O nsema ye vangwa ya mioyo ina mo, nga Nzambi wasema yo yovo kukinsalukisa yavaikila? E mvovo mia akwa ngangu yau awole mina ova ntandu ye mvovo mia Bibila, mivene mvutu zatoma swaswana mu kiuvu kiaki. Vena ye buka ya wantu beyikamanga e ngindu zazi zau zole. Kansi, vena mpe ye wantu ayingi ke bena ye ziku ko. E nkanda mitoma yangalelwanga ye afidi a mpaka betumbanga yo menga ediaka e sambu.

Nanga alongi aku kuna sikola bevovanga ye sikididi kiawonso vo o nsema ye vangwa ya mioyo ina mo, kukinsalukisa wavaikila, ke vakala ye Mvangi ko. Kansi, nga alongi aku bekusonganga e ziku vo ke vena ye Mvangi ko? Kuna diaka e sambu, nanga owanga mfumu za mabundu belonganga vo vena ye Mvangi. Kansi, nga bekusonganga e ziku kia mana belonganga? Yovo vova kaka bevovanga vo o Nzambi i Mvangi lembi kusonga e ziku?

Nanga watoma yindula kala e kiuvu kiaki yo bakula vo ke vena muntu ko olenda songa e ziku vo vena ye Mvangi. Nanga ediadi dikufilanga mu kukiyuvula vo: Nga e mvutu za kiuvu kiaki mfunu kikilu zina?

E Sikama! diadi, entete divovela mambu maziku mefilanga wantu ayingi mu kwikila muna Mvangi. I bosi, disonga vo e mvutu za kiuvu mu kuma kia tuku dia zingu ova nza mfunu zina.