Amase ana besonganga e mbandu besadilanga mana belonganga. Amase, ke nufwete vingila ko vo wan’eno bavovanga e ludi, ekolo bekunuwanga vava nuvovanga vo: “Vova vo kina ku nzo ko,” mu sungula avo muntu wizidi kuvava ye kuzolele mokena yandi ko.

“O wantu bevovanga vo: ‘Vanga mana ivovanga, kansi kuvangi mana ivanganga ko.’ Kansi, e ngindu zazi ke zisadisanga wana ko. Oyau betangininanga mawonso mana tuvovanga ye mana tuvanganga. Avo tubalongele diambu dimosi i bosi tuvangidi diambu diankaka, oyau bekutuzayisa wo.”—David.

DINA BIBILA KIVOVANGA: “Ongeye osamunanga vo: ‘kuyiyi ko,’ ongeye yiya kwaku e?”—Roma 2:21.

O malongi yo mavangu ma mase i meluta simbanga e ntima mia mwana ke mu malongi yo mavangu ma akwandi a sikola ko. Muna kuma kiaki, amase yeno nufwene longa o wan’eno bavanga edi diambote. Kansi, nufwete sadilanga mana nukubalonganga.

“Tulenda longa wan’eto e diambu diau dimosi nkumbu miayingi yo tokana kana vo babakwidi dio yovo ve. Kansi, avo oyambwidi vanga e diambu dina okubalonganga, kana nkutu vo nkumbu mosi kaka ovangidi wo, oyau bekuzayisa wo. O wana betoma sianga e sungididi muna mana tuvanganga, kana nkutu vava tumonanga vo ke bena sia kwau sungididi ko.”—Nicole.

DINA BIBILA KIVOVANGA: “E ngangu za ntandu . . . ke za disu kunsi a lukaya ko.”—Yakobo 3:17.

Vavanga zaya e kadilu kiaku. Nkia mpila programa za TV ye filme ozolanga tala? Aweyi okadilanga ye esi nzo aku? Nkia mpila akundi una yau? Nga otokanenanga e wete dia wantu ankaka? Muna lukufi, ofwete kukiyuvulanga: Nga e kiwuntu kiame i kiau nzolele vo mwana ame kakala kiau?

“Omono yo yakala diame ke tukomekenanga wana eto ko balemvokela e nkanikinu mina yeto kibeni ke tulemvokelanga ko.”​—Christine.

Avo diambu diambi ovangidi lomba e ndoloki. O wan’aku bazeye wo vo ku muntu alunga ko. Avo olombele ndoloki kwa esi nzo aku, mbandu ambote okubasonga ya lulembamu ye ziku.

“O wana bafwete monanga vo yeto mase tutambulwilanga o vilwa weto ye tulombanga e ndoloki. Avo ke tuvangidi wo ko, o wana mpe sweka bekala sweka o vilwa wau.”—Robin.