E kiwuntu kiaku ke kitadidi kaka nkumbu aku ko ye mpw’aku. Kitadidi mpe fu yaku, mana okwikilanga ye nkal’aku. Muna lukufi tulenda vova vo e kiwuntu kiaku i ngeye muntu emvimba, i sia vo, una wina muna kati yo kumbazi.

Vava otoma kukizayanga kubembola mana okwikilanga ko ngatu yambula vo akwaku a sikola bafila e zingu kiaku.

“Wantu ayingi bena nze teke isiwanga muna maloja. E teke yayi ke isolanga ko kana nkia mvuatu bevuata, wantu ankaka bekubasolelanga e mvuatu.”—Adrian.

“Yalongoka tanina edi diambote kana nkutu muna mambu mampasi. Muna fu ya akundi ame ye mpila ikadilanga yau, ntomene zaya aki nani kikilu i akundi ame.”—Courtney.

DINA BIBILA KIVOVANGA: “Nuyambula kuyifwananisa ye tandu kiaki, kansi nuvanguluka muna soba nyindu mieno.”—Roma 12:2.

Avo otomene zaya e fu yaku yambote, fu yaku yambi ye mana okwikilanga, dikusadisa wazaya nkia mpila muntu wina owau ye nkia mpila muntu ozolele kala kuna ntwala. Avo osolwele mvutu za yuvu ilende dikusadisa wazaya mambu mama.

Fu yambote: Nkia mambu mambote ivanganga? Nkia ndekwa ye umbangu nzeye? Ayeyi i fu yame yambote? Muna bonga e nona, avo ozolele zaya e fu yaku yambote, olenda kukiyuvula: ‘Nga ngina ye volo? I nsadi ambote? Nga izolanga kayana e lekwa yame ye akaka? Avo diambu ngwizanene yo muntu, nga ilwakanga muna ola tuwizanene?’

LUSADISU: Nga diampasi kwa ngeye mu zaya e fu yaku yambote? Avo i wau, lomba kwa mase maku yovo kwa nkundi aku kazayisa kana vo nkia mambu mambote kemonanga omu ngeye ye ekuma.

DINA BIBILA KIVOVANGA: “Yambula konso muntu kafimpa mavangu mandi, ozevo okala ye kuma kia yangalala, ke mu kuyitezanesa ye ankaka ko.”—Ngalatia 6:4.

Fu yambi: Nkia mambu kikilu mfwete tomesa muna kiwuntu kiame? Nkia ntangwa dikalanga diampasi kwa mono muna zizidila e ntonta? Mu nkia mambu mfwete toma silanga e sungididi?

DINA BIBILA KIVOVANGA: “Avo tuvovele vo: ‘Ke tuna ye sumu ko,’ vuna tukukivunanga.”—1 Yoane 1:8.

Mana ikwikilanga: Kuna kwa mono, nki i mbote ye mbi? Ekuma iyindulwilanga e mpila yayi? Nga ikwikilanga muna Nzambi? Nki kikunkwikidisanga vo Nzambi una kikilu? Nkia diambu imonanga vo ke dia unsongi ko ye ekuma? Adieyi ikwikilanga vo divangama kuna ntwala?

DINA BIBILA KIVOVANGA: “E ndwenga zikuyingila, o umbakuzi ukutanina.”—Ngana 2:11.