Sikila Muna Mwanda Ekolo Osadisanga Yitu Kiaku una vo Mbevo

VAVA o Kim una vo Mbangi a Yave kamoneka ye vimbu (tumor), bamvovesa vo kimbevo kia câncer kena kiau. * Steve wa nkaz’andi wavova vo: “Vava e vimbu diadi diakatulwa, Kim wavoveswa vo kafwete vanganga radioterapia ye quimioterapia. Ediadi diayantika kunyoyesa. Diampasi diakala kwa yandi mu diata.”

Nga olenda yindula una Steve kamonanga vava nkaz’andi kanwananga ye mpasi za mayela? Nanga yitu una kiau kinwananga ye mpasi za mayela yovo za kinunu. (Kim. 12:​1-7) Avo i wau, ozeye wo vo muna toma lunga-lunga o nzolw’aku, ofwete kilunga-lunga ngeye kibeni. Kele vo oyoyele muna mwanda, olenda mpe yoya muna ngindu ye muna nitu, ediadi dilenda kala diampasi mu vana kwa yitu kiaku lusadisu kavwidi o mfunu. Aweyi olenda kadila wasikila muna mwanda ekolo osadisanga yitu kiaku una vo mbevo yovo nunu? Ampangi muna nkutakani y’Akristu nga vena ye diambu balenda vanga mu sadisa e mbevo?

Aweyi Olenda Kadila ye Tezo?

Muna sikila muna mwanda yo kala yo vimpi wambote vava osadisanga e yitu kiaku una vo mbevo, ofwete kala ye tezo muna mpila osadilanga e ntangwa ye ngolo zaku. Muna Ngana 11:2 tutanganga vo: ‘Vana vena unlêka i vena ngangu.’ Mu sono kiaki, e mvovo ‘unlêka,’ usonganga vo zaya tezo kia dina olenda vanga ye dina kulendi vanga ko. Muna kala ye ziku vo kuvanganga mana maviokele tezo ko, ofwete fimpa e salu yaku.

 Steve wasadila ngangu yo unlêka muna fimpulula e salu yandi. Mu kompani kasadilanga, mfidi a buka kia akuluntu kakala ye nkengi a salu muna nkutakani a Mbangi za Yave kuna Irlanda. Wakala mpe mosi muna buka kia Comissão de Ligação Hospitalar muna zunga kiau. Steve wavova vo: “Ke lumbu kimosi ko o Kim kavova vo bembola yambembola yo sia sungididi muna salu yayi. Kansi, yazaya vo mana yavanganga ke makala ma tezo kiame ko.” Steve aweyi kasingikila diambu diadi? Wavova vo: “Vava yasamba, yabaka e nzengo za yambula sala nze mfidi a buka kia akuluntu. Yakwamanana sala nze nkuluntu, kansi yayambula yaka salu ya nkutakani. Ediadi diansadisa mu vana kwa Kim e ntangwa ye sungididi kavwanga o mfunu.”

Kuna kwalanda, Kim wayantika sasuka. Steve yo Kim bafimpa e zingu kiau, muna lusadisu lwa nkaz’andi, Steve wavutukila e kiyekwa kiandi muna nkutakani. Steve wavova vo: “Twalongoka vanga dina tulenda mu kuma kia kimbevo. Ivutulanga matondo kwa Yave mu kuma kia lusadisu lwandi. Ivutulanga mpe matondo kwa nkaz’ame mu mpila kangikamenanga kana una vo mbevo kakala.”

 Badika mpe e nona kia Jerry una vo nkengi a zunga yo nkaz’andi Maria. Basoba makani mau mu lunga-lunga mase bena vo anunu. Maria wavova vo: “O nkaz’ame yo mono twakala y’ekani dia sala nze misionario muna nsi za kinzenza. Kansi, o Jerry yandi mosi kaka kawutuka, mase mandi lusadisu lwandi bavwanga o mfunu. Muna kuma kiaki, twabaka nzengo za zingila kuna Irlanda muna kubalunga-lunga. Muna mpila yayi, twalenda sadisa s’andi a Jerry vava kakala kuna lupitalu yavana kafwa. Owau, e lumbu yawonso tuvavanga zaya o vimpi wa ngudi a Jerry yo kumvana lusadisu kavwidi o mfunu. Ampangi muna nkutakani a ngudi a Jerry bevananga kikilu lusadisu, ediadi dikutusadisanga mu kwamanana muna salu kieto kia nkengi a zunga.”

Aweyi Akaka Balenda Sadisila?

Vava bavavanga o zaya kana nkia lusadisu balenda vana kw’akento ansona bakala vo anunu muna nkutakani, Paulu wa ntumwa wasoneka vo: “Ovo vena y’on’olembi yundul’akw’andi, musungul’awana bena muna nzo andi, ovakwidi o lukwikilu o nkalu, oviokele mundembi-kwikil’o bi.” Paulu wasungamesa mpangi zandi Akristu vo, avo bazolele vo mavangu mau ‘matondakana vana ndose a Nzambi,’ bafwete lunga-lunga mase mau m’anunu ye nkaka zau. (1 Tim. 5:​4, 8) Kansi, akaka muna nkutakani bena mpe ye mbebe ya vana lusadisu.

Badika e nona kia Hakan yo Inger, akazi anunu bezingilanga kuna Suécia. Hakan wavova vo: “Vava o nkaz’ame kamoneka ye kimbevo kia câncer, twatokana kikilu. Inger vimpi wambote kakalanga wau yo nkuma. Diavavanga vo twendanga kuna lupitalu e lumbu yawonso, e nlongo kanwanga mianyoyesanga kikilu. Muna kolo kiaki, Inger kalendanga vaika ku mbazi ko, diavavanga vo yakalanga yandi mu kulunga-lunga.” Ampangi muna nkutakani aweyi basadisila Hakan yo Inger?

Akuluntu muna nkutakani bavanga e nkubika kimana akazi awaya bawanga e malongi mavewanga muna tukutakanu muna telefone. Vana ntandu, mpangi z’akala ye z’akento babakingulanga yo kubabokela muna telefone. Babasonekenanga mpe e nkanda. Hakan wavova vo: “Twamonanga una o Yave y’ampangi batusadisilanga. O zola batusonganga kwatusadisa mu sikila muna mwanda. Diakiese kikilu wau vo Inger wasasuka. Owau tulendanga kwenda muna tukutakanu mun’Eseka dia Kintinu.” Vava ampangi muna nkutakani bevanganga wawonso balenda mu sadisa ampangi zau ambevo ye anunu, besonganga vo ‘akundi ana bezolanga ntangwa zawonso, ampangi ana bawutukila muna mpasi.’​—⁠Nga. 17:⁠17.

Yave Oyangalelanga e Ngolo Ovanganga

O lunga-lunga yitu una vo mbevo dilenda kala diampasi kikilu. Kansi, Davidi wa Ntinu wasoneka vo: “Nkwa nsambu on’obadikang’asukami,” nze awana bevavanga lusadisu mu kuma kia mayela.​—⁠Nku. 41:⁠1.

Awana belunga-lunganga ambevo ekuma benena akwa nsambu? Muna Ngana 19:17 tutanganga vo: “On’ofwa nsukami e nkenda, Yave kesompeka, ewete diandi, futa kekumfuta dio.” O Nzambi akieleka olunga-lunganga e selo yandi yakwikizi ana bena vo ambevo. Osambulanga mpe awana bekubasadisanga. Davidi wa ntozi a nkunga wavova vo: “O Yave okunkindisa vana mfulu a yela. E mfulu andi awonso ovilwidi yo, wau otovokele.” (Nku. 41:⁠3) Tulenda kala ye ziku vo, kele vo ndiona osadisanga akaka obwidilu e mpasi, o Yave olenda kunsadisa.

Diakiese dia zaya vo Yave wa Nzambi omonanga yo tonda dina tuvanganga muna sadisa e yitu yeto ina vo ambevo. Muna vana lusadisu lwalu ngolo divavanga kwa yeto. Kansi, Nkand’a Nzambi ukutuvovesanga vo “muna tutambiku tuna wau, o Nzambi i keyangalela.”​—⁠Ayib. 13:⁠16.

[Mvovo Vana Yand’a lukaya]

[Mafoto zina muna lukaya lwa 18]

Sikila muna mwanda yo tambulwila lusadisu lw’akaka