Kala ye Ngangu Vava ‘Luludiku Lwavimpi’

E zingu kilenda tezaneswa ye nkangalu. Kansi, e ngangu za wantu ke zitoma sadisanga nkangu ko bakala ye zingu kiakiese. Ndonga bebwilwanga e mpasi muna nkangalu wau wa zingu. (Nku. 107:23, 27) Ekuma mpasi za zingu zilenda tezaneswa ye nkangalu muna kalunga?

Okangala muna kalunga diampasi kikilu diakalanga kuna nz’ankulu, umbangu wavavwanga. Diavavanga vo ansau balongwa kwa nkwa ngangu ye afidi a nzaza ana bazikuka. (Mav. 27:9-11) Fwaniswa yayingi yabandulwa kuna nz’ankulu yitoma songanga o mfunu wa salu kia mfidi a nzaza, e fwaniswa kiandi kiampwena kiakalanga ke mu fwaniswa ya nsau zakaka ko. Muna kangala muna kalunga, ansau bafwete longoka oma ma ntetembwa, tembwa ye makaka mpe. Muna Nkand’a Nzambi ansau beyikilwanga vo “akwa ngangu.”—Yez. 27:8.

E mpasi za zingu o unu zilenda tezaneswa ye nkangalu a mpasi a nz’ankulu muna kalunga. Adieyi dilenda kutusadisa?

AWEYI TULENDA VWILA ‘LULUDIKU LWAVIMPI’?

Wau vo e zingu kieto kiafwanana ye nkangalu, diambote mu lemvokela ludi eki kia Nkand’a Nzambi: “O nkwa ngangu kawa, kanungunukw’o zayi; O mbakuzi kabaka tuludiku twavimpi.” (Nga. 1:5, 6) E mvovo wa Kiyibere wasekolwa vo “tuludiku twavimpi” ulenda songa e salu kia mfidi a nzaza kuna nz’ankulu. Ediadi disonganga ndekwa ye ngangu kasadilanga muna fila e nzaza.

Kana una vo ngolo zivavwanga, tulenda vwa ‘luludiku lwamvimpi’ lulenda kutusadisa muna nkangal’eto a zingu. Nze una usonganga Ngana, yambula twasadila “ngangu” kumosi ye “umbakuzi” ye “ndungalala.” (Nga. 1:2-6; 2:1-9) Ka tufwete yambula vava luludiku lwa Nzambi ko kadi kimpumbulu ozeye bendomona ‘luludiku’ mu mpila yambi.—Nga. 12:5.

Muna kuma kiaki, diambote twakala ye fululu kia longokanga Nkand’a Nzambi. Mun’elongi diadi, tusolola mambu mamfunu mu kuma kia Yave yo Yesu Kristu ona otoma kuntangininanga. (Yoa. 14:9) Muna lukutakanu lwa Akristu tutambulanga tuludiku twa ngangu. Vana ntandu, tulenda zaya mambu makaka muna badika mana mabwila akaka kumosi yo mase meto.—Nga. 23:22.

TEKA KUBAMA

“Tuludiku twavimpi” mfunu kikilu twina, musungula vava tukalanga mu mpasi. O lembi zaya dina tufwete vanga kele vo diambu diampasi ditubwididi,  dilenda kututwasila vonza kiampwena.—Yak. 1:5, 6.

O mvovo “tuludiku twavimpi” usadilwanga mpe muna Nkand’a Nzambi mu kuma kia vita. Tutanganga vo: “Kadi muna nduluma zambote [tuludiku twavimpi] i’nwanina vita: Muna ulolo w’aludiki i mwina luvuluzu.”—Nga. 20:18; 24:6.

Nze una nludiki a makesa keteka kubikilanga vita, yeto mpe tufwete teka kubamanga mu kuma kia mambu malenda sia kimwanda kieto mu vonza. (Nga. 22:3) Kasikil’owu, diambote mu teka kubama muna diambu dia tambulwila yovo lembi tambulwila salu kiampa yovo mbebe yakaka olenda vewa kuna salu. Nanga oteka badika e ntalu a nzimbu ofutwa, ntangwa oviokesa muna kwenda yo vutuka ye makaka mpe. Kansi, vena ye mambu makaka olenda badika: Nga salu kiaki ngwizani kina ye nkanikinu mia Nkand’a Nzambi? Nga divava vo yasalanga yamuna ola zina vo ke za salu ko? Nga salu kiaki kilenda kumpana e ntangwa ya sala e salu ya Kikristu?—Luka 14:28-30.

Loretta una vo Mbangi a Yave wakala ye salu kiambote. Vava kompani diandi diasobwa mu zunga kiakaka, mfumu a salu wavana Loretta kiyekwa kiampwena yo kumvovesa vo: “Dia uzowa mu lembi tambulwila elau diadi. Kutokani ko, muna zunga kiakina muna mpe ye Seka dia Kintinu.” Kansi, Loretta wakala y’ekani dia vevola e zingu kiandi muna sadila mvimba Mvangi andi. Wabakula vo otambulwila kiyekwa kiampa kuna salu ke diadi kumvana ntangwa yafwana ko muna sala e salu ya Kikristu. Muna kuma kiaki, walomba kimana kakatuka muna salu, kana una vo mfumu andi a salu watoma kumbundanga e vuvu. Wau Loretta osalanga se mviti a nzila vioka mvu 20, una y’eziku vo oteka kubama yo vava ‘luludiku lwavimpi’ muna Nkand’a Nzambi, diansadisa mu baka nzengo zambote. Wakumika ngwizani andi yo Yave; okalanga mpe y’elau dia sadisa wantu ayingi mu tambulwila ludi kia Nkand’a Nzambi.

“Tuludiku twavimpi” mfunu twina muna zingu kia nzo. O sansa wana salu kiampasi kikilu, e mpila mase bebadikilanga mambu ma mwanda ye salu ya nitu, dilenda vanga diambu muna zingu kia esi nzo. (Nga. 22:6) Kasikil’owu, mase bena vo Akristu, balenda kiyuvula: ‘Nga muna mbokena ye mbandu eto tulonganga wan’eto mambu ma mwanda malenda kubasadisa mu zizidila e mpasi vava bekula? Nga e mpila zingu kieto yikubasadisanga mu bakula o mfunu wavevola e zingu yo sia sungididi muna salu kia Kikristu?—1 Tim. 6:6-10, 18, 19.

Ke mavwa ko ngatu mambu makaka mana bevavanga wantu a nza mesonganga vo o muntu una ye zingu kiakiese. Solomo wa Ntinu wabakula e diambu diadi. Wavumunwinwa mu soneka vo: “Wete-wete kw’awana bevumina Nzambi, yo kumwen’o wonga.” (Kim. 8:12) E mvovo miami misonganga nluta mia vava ‘luludiku lwamvimpi’ muna Nkand’a Nzambi.—2 Tim. 3:16, 17.

[Foto ina muna lukaya lwa 30]

Muna toma songa o mfunu wa salu kia mfidi a nzaza, e fwaniswa yau yampwena yakalanga ke mu fwaniswa ya nsau zakaka ko

[Avwe a Foto]

Su concessione del Ministero per i Beni e le Attività Culturali. Ka vena muntu ko fwete bandula e fwaniswa kiaki.