‘Mavangu Mandi Mekunlanda’

THEODORE JARACZ, mwisi Buka kia Selo Yambuta ya Mbangi za Yave, wafokwele e zingu kiandi ova ntoto kina Kiatatu kia 9 kia ngonde ya Yuni, 2010. Wafwidi ye kimbuta kia 84 dia mvu. Nkento kasisidi, mpangi Melita, ona basompana se vioka mvu 53. Wasisidi mpe mpangi ankento ye wan’ankazi tatu, mosi w’eyakala, nzole w’akento.

Wawutuka kina kia 28 kia ngonde ya Setemba, 1925, kuna Pike County, Kentucky, Estados Unidos. Mpangi Jaracz wayekola zingu kiandi kwa Yave yo vubwa mu kimbuta kia mvu 15, kina kia 10 kia ngonde ya Agositu, 1941. Una vavioka mvu miole, muna kimbuta kia mvu 17, wakota muna salu kia mviti a nzila a ngonde ke ngonde. Lwalu i lubantiku lwa mvu 67 kasala muna salu kia ntangwa ke ntangwa.

Muna mvu wa 1946, ye kimbuta kia mvu 20, mpangi Jaracz wakota kalasi kia nsambwadi kia Sikola ya Ngiladi. Kuna mfoko a sikola, mpangi Jaracz wasolwa se nkengi a zunga kuna Cleveland, Ohio, Estados Unidos. Muna mvu wa 1951, wafilwa kuna Austrália mu kala se mfidi a vula. E Anuário ya Mbangi za Yave ya mvu wa 1983 yasonga vo mpangi Jaracz “wakasakesanga ampangi muna nsi yawonso muna vema kwandi muna salu ya kimfumu yo vita o ntu muna salu kia umbangi.”

Vava kavutuka kuna Estados Unidos, mpangi Jaracz wakazala yo mpangi Melita Lasko, kina kia 10 kia ngonde a Desemba, 1956. Vava bakazala, bayantika salu kia nkengi a zunga ye mvivu muna zunga yayingi ya Estados Unidos. I bosi, muna mvu wa 1974, mpangi Jaracz wabokelwa mu kituka se mosi muna Buka kia Selo Yambuta ya Mbangi za Yave.

Mpangi Jaracz osungamenwa nze selo kiakiyekola kwa Yave, nkwa kwikizi, ona wayivana ye nsi a ntima wawonso muna salu kia Nzambi. Yakala dianzodi kakala, ona watoma lunga-lunganga nkaz’andi. Mpangi azikuka muna mwanda, wau vo wasianga nsatu z’akaka vana fulu kiantete ke mu zandi ko. (1 Kor. 13:4, 5) Zola kwandi muna wantu kwamonekanga muna mpila kavavilanga vo awonso basongwanga nkenda yo kadila yau muna unsongi. Vana ntandu, wasonganga mpe zola kwandi muna wantu muna kuyivananga una ufwene muna salu kia umbangi.

Kana una vo tukendalele kwayingi mu kuma kia lufwa lwa ndiona wakala vo nsadi ambote, ona watoma zolwanga kwa esi Betele ye kwa mpangi mu nza yawonso, tuna ye kiese wau vo mpangi Jaracz wasadila Yave ye kwikizi kiawonso mu mvu miayingi. Tuna ye vuvu vo ‘kazizila yamu lufwa yo tambul’e kolow’a moyo.’ (Lus. 2:10) Tuna mpe ye ziku vo ‘mavangu mandi mekunlanda.’—Lus. 14:13.