1, 2. (a) Yika e nona kisonganga o mfunu wa sadila yuvu yambote? (Tala e fwaniswa ova ntandu.) (b) Ekuma katufwete mwena wonga ko wa mokena mambu mampasi?

 MPANGI mosi ankento wamokenanga oma ma Nkand’a Nzambi yo nkaz’andi ona kakala Mbangi a Yave ko. Nkaz’andi wavova vo mu longi dia Nzambi mu Ntatu kakwikilanga. Kansi, mpangi ankento wabakula vo nkaz’andi kazaya ko dina dibundu diandi dialonganga mu kuma kia longi dia Nzambi mu Ntatu. Kuna ndekwa wanyuvula vo: “Nga okwikilanga vo Nzambi i Nzambi, Yesu diaka i Nzambi, o mwand’avelela mpe Nzambi, kana una vo i wau ke vena Nzambi tatu ko kansi Nzambi mosi kaka?” O nkaz’andi wasivika yo vova vo: “Nkatu, kikwikilanga dio ko!” Ediadi diaziula e nzila mu kunsasila kana nani kikilu i Nzambi.

² Adieyi tulenda longoka muna nona kiaki? O sadila yuvu yambote kuna ndekwa diamfunu kikilu. Tulongokele mpe vo katufwete kalanga ye wonga ko mu mokena mambu mampasi nze elongi dia Nzambi mu Ntatu, bilungi bia tiya yovo mu kuma kia Mvangi. Avo tubund’e vuvu muna Yave ye muna malongi kekutuvananga, tulenda vana mvutu zambote kwa  wantu yo simba e ntima mi’awana bekutuwanga. (Kol. 4:6) Mun’elongi diadi, tubadika una tulenda longela mu mpila yambote muna (1) sadilanga yuvu ilenda fila muntu kavova mana keyindulanga (2) badika yo muntu dina Nkand’a Nzambi uvovanga, (3) sadilanga nona muna toma kiesesa diambu.

3, 4. Ekuma dinin’o mfunu mu sadila yuvu muna zaya mana muntu kekwikilanga? Yika e nona.

³ O sadila yuvu dilenda kutusadisa mu zaya mana kekwikilanga o muntu. Ekuma dinin’o mfunu? Muna Ngana 18:13 tutanganga vo: “On’ovana mvutwilu ke mu teka wa ko, dia uzowa yo luvungu kwa yandi.” Muna kuma kiaki, diambote twateka zayanga mana muntu kekwikilanga, i bosi tusonga dina Nkand’a Nzambi uvovanga mu kuma kia diambu tumokenanga. Avo ke wau ko, tulenda viokesa ntangwa yayingi mu vava sasila vo diambu kingandi dialuvunu kinga o muntu ke kwikilanga dio kwandi ko.—1 Kor. 9:26.

⁴ Kasikil’owu, yindula vo muntu tumokenanga yandi mu kuma kia longi dia bilungi. Wantu akaka bekwikilanga vo bilungi bia tiya i fulu kibangikilwanga wantu ambi. Akaka bekwikilanga vo kala kuna bilungi disongele vo muntu kena ye ngwizani ambote ko yo Nzambi. Muna kuma kiaki, tulenda vova vo: “Wau vo wantu ngindu zaswaswana bena zau mu kuma kia bilungi, nga olenda kunzayisa dina oyindulanga mu kuma kia diambu diadi?” Vava tuwá e mvutu kevana, tukala twakubama mu kunsadisa kabakula dina Nkand’a Nzambi uvovanga mu kuma kia diambu diadi.

5. O sadila yuvu aweyi dilenda kutusadisila mu zaya ekuma muntu kekwikilanga diambu kingandi?

⁵ O sadila yuvu kuna ndekwa dilenda mpe kutusadisa mu zaya ekuma muntu kekwikilanga e diambu kingandi. Kasikil’owu, adieyi tuvova kele vo tuwanane yo muntu muna salu kia umbangi ovovele vo ke kwikilanga mu Nzambi ko? Diasazu mu yindula vo muntu ndioyo ke kwikilanga ko vo vangwa twavangwa. (Nku. 10:4) Kansi, ndonga ke bekwikilanga diaka mu Nzambi ko mu kuma kia mpasi bewanananga zau yovo mu kuma kia mpasi za wantu ankaka. Diampasi dikalanga kwa yau mu kwikila vo Mvangi anzodi olenda yambulwila e mpasi zazi. Muna kuma kiaki, avo muntu okatikisanga kana vo Nzambi una, tulenda kunyuvula vo: “Nga i wau oyindulanga tuka kolo?” Avo muntu ovovele vo ve, tulenda kunyuvula kana vo vena ye diambu diamfila mu kala yo lukatikisu mu kuma kia Mvangi. E mvutu zandi zilenda kutusadisa mu zaya una tulenda kumvanina lusadisu lwa mwanda.—Tanga Ngana 20:5.

6. Adieyi tufwete vanga avo tuyuvwidi muntu kiuvu?

⁶ Avo tuyuvwidi muntu kiuvu, diambote twawinikinanga ye sungididi vava kevananga e mvutu mu zaya mana keyindulanga. Kasikil’owu, e sumbula yibwanga ilenda fila muntu mu kala yo lukatikisu kana vo vena yo Mvangi anzodi. Vitila twayika e ziku kisonganga vo Nzambi una kikilu, diambote twateka sasila kwa muntu vo ke diambi ko mu yuvula ekuma tumwenanga e mpasi. (Kab. 1:2, 3) O luzindalalu yo zola tukunsonga kulenda kumfila mu vava zaya diaka mayingi. *

7. Adieyi tufwete vanga muna lungisa e salu kieto kia umbangi una ufwene?

⁷ Yambula twazaya una tulenda badikila yo muntu dina Nkand’a Nzambi uvovanga. O Nkand’a Nzambi i sadilwa kieto kiantete muna salu kia umbangi. Ukutusadisanga mu ‘kala wafwana yo toma kubama muna salu yawonso yambote.’ (2 Tim. 3:16, 17) Mayingi mevavwanga muna lungisa e salu kieto kia umbangi una ufwene, ke tanga kaka sono yayingi ko. Kansi divavanga mpe vo twabadika e sono tutangidi yo toma yo sasila. (Tanga Mavangu 17:2, 3.) Yambula twabadika nona tatu.

8, 9. (a) Aweyi tulenda sadisila muntu okwikilanga vo Yesu i Nzambi? (b) Nkia ndekwa osadilanga muna sadisa o wantu mu badika diambu diadi?

⁸ Nona kia 1: Muna salu kieto kia umbangi tuwanane yo muntu okwikilanga vo Yesu i Nzambi. Nkia sono tulenda sadila mu badika yandi e diambu diadi? Tulenda lomba kwa muntu katanga mvovo mia Yesu mina muna Yoane 6:38: “Kadi nkulumukini kun’ezulu, ke mu vang’oluame luzolo ko, o luzolo lua ndiona wantuma kaka.” Vava ketanga e sono kiaki, tulenda kunyuvula vo: “Avo Yesu i Nzambi nani wantuma? Nga Muntu ndioyo kasundidi Yesu ko? Muna kuma kiaki, ndiona otumanga osundidi ndiona otumwanga.”

⁹ Tulenda tanga mpe e sono kia Filipi 2:9 kisonganga dina Paulu wa ntumwa kayika mu kuma kia dina Nzambi kavanga vava Yesu kafwa yo fuluka. E sono kiaki kivovanga vo: ‘Nzambi watundidika Yesu yo kumvana nkumbu ina iviokele nkumbu zawonso.’ Muna sadisa muntu kabakula e sono kiaki, tulenda kunyuvula: “Avo Yesu wafwanana kakala yo Nzambi vitila kafwa, i bosi Nzambi wantundidika, nga ediadi ke disongele ko vo Yesu osundidi Nzambi? Aweyi muntu ankaka kalenda sundila Nzambi?” E yuvu yayi ilenda sadisa akwa ntima miambote ana bezitisanga Nkand’a Nzambi mu vava zaya diaka mayingi.—Mav. 17:11.

10. (a) Aweyi tulenda sadisila muntu okwikilanga muna bilungi bia tiya? (b) Nkia ndekwa osadilanga muna mokena yo muntu okwikilanga muna bilungi bia tiya?

¹⁰ Nona kia 2: Muntu ovovele vo ke kwikilanga ko vo wantu ambi ke besinga bangikwa ko kuna bilungi bia tiya yakwele mvu. Dilenda kala vo okwikilanga muna bilungi bia tiya kadi ozolanga vo wantu ambi bavewa e tumbu mu kuma kia mavangu mau mambi. Aweyi tulenda sadisila muntu una ye ngindu  zazi? Diantete, tulenda kumvovesa vo wantu ambi tumbwa betumbwa. (2 Tes. 1:9) I bosi, tulenda kunlomba katanga e sono ki’Etuku 2:16, 17 kisonganga vo e tumbu ki’esumu i lufwa. Tulenda kunsasila vo mu kuma kia sumu dia Adami, wantu awonso asumuki. (Roma 5:12) Tulenda mpe kunsasila vo Nzambi kayika tumbu kia bilungi bia tiya ko. I bosi, tulenda tanga Etuku 3:19. Muna sono kiaki Nzambi wavovesa Adami vo e tumbu ki’esumu diandi i vutuka muna ntoto katuka. I bosi tulenda yuvula o muntu: “Nga diansongi kwa Nzambi mu vovesa Adami vo mu ntoto kevutuka kele vo ku bilungi bia tiya kadi kwenda?” E kiuvu kiaki kilenda fila muntu mu badika diambu diadi.

11. (a) Aweyi tulenda sadisila muntu okwikilanga vo wantu awonso ambote ku zulu bekwenda? (b) Nkia ndekwa osadilanga muna mokena yo muntu okwikilanga vo wantu awonso ambote ku zulu bekwenda?

¹¹ Nona kia 3: Muna salu kieto kia umbangi tuwanane yo muntu okwikilanga vo wantu awonso ambote ku zulu bekwenda. E ngindu zazi zilenda soba mpila muntu kebakulwilanga o Nkand’a Nzambi. Kasikil’owu, avo tutangidi e sono kia Lusengomono 21:4, o muntu olenda yindula vo e tini kiaki zingu kia ku zulu kiyikanga. (Tanga.) Aweyi tulenda sadisila muntu una ye ngindu zazi? Vana fulu kia sadila sono yayingi, tulenda sia e sungididi muna nlonga uvovele vo “o lufwa, ke lukala diaka ko” muna Lusengomono 21:4. Olenda yuvula muntu: “Nga kukwikidi ko vo e diambu muna lembi kala diaka disongele vo diakala kala?” Nanga olenda vutula vo ingeta. I bosi, tulenda vova vo kuna zulu ke kuna lufwa ko. Va ntoto kaka vefwanga o wantu. Muna kuma kiaki, tulenda vova vo e nsambu ziyikwanga muna Lusengomono 21:4 vava ntoto zikala.—Nku. 37:29.

12. Ekuma Yesu kasadilanga e nona?

¹² Vana ntandu a sadila yuvu, Yesu wasadilanga mpe nona muna salu kiandi kia umbangi. (Tanga Matai 13:34, 35.) E nona yayi yasadisanga Yesu mu zaya kana vo awana kalonganga bakala kikilu ye luzolo lwa sadila Yave. (Mat. 13:10-15) Yesu wasadilanga mpe nona muna sadisa wantu basungamena mana kalonganga yo kala y’etima dia wá mana kavovanga. Aweyi tulenda sadila nona vava tulonganga?

13. Nkia nona tulenda sadila mu songa vo Nzambi osundidi Yesu?

¹³ Diambote twasadilanga nona yaleboka. Kasikil’owu, avo tuzolele sasila kwa muntu vo Nzambi osundidi Yesu, tulenda sadila nona eki: Nzambi yo Yesu batezanesa e ngwizani bena yau ye ngwizani a Se yo Mwana. (Luka 3:21, 22; Yoa. 14:28) I bosi tulenda yuvula muntu vo: “Vana vena esi nzo, akinani olenda yikila vo bafwanana?” O muntu olenda vutula vo mapasa. I bosi tulenda vova vo: “Nona kiambote. Wau vo yeto tulenda sadila nona kiaki, ekuma Yesu una vo i Nlongi Anene kalembi sadila nona kiaki? Kansi, Yesu wavova vo Nzambi i Se diandi. Muna mpila yayi, Yesu watusadisa mu badikila Nzambi nze ona unsundidi e wisa.”

14. Nkia nona kisonganga vo Nzambi kalendi sadila Nkadi ampemba ko mu tumba wantu kuna bilungi?

¹⁴ Yambula twabadika nona kiankaka. Akaka bekwikilanga vo Nzambi wavana wisa kia bilungi kwa Satana. Aweyi tulenda sadisila se yovo ngudi kabakula vo Nzambi kalendi sadila Nkadi ampemba ko mu bangika wantu kuna bilungi? Tulenda vova vo: “Adieyi olenda vanga avo mwan’aku okitukidi se nkolami yo vanga mambu mayingi mambi?” O se nanga  olenda vova vo osingika mwan’andi. Olenda teza sadisa mwan’andi nkumbu miayingi kimana kayambula fu yambi. (Nga. 22:15) Tulenda kunyuvula vo: “Adieyi ovanga kele vo mwana kazolele soba ko?” Mase mayingi balenda vova vo kafwete tumbwa. I bosi tulenda yuvula vo: “Adieyi tuvova kele vo obakwidi vo muntu ambi ovukumunanga mwan’aku?” Ka lukatikisu ko vo ofungila muntu ndioyo makasi. Muna toma kiesesa nona kiaki tulenda yuvula vo: “Wau ozeye vo muntu ambi ovukumunanga mwan’aku, nga olenda lomba kwa muntu ndioyo katumba o mwan’aku?” Ka lukatikisu ko, ovutula vo ve. Satana mosi mun’awana bevukumunanga wantu mu vanga mambu mambi.

15, 16. (a) Ekuma ka tufwete vavila ko vo awonso tusamunwinanga e nsangu zambote batambulwila e nsangu za Kintinu? (b) Nga muna kala nlongi ambote ofwete kala ye ngangu zayingi? Sasila. (Tala e babu kina yo ntu a diambu  “Sadilwa Kilenda Kutusadisa mu Vana e Mvutu.”)

¹⁵ Dialudi vo kana nkutu vo tusadidi yuvu yambote, toma sasila e sono yo sadila nona yambote, ke wantu awonso ko tusilanga umbangi betambulwila nsangu za Kintinu. (Mat. 10:11-14) Kana una vo Yesu i nlongi Anene wazinga kala ova ntoto, wantu akete kaka batambulwila e nsangu kasamunanga.—Yoa. 6:66; 7:45-48.

¹⁶ Adieyi tuvova avo tukuyibadikilanga vo ke tuna ye ngangu zayingi ko muna kala alongi ambote? Kana una vo i wau, tulenda samuna nsangu zambote una ufwene. (Tanga Mavangu 4:13.) Nkand’a Nzambi ukutuvananga kuma kiasikila mu kwikila vo awonso ‘basidi o moyo a mvu ya mvu etima’ betambuwila e nsangu zambote. (Mav. 13:48) Muna kuma kiaki, yambula twakalanga ye ngindu zasikila mu mpila tukuyibadikilanga ye una tubadikilanga awana tusamunwinanga e nsangu zambote za Kintinu. Avo tusadila malongi kekutuvananga o Yave, tukala alongi ambote, tubaka nluta kumosi y’awana bekutuwanga. (1 Tim. 4:16) Yave olenda kutusadisa mu zaya una tulenda ‘vutulwila konso muntu.’ Mun’elongi dilanda tuzaya una tulenda lungisila salu kieto kia umbangi una ufwene muna lemvokelanga nkanikinu a Yesu usonganga mpila tufwete kadilanga y’akaka.