ikwenda yanukubikil’e fulu. . . . se yavutuka yanutambula, kimana konso kuna ikala, oyeno mpe nwakala ko.”—Yoane 14:2, 3.

Vena ye kani diasikila o wantu ankaka bekwendela kuna zulu. Beyala kumosi yo Yesu, yau  bekala muna Kintinu kina kiyala e nza yawonso yo twasa e nsambu kwa wantu awonso. E kiaki i Kintinu kina Yesu kavovesa alandi andi vo balombanga muna sambu yau vava kabalonga e mpila balenda sambila kwa Nzambi. Yesu wasamba mu mvovo emi: “E Se dieto koko zulu, yambula nkumbu aku yazitiswa. E Kintinu kiaku kiza. O luzolo lwaku lwavangama ova ntoto nze koko zulu.”—Matai 6:9, 10.

“[Yoane wa ntumwa] ngwidi nding’angolo itukidi vana kunda, ivovele vo: ‘Tala! E saba kia Nzambi kina yo wantu, . . . Okunguna mansanga mawonso muna meso mau, lufwa ke lukala diaka ko, ngatu kala diaka dilu, yovo kazu ngatu mpasi. Mambu mantete maviokele.’”—Lusengomono 21:3, 4.

E mona-meso kiaki i ungunza ulungana vava Kintinu kia Nzambi kiyalwa kwa Yesu ye awana bafulwa muna mafwa yo kwenda kuna zulu, besukisa luyalu lwa Satana yo kitula o ntoto se paradiso. Mawonso metwasanga e mpasi ye dilu kwa wantu, mefokoka. Kana nkutu lufwa ke lukala diaka ko.

Adieyi tuvova mu kuma kia ulolo wa wantu bafwa ana ke bekwenda kuna zulu ko? Besinga futumunwa kimana bazinga yakwele mvu muna Paradiso ova ntoto.—Luka 23:43.