Asongi Bekembelela Nzambi Yakwele mvu
Asongi Bekembelela Nzambi Yakwele mvu
“O luyindwilu lu’asongi luakwele mvu. . . . O unsongi wandi uzingang’aka.” —NKU. 112:6, 9.
1. (a) Nkia mpila zingu kivingilanga awonso ana Nzambi kebadikilanga vo asongi? (b) Nkia kiuvu divaikisanga?
EKWE zingu kiambote kivingilanga awonso bebadikilwa vo asongi vana meso ma Nzambi! Yakwele mvu, besinga kala ye kiese kia longoka mayingi mu kuma kia fu ya Yave. E ntima miau mizala ye kiese kia kembelela Nzambi ekolo belongoka mayingi mu kuma kia mavangu mandi. Kimosi muna fu ivavwanga mu vwa e nsambu zazi i “unsongi” nze una uyikwanga muna Nkunga 112. Kansi, o Yave wa Nzambi avauka ye unsongi aweyi kalenda mwena wantu asumuki nze asongi? Kana una vo tusianga e ngolo za vanga edi diansongi, kansi tuluta vanganga e mpilakanu, ezak’e ntangwa nkutu tubwanga mu sumu diampwena.—Roma 3:23; Yak. 3:2.
2. Nkia masivi mole kavanga Yave muna zola kwandi?
2 Muna zola kwandi, Yave wakubika nzila kimana wantu asumuka bakala nze asongi vana meso mandi. Aweyi kavangila wo? Entete, wavanga esivi mu fila moyo a Mwan’andi anzolwa muna vumu kia mwenze, kimana kawutuka nze muntu alunga. (Luka 1:30-35) I bosi, vava Yesu kavondwa kw’atantu andi, Yave wavanga esivi diakaka diampwena. Nzambi wafula Yesu se vangwa kia mwanda.—1 Pet. 3:18.
3. Ekuma Nzambi kasendela Mwan’andi muna kumvana moyo kun’ezulu?
3 Yave wasenda Yesu muna kumvana kina kakala kiau ko una kayizidi ko ova ntoto, i sia vo, moyo ulembi fwa. (Ayib. 7:15-17, 28) Yave wavanga dio ye kiese kiawonso, kadi Yesu wasikila ye kwikizi muna mpasi zayingi. Muna mpila yayi, Yesu wasadisa S’andi mu vana e mvutu zasikila muna luvunu lwa Satana, ona wavova vo wantu mu kuma ki’eloko besadilanga Nzambi, ke mu zola ko.—Nga. 27:11.
4. (a) Vava Yesu kavutuka kun’ezulu, adieyi kavanga mu kuma kieto? O Yave adieyi kavanga? (b) Aweyi obadikilanga dina Yave yo Yesu bavanga mu kuma kiaku?
4 Kun’ezulu, Yesu diambu diakaka diamfunu kavanga. ‘Wamoneka vana ndose a Nzambi, muna diambu dieto’ yo tambika e ntalu a ‘menga mandi.’ Muna nkenda zandi, o S’eto ezulu watambulwila lukau lwantalu lwa Yesu nze “lembeka muna masumu meto.” Muna kuma kiaki, tulenda ‘sadila Nzambi salu kiavauka’ ye ‘ntona zavelela.’ Ekiaki i kuma kiampwena tuvwidi kia vova e mvovo miantete mia Nkunga 112: “Aleluya!”—Ayib. 9:12-14, 24; 1 Yoa. 2:2.
5. (a) Adieyi tufwete vanga muna lenda kala asongi vana meso ma Nzambi? (b) E Nkunga 111 ye 112 aweyi miakubikilwa?
5 Muna lenda kala asongi vana meso ma Nzambi, tufwete kwikila muna menga mabunguka ma Yesu. Ka tufwete viokesanga lumbu kiamvimba ko lembi vutula matondo kwa Yave muna nzola katusonga. (Yoa. 3:16) Tufwete mpe longokanga Diambu dia Nzambi yo zingila e ngwizani ye dina tutanganga. O Nkunga 112 uvwidi lulukisu lwambote mu kuma ki’awana bazolele kala aveledi vana ndose a Nzambi. Nkunga wau wafwanana ye Nkunga 111. E nkunga miami miyantikilanga mu mvovo “Aleluya!” yovo “Nukembelela Yave” yo landilwa kwa nlonga 22, konso nlonga uyantikilanga mu sono kimosi kia sono 22 ya Kiyibere. *
Nsabi Muna Vwa e Nsambu
6. Nkia nsambu kalenda vwa o “muntu” ovuminanga Nzambi oyikwanga muna Nkunga 112?
6 “Nkwa nsambu o muntu ovuminanga Yave, yo toma yangalela muna nkanikinu miandi. E mbongo andi ikala nene ova nza: E mbandu asongi besambulwa.” (Nku. 112:1, 2) Entete, ntozi a nkunga “muntu” mosi kayika, i bosi muna nlonga wansuka wa tini kia 3, wasadila mvovo “asongi.” Ediadi disonganga vo Nkunga 112 ulenda yikilwa mpe buka kia wantu ayingi. Muna kuma kiaki, Paulu wa ntumwa wavumunwinwa mu sadila sono kia Nkunga 112:9 mu kuma ki’Akristu a tandu kiantete. (Tanga 2 Korinto 9:8, 9.) Nkunga wau utoma songanga e nsambu zilenda vwa alandi a Kristu ben’o ova ntoto.
7. Ekuma selo ya Nzambi bafwete kumvumina? Aweyi ofwete badikila nkanikinu mia Nzambi?
7 Nze una uyikwanga muna Nkunga 112:1, Akristu akieleka nsambu zayingi bevwanga vava bekangalelanga muna ‘vumi wa Yave.’ Vumi wa lembi kunkendeleka ukubasadisanga mu venga mwand’a nza ya Satana. ‘Betoma yangalelanga’ longoka Nkand’a Nzambi yo lemvokela nkanikinu mia Nzambi. Umosi muna nkanikinu miami, i samun’e nsangu zambote za Kintinu mu nza yawonso. Akristu besiang’e sungididi kia kitula wantu a zula yawonso s’alongoki, ekolo belukisanga yimpumbulu mu kuma kia lumbu kia mfundis’a Nzambi eki kifinamanga.—Yez. 3:17, 18; Mat. 28:19, 20.
8. (a) Nkangu a Nzambi nkia nluta bebakanga mu kuma kia vema kwau? (b) Nkia nsambu zakaka zivingilanga awana bena ye vuvu kia zingila ova ntoto?
8 Wau vo belemvokelanga nkanikinu wau, o lutangu lwa selo ya Nzambi ova ntoto se vioka mazunda nsambwadi ma mazunda. Nani lenda dio fidisa mpaka vo nkangu a Yave ukitukidi ‘wanene ova nza’? (Yoa. 10:16; Lus. 7:9, 14) Ekwe ‘nsambu’ besinga vwa vava Nzambi kelungisa ekani diandi! E buka ki’awana bena ye vuvu kia vwila moyo ova ntoto, kitaninwa vava kikwiza e “mpasi zayingi” yo sikidiswa se “nz’ampa” ina ‘ikalwa kwa ndungidi.’ I bosi, awana bevuluka muna Armangedo “besambulwa” diaka. Bakubama bekala mu tambula mazunda ye mazunda ma wantu befuluka. Ekwe mpila vuvu kiakiese bekala kiau! Awana ‘beyangalelanga’ nkanikinu mia Nzambi besinga kituka se wantu alunga yo kala ye kiese kia ‘luvevoko lwa nkembo a wan’a Nzambi’ yakwele mvu.—2 Pet. 3:13; Roma 8:21.
Sadila Mavwa mu Mpila Yambote
9, 10. Akristu akieleka aweyi besadilanga mavwa mau ma mwanda? Unsongi wau aweyi usikidila yakwele mvu?
9 “Muna nzo andi mwina vwa yo lusalu: O unsongi wandi uzingang’aka. Kw’asongi o ntemo utemene muna tombe; nkwa nkenda yo ungudi yo unsongi.” (Nku. 112:3, 4) Kuna nz’ankulu, akaka muna selo ya Nzambi bakala ye mavwa. Kansi, awana bayangalelwa kwa Nzambi bakituka s’amvwama, kana una vo ke mavwa ma nza ko. Dialudi vo, nze una wakala muna lumbu ya Yesu, awana bezolanga kisakidika vana ndose a Nzambi balenda kala asukami yo vezwa. (Luka 4:18; 7:22; Yoa. 7:49) Kansi, twakala amvwama yovo asukami, tulenda kala amvwama muna mwanda.—Mat. 6:20; 1 Tim. 6:18, 19; tanga Yakobo 2:5.
10 Akristu akuswa, kumosi ye mpangi zau, ke besadilanga kimvwama kiau kia mwanda mu wete diau kaka ko. Kansi, ‘betemesanga o ntemo au’ kw’awana bena muna tombe kia nza ya Satana. Bevanganga wo mu sadisa akaka babaka nluta mitukanga muna kimvwama kia ngangu ye zayi wa Nzambi. Atantu bevavanga sukisa e salu kia samuna nsangu zambote za Kintinu, kansi ke belendanga wo ko. E nluta mia salu kiaki kia unsongi ‘misikila yakwele mvu.’ Muna zindalalanga muna nzila unsongi, selo ya Nzambi balenda kala ye vuvu kia ‘zinga yakwele mvu.’
11, 12. E nkangu a Nzambi nkia mpila yakaka besadilanga mavwa mau?
11 Nkangu a Nzambi, Akristu akuswa ye “ndong’ayingi,” bekayilanga mpe akaka mavwa mau kuna mvevo. Muna Nkunga 112:9 tutanganga vo: “Omwanganisi, okayidi kw’akondami.” Akristu akieleka nkumbu miayingi bevananga tukau mu sadisa mpangi zau ye mfinangani zau vava bekalanga mu mpasi. Besadilanga mavwa mau muna sadisa ampangi ana bebwilwanga e sumbula. Nze una kayika o Yesu, kayila akaka nsambu mpe ditwasanga.—Tanga Mavangu 20:35; 2 Korinto 9:7.
12 Vana ntandu, yindula ulolo wa nzimbu zisadilwanga mu vaikisa Eyingidilu diadi muna 172 za ndinga. Ulolo muna ndinga zazi zivovwanga kwa wantu bena vo asukami. Finkanda-nkanda fiafi fivaikiswanga mpe mu ndinga zayingi za sinsu mu kuma ki’awana ke bewanga ko, ye mu ndinga Braile mu kuma kia mpofo.
Nkwa Nkenda yo Unsongi
13. Akinani besonganga mbandu ambote ya songa nkenda? Aweyi tulenda tanginina mbandu au?
13 “Muntu ambote wina ye nkenda; sompeka kesompeka.” (Nku. 112:5) Nanga ozeye wo vo ke ntangwa zawonso ko wantu bekayilanga akaka mu kuma kia nkenda. Akaka bevanganga wo mu kuyisonga vo mavwa mayingi bena mau. Ke diakiese ko mu tambula lusadisu kwa wantu a mpila yayi. Kansi, diakiese dikalanga dia tambula lusadisu kwa muntu una vo nkwa nkenda. Yave osonganga mbandu ambote ya songa e nkenda yo vanina kuna kiese. (1 Tim. 1:11, NW; Yak. 1:5, 17) Yesu Kristu otangininanga mpe mbandu a S’andi una vo nkwa nkenda. (Maku 1:40-42) Muna kal’asongi vana meso ma Nzambi, tufwete kala ye fu kia vanina kuna kiese ye nkenda, musungula vava tusadisanga akaka mu zaya Yave.
14. Nkia mpila zakaka tulenda ‘vangila mambu muna unsongi’?
14 “Okubikila mambu mandi muna mfundu (yovo muna unsongi).” (Nku. 112:5) Nze una diasonama, buka kia selo kiakwikizi kilunga-lunganga salanganu ya Mfumu andi muna unsongi wa Yave. (Tanga Luka 12:42-44.) Ediadi dimonekanga muna luludiku lwa Nkand’a Nzambi luvewanga akuluntu, ana bena vo ezak’e ntangwa bafwete fundisa yo ludika awana basumukini muna nkutakani. Unsongi wa ntaudi akwikizi umonekanga mpe muna luludiku lwa Nkand’a Nzambi kevananga lwa mpila ifwete fidilwa nkutakani zawonso, ye nzo za misionario ye Mavula. Ke akuluntu kaka ko bafwete songa unsongi. Divavanga vo Akristu awonso basonga unsongi muna mpila bekadilanga ye mpangi zau Akristu ye mindembi kwikila, kumosi ye muna mambu ma kinkita.—Tanga Mika 6:8, 11.
Nsambu Zivwa Asongi
15, 16. (a) E nsangu zambi za nza yayi aweyi zilenda vanga kw’asongi? (b) E selo ya Nzambi adieyi bekwamanana vanga?
15 “Kenikunwa ko yakwele mvu; o luyindwilu lu’asongi luakwele mvu. Kemona wonga wa nsangu zambi ko: O ntim’andi usikidi: muna Yave kebundang’e vuvu. O ntim’andi usikidi; kemona wonga ko, yavana kamon’owu kazolele mun’atantu andi.” (Nku. 112:6-8) O unu e nsangu zambi zisakidi ke mu tandu yavioka ko. Tuwanga nsangu za vita, umpumbulu, yimbevo yampa y’eyi yankulu ilembi sasukanga, nsoki, usukami ye mfwasuka ya ntoto. Awana bebadikilwanga vo asongi vana meso ma Nzambi bemonanga mpe e mpasi zitwasanga e nsangu zazi, kansi ke bemonanga wonga ko mu kuma kia kusentu. Muna kuma kiaki, ntima miau ‘misikilanga’ wau bena ye vuvu kiasikila kia kusentu yo zaya vo e nz’ampa ya Nzambi ya unsongi ifinamene. Avo vabwidi sumbula, belendanga zizidila kadi besianga e vuvu muna lusadisu lwa Yave. Ke yambulanga ko vo asongi ‘banikunwa.’ Okubasadisanga ye kubavana nkuma mu zizidila e mpasi.—Fili. 4:13.
16 Selo ya Nzambi bena vo asongi besiwanga mpe kitantu yo vuninwa mambu kw’atantu, kansi ke balendi yoyesa Akristu ko mu lembi samuna nsangu zambote. Vana ntandu, selo ya Nzambi bekwamanana muna salu bavewa kwa Yave, kia samuna nsangu zambote za Kintinu yo kitula ana betambulwilanga s’alongoki. Ka lukatikisu ko, ekolo kifinamanga e mbaninu, e kitantu besiwanga asongi kisinga wokela. Kitantu kiaki kisaka vava Nkadi Ampemba wa Satana kekubanwanisa nze Ngonge a Mangonge. I bosi, tusinga ‘mona atantu eto’ vava befwaswa emvimba. Ekwe kiese tukala kiau vava Yave ketundidika nkumbu andi mu nza yawonso!—Yez. 38:18, 22, 23.
‘Bezangulwa Kuna Zitu’
17. Asongi aweyi ‘bezangwilwa kuna zitu’?
17 Ekwe kiese tukala kiau vava yeto awonso tukembelela Yave kumosi, lembi siwa diaka kitantu kwa Nkadi Ampemba ye nz’andi! Awonso bena vo asongi vana meso ma Nzambi, bekala ye kiese kia kembelela Yave yakwele mvu. Ke vena ndiona olenda kubasukisa ko, kadi o Yave wasia mpe nsilu vo e “mpaka” y’asongi “izangwilwa kuna zitu.” (Nku. 112:9) Selo ya nsongi ya Yave beyangalala vava bemona lufwasu lw’awana besianga kimfumu kia Yave kitantu.
18. E mvovo miansuka mia Nkunga 112 aweyi milunganena?
18 “O kimpumbulu omona wo, yo kala y’ekudi okwetesa meno yo lala: E zolela ya yimpumbulu ivila.” (Nku. 112:10) Ke kolo ko awonso besianga nkangu a Nzambi kitantu ‘belala’ ye kimpala kiau. Ekani diau dia sukisa e salu kieto divila vava kikwiza e “mpasi zayingi.”—Mat. 24:21.
19. Nkia ziku tulenda kala kiau?
19 Nga okala mosi muna awana besala yo moyo vava Yave kefwasa atantu andi? Avo ofwidi mu kuma kia mayela yovo kinunu ekolo mbaninu ya nza ya Satana ke yayizidi ko, nga okala muna buka kia “asongi” ana besinga fuluka? (Mav. 24:15) E mvutu zilenda kala elo, kele vo okwamanene songa lukwikilu muna kimenga kia lukulu kia Yesu yo tanginina Yave nze una uvanganga awana beyikwanga muna Nkunga 112. (Tanga Efeso 5:1, 2.) Yave ke yambula ko vo “luyindwilu” lwa wantu awaya asongi lwavilakanwa ngatu vilakana mavangu mau mansongi. Besinga yindulwa yo zolwa kwa Yave yakwele mvu.—Nku. 112:3, 6, 9.
[Mvovo Vana Yand’a lukaya]
^ tini. 5 E ngwizani ya nkunga miole miami imonekanga muna mana masonama mo. E nkal’a Nzambi iyikwanga muna Nkunga 111 iyikilwanga mpe o “muntu” ovuminanga Nzambi ona oyikwanga muna Nkunga 112, nze una tulenda mona avo tutezanese Nkunga 111:3, 4 ye Nkunga 112:3, 4.
Yuvu ya Badika
• Nkia kuma tufwete vovela vo “Aleluya”?
• Nkia ngwokela itwasanga kiese kiayingi kw’Akristu akieleka o unu?
• O Yave nkia mpila mvani keyangalelanga?
[Yuvu ya Longoka]
[Foto ina muna lukaya lwa 25]
Muna kwamanana kala asongi vana meso ma Nzambi, tufwete songa lukwikilu muna menga ma Yesu mabunguka
[Mafoto zina muna lukaya lwa 26]
E tukau tuvewanga kuna mvevo tusadilwanga mu sadisa akaka yo vaikisa nkanda