Ekuma Dinina o Mfunu mu Vava Zaya Kana vo Vena yo Mvangi?
Ekuma dinina o mfunu mu vava zaya kana vo vena yo mvangi? Avo vena ye mambu maziku mekukwikidisanga vo o Nzambi a mpungu-ngolo wina, ovava zaya mpe mambu maziku mesonganga vo yandi wavumunuina Bibila. Avo obundidi e vuvu mu mana Bibila kivovanga, olenda baka e nluta muna mambu malende.
Zingu kiaku kikala ye nsasa
BIBILA KIVOVANGA VO: “[O Nzambi] wau kevanganga owete muna kunuvana e mvula zitukanga kuna zulu ye nsungi ziyimanga e mbongo, kunuyukutisa yo madia yo zadisa ntima mieno ye kiese.”—Mavangu 14:17.
EDIADI DISONGELE VO: Lekwa yawonso oyangalelanga i nkayilu miatuka kwa Mvangi. Oluta yangalela nkayilu miami vava obakula vo Ndiona okuvananga mio mfunu kikilu kekuvuanga.
Osolola malongi mambote muna mambu ma lumbu ke lumbu
BIBILA KIVOVANGA VO: “Obakula edi diansongi, diambote ye dia ziku, ye nzila zawonso zambote.”—Ngana 2:9.
EDIADI DISONGELE VO: Wau vo yandi i Mvangi, Nzambi otomene zaya mana malenda kutusadisa mu kala ye kiese. Muna longoka e Bibila, olenda zaya mambu malenda kutwasila kiese tuka owau.
Obaka e mvutu za yuvu yaku
BIBILA KIVOVANGA VO: “Obakula vumi wa Yave, yo solola zayi wa Nzambi.”—Ngana 2:5.
EDIADI DISONGELE VO: Ozaya vo Mvangi una, dikusadisa mu solola e mvutu za yuvu yamfunu nze: Ayeyi i nsas’a zingu? Ekuma tumwenanga e mpasi? Adieyi dikutubwilanga vava tufwanga? Olenda solola e mvutu zasikila muna Bibila.
Okala ye vuvu kia kusentu
BIBILA KIVOVANGA VO: “‘Nzeye ngindu zame mu kuma kieno,’ u kavovele o Yave, ‘ngindu za luvuvamu ke ngindu zambi ko, nzolele kunuvana e vuvu ye zingu kiasikila kuna sentu.’”—Yeremiya 29:11.
EDIADI DISONGELE VO: Nzambi osianga nsilu vo kuna sentu ofokola e mbi, mpasi ye lufwa. Avo obundidi e vuvu muna nsilu mia Nzambi, e vuvu kiaki kikusadisa mu zizidila mambu ma lumbu ke lumbu kuna unkabu wawonso.
