Longwa kwa Yave Kusundidi o Mfunu
Longwa kwa Yave Kusundidi o Mfunu
‘Mbadikidi mambu mawonso vo mfwilu, muna diambu dia nsita za zayi wa Kristu Yesu.’—FILI. 3:8.
1, 2. Nkia nsola besolanga Akristu akaka? Ekuma?
TUKA kileke kiandi, Robert wamonekanga vo osundidi e ngangu muna sikola. Vava kalungisa kimbuta kia mvu nana, mosi muna alongi andi wayenda kunkingula kuna nzo yo kumvovesa vo, mayingi kevanga kuna sentu. Wanzayisa vo olenda kituka dotolo. Muna kuma kia ngangu zandi, okala y’elau dia tangila mu sikola za ndá zitomene zayakana kuna nsi andi. Kansi, Robert wabembola edi dilenda badikilwa kw’akaka vo i lau disundidi o mfunu muna zingu. Wakota mu salu kia kimviti a nzila a ngonde ke ngonde.
2 Nze Robert, Akristu ayingi, ambuta y’aleke, bekalanga y’elau dia nungunuka mu nza yayi. Akaka beyambulanga elau diadi kimana basadila Yave una ufwene. (1 Kor. 7:29-31) Nki kifilanga Akristu nze Robert mu kuyivana emvimba mu salu kia umbangi? Zola kwau muna Yave, yo zaya vo o longwa kwa Yave kusundidi o mfunu. Nga olenda yindula una wadi kala e zingu kiaku kele vo kwalongoka ludi ko? O badik’e nsambu tulenda vwa muna longwa kwa Yave dilenda kutusadisa mu yangalela nsangu zambote yo teleka zo kw’akaka y’etima diawonso.
Elau dia Longwa kwa Nzambi
3. Ekuma tulenda vovela vo Yave ozolanga longa wantu alembi lunga?
3 Muna nkenda zandi, Yave olonganga wantu alembi lunga. Muna ungunza wa Yesaya 54:13 tutanganga mu kuma ki’Akristu akuswa vo: “O wan’aku awonso bekal’alongoki a Yave; lunene o luvuvamu lua wan’aku.” E mvovo miami misadilwanga mpe mu kuma kia “mameme makaka” ma Kristu. (Yoa. 10:16) Ungunza wau ulungananga mu lumbu yeto. Muna mona-meso kiandi, Yesaya wamona wantu a zula yawonso bekwizanga mu nsambila yaludi. Bevovaziananga vo: “Nwiza twatomboka kuna mongo a Yave, kuna nzo a Nzambi a Yakobo; katulonga nzila zandi, twakangala muna mayendelo mandi.” (Yes. 2:1-3) Ekw’elau tuvwidi dia longwa kwa Nzambi!
4. O Yave adieyi kevavanga kw’awana kelonganga?
4 Adieyi divavwanga mu longwa kwa Yave? Divavanga vo muntu kakala nlembami. Davidi wa ntozi a nkunga wayimbila vo: ‘O Yave wambote yo unsongi. . . . Olonga alembami nzila zandi.’ (Nku. 25:8, 9) Yesu mpe wavova vo: “Itondele, e Tata, e Mfumu ezulu ye nza, wau wasweka mambu mama kw’akwa ngangu y’alungaladi, wasengomwena mo ayingyana-ngyana.” (Luka 10:21) Nga diadi ka dikufilanga ko mu finama Nzambi ona ‘ovanang’e nsambu kw’alembami’?—1 Pet. 5:5.
5. Aweyi kaka tulenda zayila Nzambi?
5 Nga mu luzolo lwa yeto kibeni twazayila e ludi yo kituka selo ya Yave? Ve kikilu. Ke twadi zaya Nzambi ko muna luzolo lwa yeto kibeni. Yesu wavova vo: “Ke ven’on’olend’o kwiz’oku ngina ko, ovo o Se, ona wantuma, kekuntunta ko.” (Yoa. 6:44) Muna salu kia umbangi ye lusadisu lwa mwand’avelela, Yave otuntanga “eyi itombwanga kwa zula yawonso,” i sia vo, awana bena nze mameme. (Kan. 2:7) Nga kuvutulanga matondo ko wau vo u mosi mun’awana katunta Yave muna Mwan’andi?—Tanga Yeremiya 9:23, 24.
O Longwa kwa Yave Zingu Kutomesanga
6. O “zayi wa Yave” aweyi usobelanga zingu kia wantu?
6 Ungunza wa Yesaya utoma songanga una wantu besobelanga e kiwuntu kiau o unu. Akwa nsoki bekitukanga akwa luvuvamu. (Tanga Yesaya 11:6-9.) Awana bakala atantu mu kuma kia nswaswani za nkand’a nitu, yovo nsi, ekanda yovo fu ya kisi nsi, owau vamosi bezingilanga. Ediadi disonganga vo, ‘bafula e nsosolo miau se nsengo.’ (Yes. 2:4) Ekuma besobelanga kiwuntu kiau? Mu kuma kia “zayi wa Yave” belongokanga yo sadila wo muna zingu kiau. Kana una vo selo ya Nzambi wantu alembi lunga, bekitukanga se kintwadi kia wan’angudi mu nza yawonso. E nsangu zambote zisamunwanga mu nza yawonso ye nluta zitwasanga i ziku kisonganga vo o longwa kwa Nzambi kusundidi o mfunu.—Mat. 11:19.
7, 8. (a) E ngangu za Nzambi zisadisanga wantu mu bangula nkia “tumbu twangolo”? (b) Nkia nona kisonganga vo o longwa kwa Nzambi nkembo ditwasanga kwa Yave?
7 Paulu wa ntumwa watezanesa e salu kia selo ya Nzambi ye vit’a kimwanda. Wasoneka vo: “Kadi e nwaninwa ya ndwan’eto, ke yanitu ko, yankuma kaka muna meso ma Nzambi, muna bangula tumbu twangolo; tubangulang’a mbalu ye konso kina kianda kizangumukina muna zaya Nzambi.” (2 Kor. 10:4, 5) E ngangu za Nzambi nkia “tumbu twangolo” zibangulanga? Malongi maluvunu, fu kia banzikisa mambu, ndongota za wantu ye makaka mpe. (Kol. 2:8) E ngangu za Nzambi zilenda kutusadisa mu sunda mavangu mambi yo kala ye fu yambote. (1 Kor. 6:9-11) Zitomesanga e zingu kia esi nzo. Vuvu kiasikila zivananga muna zingu kia wantu. Ezazi i ngangu tuvwidi o mfunu o unu.
8 Nze una usonganga e nona eki kilende, o kala nkwa ziku i kimosi muna fu ina kelonganga Yave kwa wantu. (Ayib. 13:18) Nkento mosi kuna Índia wayantika longoka Nkand’a Nzambi yo kituka se nteleki walembi vubwa. Lumbu kimosi, vava katuka kuna salu kia tunga Eseka dia Kintinu, wasolola e nsanga wa wolo vana fulu kiningamenanga makalu. E nsanga wau ulenda fwa nkama nana za dólares. Kana una vo nsukami, wanata wo kwa mapolisia kimana bavava ndiona ovwidi wo. Mfumu a mapolisia watoma sivika. I bosi, polisia diakaka wanyuvula vo: “Ekuma kulundidi wo ko?” Wavutula vo: “Elongi dia Nkand’a Nzambi diasoba kiwuntu kiame. Owau i nkwa ziku.” O polisia wasivika yo vova kwa nkuluntu bayenda yandi vo: “Tezo kia mafuku 38 ma mazunda (milhões) ma wantu bena mu nsi eto. Avo osadisi kumi muna yau bakituka nze nkento ndioyu, nluta miayingi ditwasa.” Kieleka, vava tubadikanga ulolo wa wantu besobanga kiwuntu kiau mu kuma kia longwa kwa Nzambi, dikutufilanga mu kembelela Yave.
9. Nki kilenda sadisa wantu mu soba e zingu kiau?
9 Nkum’a Diambu dia Nzambi, ye lusadisu lwa Yave muna mwand’andi avelela, usadisanga wantu mu soba e zingu kiau. (Roma 12:2; Ngal. 5:22, 23) Muna Kolosai 3:10 tutanganga vo: ‘Nuvwata uwuntu wampa, una uvangululwa yamuna zayi muna fwaniswa kia ndiona wansema.’ O Nkand’a Nzambi uvwidi nkuma wa sengomona makani ma ntima yo soba e ngindu za muntu. (Tanga Ayibere 4:12.) Muna vwa o zayi wa ludi wa Nkand’a Nzambi yo zingila ngwizani ye nsiku mia Yave, o muntu lenda kituka nkundi a Nzambi yo vwa moyo a mvu ya mvu.
Yave Okutukubikanga mu Kuma kia Kusentu
10. (a) Ekuma tulenda vovela vo Yave kaka lenda kutusadisa mu kubama mu kuma kia kusentu? (b) Nkia diambu diampwena divangama mu nza yawonso?
10 Yave kaka lenda kutusadisa mu kubama mu kuma kia kusentu, kadi ozeye oma mebwa kuna ntwala. Wasikidisa una ukala e zingu kia wantu kuna sentu. (Yes. 46:9, 10) Ungunza wa Nkand’a Nzambi usonganga vo “e lumbu kianene kia Yave kifinamene.” (Sef. 1:14) Muna lumbu kiakina, dina tutanganga muna Ngana 11:4 dilungana: “O mavwa ke mekala mfunu ko muna lumbu ki’efuluta: Kansi o unsongi ukôla muna lufwa.” Vava ifwana e ntangw’a Yave kefwasa e nza ya Satana, o kala ye ngwizani ambote yo Nzambi i diambu diluta o mfunu. Nzimbu ke zikala mfunu ko. Muna Yezekele 7:19 tutanganga vo: “Betuba palata zau muna mvakala, o wolo ukala se wansafu.” O zaya e diambu diadi dilenda kutusadisa mu baka nzengo zambote.
11. Ngangu za Nzambi aweyi zilenda kutusadisila mu kubama mu kuma kia kusentu?
11 O sia oma masundidi o mfunu va fulu kiantete i mpila e ngangu za Nzambi zilenda kutusadisila mu kubama mu kuma kia lumbu kia Yave. Paulu wa ntumwa wasoneka kwa Timoteo vo: “Kanikin’awana bavwamini muna tandu kiaki, balembi kala ye nyindu miasaka, ngatu sia viluvilu kia umvwam’e vuvu, Nzambi kaka.” Kana una vo ke tu mvwama ko, tulenda baka nluta mun’elongi diadi dia Nzambi diavumunwinwa. Mu nkia mpila? Vana fulu kia vava mavwa mayingi, tufwete sia ngolo mu ‘vanga mawete’ yo ‘vwamina muna mavangu mambote.’ Vava tusianga mambu ma mwanda va fulu kiantete muna zingu kieto, ‘tukuyisadilanga lusalu lua nkubilw’ambote muna ntangwa ina ikwiza.’ (1 Tim. 6:17-19) Diangangu dia kuyivana mu salu yayi kadi Yesu wavova vo o muntu “nkia nluta keluta, ovo obakidi nza mvimba, yo kulukw’o moyo?” (Mat. 16:26, 27) Wau vo e lumbu kia Yave kifinamene, konso muntu mu yeto kafwete kiyuvula: ‘Akweyi ilundilanga lusalu lwame? Nga i ntaudi a Nzambi ovo i mbundu a mavwa?’—Mat. 6:19, 20, 24.
12. Ekuma ka tufwete yoyela ko avo akaka bavezele e salu kieto kia umbangi?
12 E salu ki’Akristu kia samuna e nsangu zambote yo kitula wantu s’alongoki, i salu kisundidi o mfunu muna “mavangu mambote” meyikwanga muna Nkand’a Nzambi. (Mat. 24:14; 28:19, 20) Nze una wakala muna tandu kiantete, akaka bevezanga e salu kieto kia umbangi. (Tanga 1 Korinto 1:18-21.) Kansi, ediadi ke dikululanga mfunu a nsangu zeto ko. Ka difwete kutuyoyesa ko mu vana elau kwa wantu bakwikila muna nsangu zambote, ekolo ntangwa yakinu. (Roma 10:13, 14) Ekolo tusadisanga akaka mu bak’e nluta wa longwa kwa Nzambi, yeto kibeni mpe nsambu zayingi tuvwanga.
Nsambu za Kuyivana Kuna Mvevo
13. Paulu wa ntumwa nki kabembola mu kuma kia nsangu zambote?
13 Una kakitukidi Nkristu ko, Paulu wa ntumwa walongwa kimana kanungunuka muna nkubik’a Kiyuda. Vava kakala ye tezo kia mvu 13, wakatuka muna mbanz’a Taso ina kawutukila yo kwenda kuna Yerusaleme mu longwa kwa Ngamaliele wa nlongi a nsiku watoma zayakana. (Mav. 22:3) I bosi, Paulu wayantika sunda akw’andi e ngangu, kele vo wakwamanana landa mpila zingu kiakina, wadi kala se nkwa tunda muna Kiyuda. (Ngal. 1:13, 14) Vava katambulwila e nsangu zambote, wabembola mawonso. Nga Paulu wakibanza mu kuma kia salu kasola? Ve kikilu. Wasoneka vo: ‘Mbadikidi mambu mawonso vo mfwilu, muna diambu dia nsita za zaya Kristu Yesu wa Mfumu ame: ntondele mfwilu mu mawonso mu kuma kiandi, mbadikilanga yo vo mbole.’—Fili. 3:8.
14, 15. Nkia nsambu tuvwidi mu kala ‘asadi kumosi yo Nzambi’?
14 Nze Paulu, o unu Akristu mambu mayingi bebembolanga mu kuma kia nsangu zambote. (Maku 10:29, 30) Nga mfwilu tubakanga? Robert ona tuyikidi kuna lubantiku, wavova vo: “Kikuyibanzanga ko. E salu kia ntangwa ke ntangwa kiese ye luyangalalu kikuntwasilanga yo kunsadisa mu ‘mika yo mona vo Yave wambote.’ Kana una vo mavwa mayingi yabembola muna kuyivana emvimba muna salu kia Nzambi, nsambu za Yave itambulanga zisundidi mavwa yabembola. Dimonekanga nze kiavidisa má ko. Nluta kaka ibakanga.”—Nku. 34:8; Nga. 10:22.
15 Avo nsangu zambote osamunanga yo kitula wantu s’alongoki, ongeye mpe ovwidi elau dia mika Yave yo mona vo wambote. Nga wamona kala e ziku kia lusadisu lwa mwand’andi ekolo osamunanga nsangu zambote? Nga wamona kala akwa luzolo lwambote ekolo Yave keziulanga ntima miau mu wá nsangu zambote? (Mav. 16:14) Nga Yave wasadisa kala mu sunda nkakalakani yo wokesa salu kiaku kia umbangi? Nga wasadisa kala mu ntangw’ampasi? Nga wakumika kala mu zindalala kunsadila ekolo wamona vo oyoyele? (Fili. 4:13) Vava tuzayanga vo Yave okutusadisanga muna salu kia umbangi, dikutufilanga mu kwikila muna yandi yo kumfinama. (Yes. 41:10) Ekwe nsambu tuvwidi za kala ‘asadi kumosi yo Nzambi’ muna salu kia longa wantu!—1 Kor. 3:9.
16. Aweyi oyindulanga mu kuma kia mana wayambula ye ngolo osianga mu sadila Nzambi?
16 Ndonga bekalanga ye vuvu kia vanga diambu diamfunu dina ke balendi vilakana ko muna zingu kiau. Edi dimonekanga vo mambu mayingi mamfunu mevangamanga mu nza yayi mevilakanwanga. Kansi, e salu besalanga e selo ya Yave o unu mu zitisa nkumbu andi, ke kivilakanwa ko muna lusansu lwa nkangu a Nzambi. Ke bevilakana salu kiaki ko yakwele mvu. (Nga. 10:7; Ayib. 6:10) Yambula twayangalelang’elau dia longa wantu oma ma Yave, kadi e salu kiaki ke kivilakanwa ko.
[Yuvu ya Longoka]
[Foto ina muna lukaya lwa 23]
Awana belongwanga kwa Yave bekotanga muna kintwadi kia wan’angudi mu nza yawonso
[Foto ina muna lukaya lwa 24]
Diansambu mu kala ‘asadi kumosi yo Nzambi’
Nkia Mvutu Ovana?
• O Yave adieyi kevavanga kw’awana kelonganga?
• E ngangu za Nzambi aweyi zitomesenanga e zingu kia wantu?
• Nkia nsambu tuvwanga muna sadisa akaka babak’e nluta mia longwa kwa Nzambi?