Sikola za Kimfumu Ziku kia Zola kwa Yave

YAVE i ‘Nlongi eto Anene.’ (Yes. 30:20) O zola kukumfilanga muna longa akaka. Kasikil’owu, muna kuma kia zola kwandi kwampwena, Yave wasonga Yesu “konso dina kevanga yandi kibeni.” (Yoa. 5:20) O zola kwa Yave kwa yeto Mbangi zandi, kukumfilanga muna kutuvana “lubini lu’alongoki,” ekolo tuvanganga mawonso muna kunkembelela yo sadisa akaka.—Yes. 50:4.

Muna tanginina mbandu a zola kwa Yave, Buka ki’Alongi kia Selo Yambuta bakubika sikola kumi za kimfumu muna longa awana bena yo luzolo ye balenda kota sikola zazi. Nga obadikilanga sikola zazi nze ziku kia zola kwa Yave?

Tanga oma ma sikola zazi za kimfumu ye mvovo mia luyangalalu mia mpangi ana bakota zo kala. I bosi, ukiyuvula: ‘Aweyi ndenda vwila nluta mia longwa kwa Nzambi?’

 NLUTA MIA KOTA SIKOLA ZA KIMFUMU

Wau vo Yave i “Nzambi a zola,” malongi mandi, mekutusadisanga mu toma zaya e nsas’a zingu kieto, zizidila e mpasi yo kala ye kiese muna salu yeto ya Kikristu. (2 Kor. 13:11) Nze alongoki muna tandu kiantete, tutoma longwanga muna sadisa akaka yo ‘kubalonga balunda mambu mawonso’ twakanikinwa.—Mat. 28:20.

Kana una vo ka tulendi kota sikola zazi zawonso ko, tulenda vwa nluta mia kota muna sikola yimosi yovo zayingi. Tulenda sadila malongi ma Nkand’a Nzambi melongwanga muna sikola zazi. Tulenda wokesa mpe ndekwa zeto muna salu kia umbangi muna salanga entwadi ye selo ya Yave yakota sikola zazi.

Ukiyuvula: ‘Nga zingu kiame kilenda kumpana elau mu kota kana yimosi muna sikola zazi?’

Asambidi a Yave bebadikilanga dio s’elau diampwena muna yikama yo longwa muna sikola zazi. Yambula mana olongokanga ma sadisa mu finama Nzambi yo toma lunga-lunga mbebe aku, musungula mbebe ya samuna nsangu zambote mu nzaki.

[Babu/​Mafoto zina muna lukaya lwa 13]

SIKOLA ZA KIMFUMU

Sikola ya Salu kia Kimfumu

Kuma Yakubikilwa: Muna longa ateleki kimana batoma zaya longa yo samuna nsangu zambote.

Kolo Izingilanga: Ikalanga ntangwa zawonso.

Fulu Ivangamenanga: Muna Eseka dia Kintinu.

Ana Belombwanga: Ateleki awonso y’awana bekwendanga muna tukutakanu ana bekwikilanga malongi ma Nkand’a Nzambi yo zingila ngwizani ye nkanikinu mia Kikristu.

Kuyisonekesa: Mfidi a Sikola ya Salu kia Kimfumu osonekanga alongoki. Sarone una ye kimbevo ki’evola, wavova vo: “E Sikola ya Salu kia Kimfumu ikundonganga ovavulula yo sunzula malongi una ufwene. Ikundonganga mpe mu sia sungididi muna nsatu za mwanda z’akaka ke mu nsatu za mono kibeni kaka ko.”

Arnie osalanga se nkengi a zunga, wavova vo: “Wau vo i nkukumi tuka muna kileke kiame, kialendanga tala wantu ko vava yamokenanga yau. E sikola yayi yansadisa muna yantika kuyibunda e vuvu. Muna lusadisu lwa malongi ma Yave, yalongoka fulumuna yo vova malembe. Ivutulanga matondo wau yalenda kembelela Yave muna nkutakani yamuna salu kia umbangi.”

 Sikola ya Lubantiku lwa Salu kia Betele Kuma Yakubikilwa: E sikola yayi yakubikwa mu sadisa ampangi ampa kimana bakulukiana ye zingu kia Betele.

Kolo Izingilanga: Miniti 45 muna konso lumingu muna ngonde yá.

Fulu Ivangamenanga: Betele. Ana Belombwanga: Ampangi ana bekuyivananga emvimba mu salu kia Betele kana nkutu mu mvu mosi kaka.

Kuyisonekesa: Vava muntu kelwakanga ku Betele vana vau obokelwanga.

Demétrio ona wakota sikola yayi muna mvu a 1980, wavova vo: “Sikola yayi yansadisa mu tomesa fu kiame kia longoka yo kunkubika mu sadila ku Betele mu mvu miayingi. Muna lusadisu lw’alongi ye malongi ma sikola yayi yabakula vo Yave otoma kunzolanga ye ozolele vo yasikila mu salu kiame kia Betele.” Kaitlyn wavova vo: “E sikola yayi yansadisa mu sianga e sungididi muna diambu disundidi o mfunu i sia vo vangila mambu mun’owu wa luzolo lwa Yave. Yansadisa mpe mu wokesa luyangalalu lwame muna Yave, muna nzo andi ye nkubik’andi.”

Sikola ya Salu kia Kintinu Kuma Yakubikilwa: Muna longa akengi a zunga, akuluntu, ezak’e ntangwa ye selo ya salu kimana batoma zaya nkubik’a Yave yo sala e salu kiau una ufwene. (Mav. 20:28) Belongokanga una balenda tadila mambu muna nkutakani yo lunga-lunga e kambi dia Yave. E Selo Yambuta yau besikidisanga mvu ufwete vangana sikola yayi.

Kolo Izingilanga: Muna mvu miavioka, e sikola y’akengi a zunga lumbu yole ye ndambu yavanganga, akuluntu lumbu kimosi ye ndambu, selo ya salu lumbu kimosi.

Fulu Ivangamenanga: Muna Eseka dia Kintinu yovo Eseka dia Lukutakanu Lwampwena. Ana Belombwanga: Akengi a zunga, akuluntu yovo selo ya salu.

Kuyisonekesa: Akuluntu ye selo ya salu bebokelwanga kwa nkengi a zunga. Akengi a zunga bebokelwanga kuna vula.

“Kana una vo mambu mayingi melongokwanga mu kolo kiakete, sikola yayi ikumikanga akuluntu yo kubasadisa bakala ye kiese ‘yo uyakala’ muna salu kia Yave.” Diakala akuluntu ankulu yovo ampa, belongokanga salu kia vungula ekambi una ufwene yo ‘kunkukila kumosi muna ntima mosi’.”—Quinn (vana yanda).

“Sikola yayi yikutusadisanga mu zaya una tulenda kumikina lukwikilu lweto yo kutulukisa mu kuma kia vonza yo kutuvana luludiku lwamfunu muna lunga-lunga ekambi. Ekwe wete kesonganga Yave muna kutusadisa!”—Miguel.

 Sikola ya Salu kia Kimviti a Nzila

Kuma Yakubikilwa: Muna sadisa aviti a nzila batoma ‘lunganisanga uselo wau.’—2 Tim. 4:5.

Kolo Izingilanga: Tumingu tole.

Fulu Ivangamenanga: Ampangi kuna vula besolanga e fulu; Itoma kalanga muna Eseka dia Kintinu.

Ana Belombwanga: O muntu muna kota muna sikola yayi kafwete lungisa mvu amvimba muna salu kia mviti a nzila a ngonde ke ngonde. *

Kuyisonekesa: Vava aviti a nzila belungisanga mvu amvimba vana vau bebokelwanga kwa nkengi a zunga kiau.

Lily, (vana koko kwalunene) wavova vo: “E sikola yayi yansadisa mu zizidila e mpasi za zingu ye nkakalakani yiwanananga zau muna salu kia umbangi. Yansadisa mu tomesa e mpila ame ya longokela, longa yo sadila Nkand’a Nzambi. Yatoma kunkubika mu sadisa akaka, salanga entwadi y’akuluntu, yo sadisa muna lunungunuku lwa nkutakani.”

Brenda wakota sikola yayi mu nkumbu miole, wavova vo: “Sikola yayi yansadisa muna kuyivana emvimba muna mambu ma mwanda, kumika ntona zame ye sadisa akaka una ufwene. Kieleka, Yave nkwa ntima amvevo!”

[Mvovo Vana Yand’a lukaya]

Sikola mu Kuma kia Akuluntu a Nkutakani

Kuma Yakubikilwa: Muna sadisa akuluntu kimana batoma salanga e salu kiau muna nkutakani yo toma bakula dina Yave kevavanga kwa yau.

Kolo Izingilanga: Lumbu tanu.

Fulu Ivangamenanga: Vula disolanga fulu; nkumbu miayingi yikalanga muna Eseka dia Kintinu yovo muna Eseka dia Lukutakanu Lwampwena.

Ana Belombwanga: Muntu kafwete kala nkuluntu.

Kuyisonekesa: E vula dibokelanga akuluntu.

Tala mana bavova akuluntu akaka bakota kalasi kia 92 kuna Estados Unidos:

“Nluta miayingi ntambwidi muna sikola yayi, yinsadisi mu toma kilunga-lunganga ye una ndenda lunga-lunga mameme ma Yave.”

“Ntomene zaya mpila ya sasila mambu masina ma Nkand’a Nzambi muna kasakesa mpangi zawonso.”

“Isinga sadila malongi mama muna zingu kiame kiawonso.”

Sikola y’Akengi a Zunga ye Mvivu ye Akazi Au

Kuma Yakubikilwa: Muna longa akengi a mvivu ye a zunga kimana bakingulanga nkutakani una ufwene yo “funtukinanga muna diambu y’elongi.”—1 Tim. 5:17; 1 Pet. 5:2, 3.

Kolo Izingilanga: Ngonde zole.

Fulu Ivangamenanga: Vula disikidisanga e fulu.

Ana Belombwanga: O muntu muna kota sikola yayi kafwete kala nkengi a zunga yovo nkengi a mvivu.

Kuyisonekesa: E vula dibokelanga akengi a zunga ye a mvivu y’akazi au.

“Luyangalalu lweto muna mpila Yesu kefidilanga nkutakani lwawokela. Twabakula mfunu wakasakesa ampangi ana tusadilanga yo kumika kintwadi kia konso nkutakani. E sikola yayi yitomene kutulonga vo ekolo nkengi a zunga kesianga sungididi kia vana elongi yo singika ampangi, kafwete sungamena vo ekani diandi i sadisa ampangi bazaya vo Yave okubazolanga.”—Joel wakota kalasi kia 1 muna mvu a 1999.

 Sikola ya Nkand’a Nzambi mu Kuma kia Mpangi z’Akala Ampumpa

Kuma Yakubikilwa: Muna longa akuluntu ye selo ya salu ampumpa mu tambula diaka kiyekwa kia salu muna nkubik’a Yave. Kuna mfoko, akaka befilwanga muna zunga ivwidi ateleki ayingi o mfunu muna nsi zau. Akaka ana bekuyivananga kuna mvevo balenda filwa muna nsi za kinzenza. Akaka betumbikwanga se aviti a nzila espesiale mu fikolo yo filwa muna zunga yandá ke yina ye nkutakani ko muna ziula yo wokesa salu kia umbangi.

Kolo Izingilanga: Ngonde zole.

Fulu Ivangamenanga: Vula disolanga fulu; nkumbu miayingi yikalanga muna Eseka dia Kintinu yovo muna Eseka dia Lukutakanu Lwampwena.

Ana Belombwanga: Mpangi z’akala za mpumpa ana bena ye mvu 23 yakuna 62 aya bena yo vimpi wambote, musungula ana bazolele sadila muna zunga ivwidi ateleki ayingi o mfunu. (Maku 10:29, 30) Bafwete kala se aviti a nzila a ngonde ke ngonde mu tezo kia mvu miole yo salanga se akuluntu yovo selo ya salu mu mvu miole mia mvimba.

Kuyisonekesa: O lukutakanu lw’awana bazolele kisonekesa lukalanga muna lukutakanu lwa zunga. Mambu makaka mezayiswanga muna lukutakanu lwalu.

Rick wakota kalasi kia 23 kuna Estados Unidos wavova vo: “Muna lusadisu lwa sikola yayi mwand’a Yave wasoba emvimba e zingu kiame. Avo Yave ovene kiyekwa osinga kuyikama muna lunga-lunga kio. Yabakula vo kele vo nsidi luzolo lwa Nzambi va fulu kiantete ke mu luzolo lwa mono kibeni ko, Nzambi okunkumika.”

André osadilanga kuna Alemanha wavova vo: “Yatoma bakula vo nkubik’a Nzambi mu mpila esivi yisadilanga o unu. Sikola yayi yankubika mu sala konso salu kuna sentu. Yalongoka mpe diambu diamfunu muna wantu ayingi beyikwanga muna Nkand’a Nzambi. O sadila Yave ye mpangi zame, kiese kiakieleka dikuntwasilanga.”

Sikola ya Nkand’a Nzambi mu Kuma kia Akristu Asompa

Kuma Yakubikilwa: Muna longa Akristu asompa kimana balenda sadilwa una ufwene kwa Yave ye nkubik’andi. Ayingi kuna mfoko a sikola yayi, befilwanga mu zunga ivwidi ateleki ayingi o mfunu muna nsi zau. Akaka avo bakivene kuna mvevo balenda filwa muna nsi za kinzenza. Akaka betumbikwanga se aviti a nzila espesiale mu fikolo yo filwa muna zunga yandá ke yina ye nkutakani ko muna ziula yo wokesa salu kia umbangi.

Kolo Izingilanga: Ngonde zole.

Fulu Ivangamenanga: E sikola yayi ivangamenanga kuna Estados Unidos, kansi tuka muna ngonde a setemba a mvu wa 2012, ikala vangamena mpe muna mavula mesolwa mu nza yawonso. Nkumbu miayingi yikala vangamena muna Maseka ma Kintinu yovo muna Maseka ma Lukutakanu Lwampwena.

Ana Belombwanga: Akazi bena ye mvu 25 yakuna 50 aya bena yo vimpi wambote, bakondelo nkakalakani muna kwenda sadila mu zunga ivwidi ateleki ayingi o mfunu; musungula aya balenda tambulwila nze Yesaya ona wavova vo: “Mono oyu; untuma.” (Yes. 6:8) Bafwete kala basompa mu tezo kia mvu miole yo salanga e salu kia ntangwa ke ntangwa mu mvu miole mia mvimba. Yakala kafwete kala nkuluntu yovo selo kia salu mu mvu miole mia mvimba.

Kuyisonekesa: O lukutakanu lw’awana bazolele kisonekesa lukala muna lukutakanu lwa mvivu. Mambu makaka mezayiswa muna lukutakanu lwalu. Avo zolele kisonekesa yo mona vo lukutakanu lwalu ke luvangamanga ko muna lukutakanu lwa mvivu muna nsi aku, olenda soneka kuna vula kimana bazayisa mambu makaka mevavwanga.

“E ngonde zazi zau zole zisobele emvimba e zingu kia akazi yo kubavana elau dia sala kwayingi muna salu kia Yave. Tuna y’ekani dia vevola e zingu kieto kimana twasadila e ntangwa una ufwene.”—Eric ye Corina (vana yanda) bakota kalasi kia 1 muna mvu a 2011.

Sikola ya Nkand’a Nzambi ya Ngiladi

Kuma Yakubikilwa: Muna longa ampangi balenda sala nze misionario muna zunga yampwena, akengi a zunga yovo sadila kuna Betele. Ekani dia sikola yayi i toma sikidisa salu kia umbangi ye salu kia mavula.

Kolo Izingilanga: Ngonde tanu.

Fulu Ivangamenanga: Patterson, Sikola za Sina za Torre de Vigia, Nova York, Estados Unidos.

Oma Melombwanga: Akazi ana bena mu salu kia ntangwa ke ntangwa nze misionario ana ke batanga sikola yayi ko, aviti a nzila a espesiale, akengi a zunga ye mvivu yovo ana besadilanga kuna Betele. Bafwete kala mu salu kia ntangwa ke ntangwa mu tezo kia mvu tatu mia mvimba. Bafwete zaya vova, tanga yo soneka Kingelezo.

Kuyisonekesa: Awana basompa balenda solwa kw’Afidi a Vula.

Lade ye Monique batuka kuna Estados Unidos owau besadilanga kuna Afrika. Lade wavova vo: “Sikola ya Ngiladi yatukubika mu kwenda sadila muna konso fulu ova nza yo salanga entwadi ye mpangi zeto azolwa.”

Monique wakudikila vo: “Ekolo isadilanga mana ilongokanga muna Nkand’a Nzambi, ikalanga ye kiese kiayingi muna salu kiame. E kiese kiaki i ziku kiakaka kisonganga vo Yave okunzolanga.”

Sikola ya Afidi a Mavula ye Akazi Au

Kuma Yakubikilwa: Muna sadisa Ambuta muna Mavula batoma lunga-lunganga salu kia Betele, tala mambu ma nkutakani, salu kia akengi a zunga ye a mvivu, salu kia sekola nkanda, salu kia nieteka yo fila nkanda muna zunga yakaka.

Kolo Izingilanga: Ngonde zole.

Fulu Ivangamenanga: Patterson, Sikola za Sina za Torre de Vigia, Nova York, Estados Unidos.

Oma Melombwanga: O mpangi muna kota muna sikola yayi kafwete kala muna Buka kia Afidi a Mavula yovo muna Buka kia Afidi a Salu kia Nsi yovo mpangi osinga tumbikwa muna buka kiaki.

Kuyisonekesa: E Buka kia Selo yambuta kibokelanga Afidi a Mavula y’akazi au.

Lowell ye Cara bakota kalasi kia 25, besadilanga kuna Nigéria. Lowell wavova vo: “Muna sikola yayi yalongoka vo diakala vo salu kiayingi bampene, e nsabi muna yangidika Yave i sadila kio mun’owu wa luzolo lwa Yave. Twalongoka mpe o mfunu wa tanginina zola kwa Yave muna mpila tukadilanga ye mpangi zeto.”

Cara wakudikila vo: “Muna sikola yalongoka diambu dimosi diamfunu kivilakananga ko. Kele vo diambu nzolele longa kw’akaka kilenda dio sasila mu mvovo mialeboka ko, mfwete dio longoka ntete.”