Mambu Malenda Fimpwa Muna Nsambila ya esi nzo ye Muna Longi dia Yeto Kibeni

KUNA lubantiku lwa mvu wa 2009, e nkutakani za Mbangi za Yave mu nz’amvimba zasoba e nkubika za lukutakanu. O tukutakanu twavangamanga mu lumbu yole, owau twabundwa mu lumbu kimosi. Yeto awonso twakasakeswa mu sadila fuku wauna twakalanga yo lukutakanu muna nsambila ya esi nzo yovo mun’elongi dia yeto kibeni. Nga otoma sadilanga e nkubika yayi yampa? Dina nusolanga o vanga muna fuku wau dilenda kunusadisa kumosi y’esi nzo zeno.

Nkia mambu tufwete longoka muna nsambila ya esi nzo? Buka kia Selo Yambuta ke besikidisanga ko dina konso nzo bafwete longoka konso lumingu. Konso nzo ivwidi nsatu zandi. Muna kuma kiaki, o se kafwete fimpanga e nsatu za esi nzo andi yo sola dina dilenda kubasadisa. Awana bena yau mosi kaka balenda mpe vava una balenda sadila e ntangwa yayi mu mpila yambote.

Esi nzo zakaka bekubikanga entwadi malongi ma tukutakanu. Kansi, ke diau kaka ko tulenda vanga muna nsambila ya esi nzo. Esi nzo zakaka betanganga entwadi Nkand’a Nzambi yovo malongi makaka ma nkanda mieto yo mokena mo. Akaka bekubikanga e fuka ivovelanga lusansu lwa Nkand’a Nzambi. Ediadi disadisanga musungula yingyana-ngyana. Muna kuma kiaki, e nsambila ya esi nzo ke ifwete kala ko nze lukutakanu kuna nkutakani, muna tanganga e tini ye yuvula e yuvu. E nsambila ya esi nzo ifwete kala ntangwa ina tulenda mokena yo vova dina tuna diau muna ntima. I ntangwa ina tulenda sadila ngangu zeto yo kala ye mbokena zambote mu kuma kia mana tutanganga muna Nkand’a Nzambi. Muna mpila yayi, fuku una esi nzo bekalanga vamosi ukala se ntangw’a kiese kwa konso muntu.

Se dimosi una yo wana tatu wasoneka mu songa dina esi nzo andi bevanganga muna nsambila ya esi nzo. Una ye mwan’amosi ankento, nkumbu andi Kaitlyn ye wana wole amakala, David ye Michael. Kaitlyn kimbuta kia mvu 15 kena, David mvu 13, ye Michael mvu 7. Muna nsambila ya esi nzo, nkumbu miayingi tusadilanga kapu ya ntangilu ya Nkand’a Nzambi ya lumingu lwaluna. Entete, konso muntu otanganga kapu yayi. I bosi, o wana besolanga diambu dina bazolele vavulula. Bezayisanga kwa mase mau dina balongokele. Nkumbu miayingi Michael ovanganga fwaniswa yovo soneka diambu mu kuma kia mana katangidi. Ezak’e ntangwa, David ye Kaitlyn besonekanga lusansu lumosi lwa Nkand’a Nzambi nze yau bamona dina diavangama. Kasikil’owu, lumingu lumosi, batanga lusansu lwa Yosefe vava kavana e nsas’a ndozi zalota e ntaudi zole za Faro. Kaitlyn wasoneka lusansu lwalu nze vika sia vo kakala muna pelezo yo mona dina diavangama.—Etu. kapu kia 40.

Makete kaka tuvovele mana esi nzo balenda vanga muna nsambila ya esi nzo. Wau vo konso muntu ye konso nzo ina ye nsatu zandi, nulenda sola dina numwene vo diambote kwa yeno. E babu kina mun’elongi diadi kisonganga mambu malenda fimpwa muna nsambila ya esi nzo yovo mun’elongi dia yeto kibeni. Nulenda mpe yindula mambu makaka nulenda longoka.

 [Babu/​Foto ina muna lukaya lwa 7]

Kwa esi nzo bena yo wan’amatoko ye ndumba:

• Tanga yo mokena muna nkanda Os Jovens Perguntam—Respostas Práticas.

• Yindula vo nwakala vava kiavangama dina nutanganga. (Tala mun’Eyingidilu dia 15 dia Mayu, 1996, lukaya lwa 14, tini kia 17-18, mu Kimputu.)

• Nuvovela dina nuzolele vanga muna salu kia Yave—owau ye kuna sentu.

• Nukalanga ye fu kia tala yo mokena oma ma vídeo zeto.

• Nufimpanga elongi, “Kuna Kw’aleke Eto” divaikiswanga mun’Eyingidilu.

Kw’akazi ke bena ye wana ko:

• Nufimpanga kapu kia 1, 3, 11-16 muna nkanda Mbumba ya Zingu kia Nzo ya Kiese.

• Nutanganga yo longoka eyaka kapu ya Nkand’a Nzambi yo mokena dina nulongokele.

• Nukubikanga kumosi Elongi dia Nkand’a Nzambi dia Nkutakani yovo di’Eyingidilu.

• Numokena una nulenda wokesela e salu kieno kia umbangi.

Kw’ampumpa yovo awana bena yau mosi kaka muna ludi:

• Longokanga e nkanda miampa tutambulanga muna lukutakanu lwa mvivu.

• Tanganga Anuário yampa yovo ya mvu miavioka.

• Longoka una olenda vanina e mvutu za yuvu betoma yuvulanga wantu muna zunga kieno.

• Kubika mana ovova muna salu kia umbangi.

Kw’awana bena ye yingyana-ngyana:

• Nukubikanga e fuka mu kuma kia lusansu luna muna Nkand’a Nzambi.

• Nuvangang’e nsaka. Nulenda sadila ezi zina muna lukaya lwa 30 ye 31 lwa Despertai!

• Nuvanganga diambu dilenda kasakesa wana mu sadila ngindu zau. (Tala elongi “Estudamos a Bíblia no Zoológico!” muna Despertai! ya 8 ya Malusu, 1996, lukaya lwa 16-19.)

• Nutanga kumosi elongi “Longa Wan’aku” divaikiswanga mun’Eyingidilu.