Ke dina mfunu ko mu tokanena e fulu kivwende muntu wavaikiswa muna nkutakani mun’Eseka dia Kintinu. Finkanda fiafi fikasakesanga mase m’Akristu mu vana lusadisu lwa mwanda kwa mwan’au wavaikiswa muna nkutakani, ona ozinganga yau muna nzo, avo dilendakana. Nze una usonganga Eyingidilu dia 15 dia ngonde a Novemba 1988, muna lukaya lwa 19 ye 20, mase balenda longokanga Nkand’a Nzambi yo mwan’au wavaikiswa muna nkutakani una vo nleke, ona wakinu zinga yau vamosi. Ediadi disadisa mwana mu tambula lukasakeso kavwidi o mfunu mu soba e mpil’a zingu kiandi.

Mun’Eseka dia Kintinu, ke diambi ko kwa mwana una vo nleke, ona wavaikiswa muna nkutakani kavwandanga fulu kimosi ye mase mandi. Wau vo ke vasikidiswa nsiku ko vo ona wavaikiswa muna nkutakani kavwandilanga kuna nima mun’Eseka dia Kintinu, ke diambi ko kwa nleke wavaikiswa muna nkutakani mu vwanda kumosi ye mase mandi. Wau vo mase betokananga mu kuma kia kimwanda kia mwan’au, bevavanga kala ye ziku vo mwan’au otoma siang’e sungididi muna tukutakanu. O vwanda vamosi yo mwan’au dilenda kala dialusadisu ke mu kunyambula ko vo kavwanda fulu kiakaka.

Kansi, adieyi tuvova avo mwana ke zingilanga diaka mu nzo a mase mandi ko? Nga disongele vo kalendi vwanda vamosi ko ye mase mandi? Muna tandu yavioka, Eyingidilu diadi diasikidisa e kadilu bafwete kala kiau Akristu mu kuma kia vanga kikundi yo yitu ona wavaikiswa muna nkutakani ye ke bezingilanga diaka nzo mosi ko. * Muna kuma kiaki, o muntu wavaikiswa muna nkutakani ovwandanga vamosi ye yitu yandi muna lukutakanu, diaswaswana kikilu yo vavanga kala yandi vamosi mu ntangwa zakaka kondwa kuma kiasikila. Avo esi nzo akwa kwikizi bena ye nyindu asikila mu kuma kia yitu kiau wavaikiswa muna nkutakani yo sia e ngolo za landa e nkanikinu mia Nkand’a Nzambi mu kuma kia vanga yandi kikundi, ke dikala mfunu ko mu tokana.—1 Kor. 5:11, 13; 2 Yoa. 11.

Kiakala vo muntu wavaikiswa muna nkutakani vamosi kafongele ye yitu yandi yovo ye mpangi zakaka muna nkutakani, ke difwete tokanesa ampangi ko kele vo osonganga nkal’ambote. O sikidisa e fulu kina muntu kafwete vwanda dilenda twasa ntantani. Avo awonso muna nkutakani kumosi ye yitu bena vo akwa kwikizi, basidi e ngolo za lemvokela e nkanikinu mia Nkand’a Nzambi mu kuma kia muntu wavaikiswa muna nkutakani yo venga tesesa ampangi e sakuba, ke dikala mfunu ko mu tokanena e fulu kivwanda awana bekwizanga muna tukutakanu tw’Akristu. *