NTU A DIAMBU WA FUKWA | EKUMA OFWETE KADILA NKWA ZIKU
O Lembi Kala Nkwa Ziku Nkia Mfwilu Dilenda Kutwasila?
“Vena ye mambu mampasi mebwanga mana tulenda kweto singika muna sadila filuvunu.”—Samanta, África do Sul.
Nga okwikilanga muna mvovo miami? Nze Samanta, ezak’e ntangwa yeto awonso tubwilwanga mambu mampasi. Mana tuvanganga vava tubwilwanga diambu dilenda kutufila mu vuna, malenda songa kana vo tu akwa ziku yovo ve. Muna bonga e nona, avo tuvanganga mawonso muna badikilwa vo tu wantu ambote, tulenda kitula luvunu se fu kieto. Kansi, vava e ludi kisengomokanga, mfwilu kaka ditwasanga kwa muntu ovunini. Tala e nona ilende.
O MVUNI KEBUNDWANGA VUVU KO
Muna kala akundi, wantu bafwete bundaziananga e vuvu. Ediadi dikumikanga e ngwizani ya muntu yo nkwandi. Kansi, mayingi mevavuanga muna bundaziana e vuvu. Wantu bafwete kalanga entwadi, mokena yo tokanena e wete dia muntu yo nkwandi. Kansi, muntu olenda yambulwa bundwa e vuvu mu kuma kia vangu dimosi kaka dialuvunu. Avo tudimbwidi vuvu kwa muntu, diampasi dikalanga mu kumbunda diaka e vuvu.
Nga wavunwa kala kwa nkundi aku? Avo i wau, aweyi wamona? Nanga watoma kendalala. Kalukatikisu ko vo lembi songa ziku yikundi yambote difwasanga.
E FU KIA KONDWA ZIKU SAMBUKILA KISAMBUKILANGA
Lufimpu lwavangwa kwa Robert Innes wa nlongi kuna Universidade ya Califórnia lwasonga vo: “E fu kialembi kala nkwa ziku sambukila kisambukilanga.” O lembi kala nkwa ziku kuna nze mikolobi, avo ntangwa ayingi okalanga yo muntu una vo ke nkwa ziku ko, ngeye mpe “okituka” nze yandi.
Nki kilenda kusadisa mu lembi kala mvuni? Nkand’a Nzambi ulenda kusadisa. Badika yaka sono ya Nkand’a Nzambi.
