‘O Mwana Ozolele Sengomona se’
‘O Mwana Ozolele Sengomona se’
‘Ke ven’on’ozeye Ese, owu kenena ko, Mwana kaka, konso ona mpe o Mwana kakanini kunsengomwena.’—LUKA 10:22.
NKIA MVUTU OVANA?
․․․․․
Ekuma tulenda vovela vo Yesu kaka wafwana sengomona S’andi?
․․․․․
Aweyi Yesu kasengomwena S’andi kw’akaka?
․․․․․
Aweyi olenda tanginina Yesu muna sengomona Se?
1, 2. Nkia kiuvu ke belendanga vanina mvutu ko wantu ayingi y’ekuma?
‘NANI i Nzambi?’ Ndonga beyindulanga vo diampasi mu vana e mvutu za kiuvu kiaki. Kasikil’owu, muna Kikristu kia Kimpangila bekwikilanga vo wantu tatu bena muna Nzambi. Ndonga bevovanga mpe vo ke dilendakana ko mu bakula elongi diadi. Mfidi mosi a dibundu wavova mu kuma ki’elongi diadi vo: “Wau vo vena ye mambu makaka ke balendi bakula ko wantu, Elongi dia Nzambi mu Ntatu ke dilendi bakulwa ko.” Kuna diak’e sambu, ndonga muna awana bekwikilanga muna elongi dia lunungunuku, bekwikilanga vo Nzambi kena ko. Bevovanga vo lekwa yawonso y’esivi muna nsema, nungunuka yanungunuka. Charles Darwin kana una vo ka katikisa ko vo Nzambi kena ko, kansi wavova vo: “Wantu ke balendi bakula emvimba oma ma Nzambi ko.”
2 Kana una vo wantu ayingi bekwendanga muna nzo zau za nzambi, bakinu ye lukatikisu kana vo Nzambi una kieleka. Ndonga vava ke besololanga mvutu zasikila ko mu mana bekwikilanga, beyambulanga vava zaya ludi mu kuma kia Nzambi. Dialudi vo, “minkondwa-lukwikilu bavondw’o meso ma ntima kwa” Satana. (2 Kor. 4:4) Muna kuma kiaki, ndonga bena mu bubu ke bazeye ludi ko mu kuma ki’Ese ona Wasema lekwa yawonso.—Yes. 45:18.
3. (a) Nani watusengomwena o Mvangi? (b) Nkia yuvu tubadika?
3 Diamfunu wantu bazaya ludi mu kuma kia Nzambi. Ekuma? Kadi awana kaka bevovelanga “nkumbu a Yave” i bevuluzwa. (Roma 10:13) Muna vovela nkumbu a Nzambi tufwete zaya vo Yave una kieleka. Kristu wasengomona zayi wau kw’alandi andi. Wasengomona owu kenena Ese. (Tanga Luka 10:22.) Ekuma dinina vo Yesu kaka wafwana sengomona Se? Aweyi kavangila wo? Aweyi tulenda tanginina Yesu muna sengomona Ese kw’akaka? Yambula twafimpa yuvu yayi.
YESU KRISTU KAKA WAFWANA SENGOMONA SE
4, 5. Ekuma tulenda vovela vo Yesu kaka wafwana sengomona S’andi?
4 Yesu Kristu kaka wafwana sengomona S’andi. Ekuma? Kadi una vangwa yawonso ya mioyo ke yasemenwa ko, Yesu wakikadila se vangwa kia mwanda kun’ezulu nze “Mwan’amosi a Nzambi.” (Yoa. 1:14; 3:18) Ekwe elau diampwena kakala diau! Una vangwa yakaka ya mioyo ke yasemenwa ko, Ese watoma vwanga Mwan’andi o mfunu; o Mwana mpe wa longoka mayingi mu kuma kia S’andi ye fu Yandi. Muna ulolo wa mvu miami, o Se yo Mwana batoma mokenanga yo zolaziana. (Yoa. 5:20; 14:31) Yindula ngangu kavwa o Mwana muna tanginina kiwuntu ki’Es’andi!—Tanga Kolosai 1:15-17.
5 Ese wasola Mwana muna kala se nkunzi andi, i sia vo “Diambu dia Nzambi.” (Lus. 19:13) I kuma vo, Yesu kaka wafwana sengomona o Se kw’akaka. Muna Nsangu zambote zasoneka Yoane, Yesu wayikilwa vo “e Diambu,” “ona wina muna nkata z’Ese.” (Yoa. 1:1, 18) Muna mvovo miami, Yoane nanga fu bakala kiau wantu muna ntangw’a dia kasungamena. E nzenza mantalani bavwandiswanga vana meza kimana batoma mokenanga. Diau adimosi mpe, o Mwana vava kakala “muna nkata z’Ese,” disonganga vo batoma mokenanga.
6, 7. E ngwizani vana vena Se yo Mwana aweyi yakumamena?
6 Dialudi vo, ngwizani vana vena Se yo Mwana yakumama. O Mwana ‘wakala s’eyangi diandi [Nzambi] lumbu ya lumbu.’ (Tanga Ngana 8:22, 23, 30, 31.) Ekolo basalanga kumosi, o Mwana watanginina e fu ya S’andi. Ediadi diakumika kikilu ekangu diau dia nzolani. Vava kiasemwa e vangwa yakaka ya ngangu, o Mwana wamona una Yave kakadilanga ye konso vangwa kiandi, ediadi diawokesa kikilu luyangalalu lwandi muna kiwuntu kia Nzambi.
7 Vava Satana kafidisa kimfumu kia nsongi kia Yave e mpaka, Mwana walongoka una Yave kasongela o zola, unsongi, ngangu ye nkuma muna diambu diampasi. Ka lukatikisu ko, ediadi diasadisa Yesu mu toma kubama yo sunda e mpasi kadi wawana zau muna salu kiandi ova ntoto.—Yoa. 5:19.
8. E Nsangu Zambote zasoneka antumwa aweyi zilenda kutusadisila mu toma bakula nkala Ese?
8 Muna kuma kia ngwizani andi ambote yo Yave, Mwana wasengomona Se mu mpila isundidi ke mu muntu akaka ko. O zaya malongi ye mavangu ma Mwan’amosi i mpila yambote tulenda zayila o Se. Muna bong’e nona: Yindula e mpasi diadi kala muna vava bakula nsas’a “zola” kele vo mu Dicionário kaka tulongokelanga nsasa mvovo wau! Kansi, muna toma fimpa Nsangu Zambote zasoneka antumwa mu kuma kia salu kia Yesu ye una kakadilanga y’akaka, tulenda toma bakula e nsas’a mvovo, “Nzambi i zola.” (1 Yoa. 4:8, 16) Diau adimosi mpe ye fu yakaka ya Nzambi kasengomona Yesu kw’alongoki andi vava kakala ova ntoto.
UNA YESU KASENGOMONA S’ANDI
9. (a) Nkia mpila zole Yesu kasengomona S’andi? (b) Yika nona kisonganga una Yesu kasengomona S’andi muna malongi mandi.
9 Aweyi Yesu kasengomona S’andi kw’alongoki andi kumosi mpe yo yeto? Mu mpila zole kavangila wo: Muna malongi ye fu yandi. Yambula twabadika ntete malongi ma Yesu. Mana Yesu kalonga kw’alandi andi metoma songanga e nkanikinu, ngindu ye makani ma S’andi. Kasikil’owu, Yesu watezanesa S’andi yo mvungudi ekambi dia mameme ona ovavanga ememe dimosi divididi. Yesu wavova vo vava kesolola dio, “olutidi dio mwena kiese, ke mu luvwa ye vwa lulembi tungiana ko.” Ekuma Yesu kasadila nona kiaki? Yesu wavova vo: “Diau adimosi, ke luzolo lu’Es’eno wina kun’ezulu ko, kavil’omosi vana ven’away’andwelo.” (Mat. 18:12-14) Adieyi olenda longoka mu kuma kia Yave muna nona kiaki? Kele vo oyindulanga vo ka vena muntu ko okuvwanga o mfunu, zaya dio vo Es’aku ezulu okuvwanga mfunu yo toma kulunga-lunga. Vana meso mandi, u mosi “vana ven’away’andwelo.”
10. Aweyi Yesu kasengomona S’andi muna nkal’andi?
10 E nkal’andi i mpila yazole ina Yesu kasengomona S’andi kw’alongoki andi. Vava Filipo wa ntumwa kayuvula Yesu vo: “Utusongel’o Se,” Yesu wavutula vo: “Ona wambona, wamona Se.” (Yoa. 14:8, 9) Badika nona yakaka isonganga una Yesu katanginina fu ya S’andi. Vava “muntu wabilam’o wazi” kadodokela Yesu vo kankiazisa, Yesu wamvovesa vo: “Nzolele wo; kianza kwaku.” Ka lukatikisu ko, o nkwa wazi wabakula wo vo Yave wasadila Yesu muna kunwuka. (Luka 5:12, 13) Diau adimosi mpe, vava Yesu ‘kafululuka muna ntima, o moyo andi watelama’ yo ‘dila e kinsanga’ mu kuma kia lufwa lwa Lazaro, alongoki babakula e nkenda za Yave. Kana una vo Yesu wazaya wo vo osinga futumuna Lazaro, wamona mpasi ye ntantu zina bamona yitu y’akundi a Lazaro. (Yoa. 11:32-35, 40-43) Ka lukatikisu ko, nanga vena ye lusansu lwa Yesu muna Nkand’a Nzambi otoma yangalelanga yo kusadisa mu bakula nkenda z’Ese.
11. (a) Dina Yesu kavanga muna velelesa tempelo, adieyi disonganga mu kuma ki’Es’andi? (b) O lusansu lwa Yesu lwa velelesa e tempelo nkia vuvu lukutuvananga?
11 Adieyi olenda longoka mu dina kavanga Yesu vava kavelelesa tempelo? Tala dina diabwa: Yesu wabonga lubamba yo vaikisa awana batekanga ngombe yo mameme muna tempelo. Oyitidi nzimbu za mimbudianzimbu, okindwidi meza mau. (Yoa. 2:13-17) Evangu diadi dia nkuma diafila alongoki mu sungamena mvovo mia ungunza mia Ntinu Davidi vo: “Eketo dia nzo aku dimpempwele.” (Nku. 69:9) Muna vangu diadi, Yesu wasonga etima diandi dia tatidila nsambil’aludi. Nkia fu ki’Ese omwene muna lusansu lwalu? O lusansu lwalu lusonganga vo Yave ovwidi nkuma ye luzolo lwa sukisa emvimba umpumbulu ova ntoto. Dina kavanga Yesu mu kuma kia umpumbulu, disonganga una o Se kemonanga mu kuma kia umpumbulu uwokelanga ova ntoto o unu. Ediadi dilenda kutufiaulwisa kele vo muntu utuvangidi o bì!
12, 13. Adieyi lenda longoka mu kuma kia Yave mu mpila ina Yesu kakadila y’alongoki andi?
12 Yambula twabadika nona kiakaka kisonganga una Yesu kakadilanga y’alongoki andi. Nkumbu miayingi batantananga kana nani i mbuta vana bakala. (Maku 9:33-35; 10:43; Luka 9:46) Wau vo wazaya mayingi mu kuma ki’Es’andi, Yesu wazaya una Yave kebadikilanga fu kia lulendo. (2 Sam. 22:28; Nku. 138:6) Vana ntandu, Yesu wateka mona fu kiaki kwa Nkadi ampemba wa Satana. E fu kiaki kilenda fila muntu mu lokokela etunda. Muna kuma kiaki, Yesu watoma kendalala vava kamona alandi andi bakwamanana songa fu kiaki ki’eloko. Akaka mun’awana kasola se ntumwa zandi fu kiaki mpe bakala kiau. Basonga e fu kiaki ki’eloko yamuna lumbu kia nsuka kakala ova ntoto Yesu. (Luka 22:24-27) Kansi, Yesu wakwamanana kubasingika kuna lulembamu lwawonso, kadimbula e vuvu ko, wazaya wo vo kuna sentu besinga tanginina lusakalalu lwandi.—Fili. 2:5-8.
13 Nga olenda mona kiwuntu kia Se muna mpila Yesu kasongela luzindalalu muna singika vilwa w’alongoki andi? Adieyi longokele mu kuma ki’Ese muna mavangu ye mvovo mia Yesu? O Se diandi ke bembolanga nkangu andi ko mu kuma kia vilwa wau. O zaya yo sungamena kiwuntu kia Yave, nga dilenda kutufila mu vilukw’e ntima yo lomba ndoloki vava tusumukanga?
MWANA WASENGOMONA S’ANDI KUNA MVEVO
14. Aweyi Yesu kasongela vo wazola sengomona Es’andi?
14 Ayadi ayingi akwa ntima mia mbadi muna simbinina nkangu muna wisa kiau, bevanganga wawonso muna kubayambula muna bubu yo lembi kubazayisa mambu mayingi. Nswaswani yo yau, Yesu wasengomona kw’akaka mana kazaya mu kuma ki’Es’andi. (Tanga Matai 11:27.) Vana ntandu, Yesu wavana kw’alongoki andi “zayi, [kimana] bazayila ndiona waludi,” i sia vo bazaya Yave wa Nzambi. (1 Yoa. 5:20) Adieyi disonganga ediadi? Yesu waziula ntima ye ngindu z’alongoki andi kimana babakula mana kabalonganga mu kuma ki’Es’andi. Kasidi longa elongi diampimpita ko dia Nzambi mu Ntatu edi diswekanga kiwuntu ki’Es’andi.
15. Ekuma Yesu kalundila mambu makaka mu kuma ki’Es’andi?
15 Nga Yesu wasengomona mawonso kazaya mu kuma ki’Es’andi? Ve, muna kuma kia umbakuzi wandi, kasengomona ko mawonso kazaya. (Tanga Yoane 16:12.) Ekuma? Kadi muna ntangwa yayina, alongoki andi ‘ke badi mo bakula ko.’ Yesu wabasonga vo mambu mayingi mesengomonwa vava kelwaka “nsadisi” i sia vo mwand’avelela ukubafila “muna ludi kiawonso.” (Yoa. 16:7, 13) Nze una mase ma ngangu belundilanga mambu makaka yavana wan’au belwaka muna ntela ina balenda mo bakulwila, Yesu mpe wavingila vo alongoki andi bazikuka i bosi kadi kubalonga mambu makaka mu kuma ki’Ese. Yesu wazaya tezo kiau.
TANGININA YESU MUNA SADISA AKAKA BAZAYA YAVE
16, 17. Ekuma winina wafwana mu sengomona o Se kw’akaka?
16 Avo wanane yo muntu mu nkumbu antete yo yangalela nkal’andi, nga kuzayisa dio ko kw’akaka? Vava kakala ova ntoto, Yesu wazayisanga kw’akaka oma ma Yave. (Yoa. 17:25, 26) Nga tulenda kuntanginina muna zayisanga oma ma Yave kw’akaka?
17 Nze una tulongokele kala, o zayi kakala wau Yesu mu kuma ki’Es’andi, ka vena muntu akaka ko lenda kala wau. Kansi, wakala ye luzolo lwa zayisa kw’akaka mana kazaya; waziula mpe ntima ye ngindu z’alongoki andi kimana batoma bakula kiwuntu kia Nzambi. Muna lusadisu lwa Yesu, o unu tutomene zaya S’eto ke mu wantu akaka ko. Tuvutulanga matondo wau vo Yesu muna malongi ye nkal’andi watusengomwena Es’andi. Dialudi vo, tulenda kweto kisana wau tuzeye o Se. (Yer. 9:24; 1 Kor. 1:31) Ekolo tuvanganga e ngolo mu finama Yave, oyandi mpe okutufinamanga. (Yak. 4:8) Tuvwidi elau diambote dia samuna mawonso tuzeye mu kuma kia Yave. Aweyi tulenda wo vangila?
18, 19. Aweyi olenda sengomona Se kw’akaka? Sasila.
18 Tufwete tangininanga Yesu muna sengomona o Se tuka muna mvovo yamuna mavangu meto. Sungamena vo ndonga tuwanananga yau muna salu kia umbangi ke bazeye ko kana nani i Nzambi. Muna kuma kia malongi maluvunu belongwanga, mu mpila yabendomoka bebadikilanga Nzambi. Tulenda sadila Nkand’a Nzambi muna kubalonga nkumbu a Nzambi, ekani diandi mu kuma kia wantu ye kiwuntu kiandi. Vana ntandu, tulenda mokena ye mpangi zeto mu kuma kia tusansu twa Nkand’a Nzambi tutoma sengomonanga kiwuntu kia Nzambi mu mpila ina ke twabakulanga ko. Ediadi dilenda kubakasakesa mpe.
19 Aweyi olenda tanginina Yesu muna sengomona Se muna nkal’aku? Vava wantu bemonanga o zola kwa Kristu muna mavangu meto, dilenda kubafila mu finama Se yo Yesu. (Ef. 5:1, 2) Paulu wa ntumwa watukasakesa ‘twantanginina, waun’oyandi katangininanga Kristu.’ (1 Kor. 11:1) Ekwe elau tuvwidi dia sadisa wantu bazaya Yave muna nkal’eto! Yambula yeto awonso twakwamanana tanginina Yesu muna sengomona Se kw’akaka.
[Yuvu ya Longoka]
