1, 2. (a) Adieyi Yesu kavova mu kuma kia lumbu yambaninu? (b) Nkia yuvu tubadika?

YINDULA Yesu ovuenda vana Mongo a Olive, mu tala kena tempelo kuna Yerusaleme. Vamosi kena ye alongoki andi ayá, Petelo, Andere, Yakobo ye Yoane. Besianga sungididi kwa Yesu ekolo kekubazayisanga ye kiese kiawonso ungunza ulungana kuna sentu. O ungunza usonganga mana mevangama mu lumbu yambaninu ya nza yayi yambi vava Yesu kadi yala muna Kintinu kia Nzambi. Yesu wabazayisa vo muna lumbu yambaninu o ‘ntaudi andi akwikizi yo lulungalalu’ okunsunzula ova ntoto yo vana madia ma mwanda kwa alongoki andi muna ntangwa ifwene.—Matai 24:45-47.

² I bosi, muna ungunza wau mosi Yesu watá kingana kia ndumba kumi. (Tanga Matai 25:1-13.) Mu longi diadi, tubadika yuvu eyi: (1) Nkia longi dina muna kingana  kiaki? (2) Aweyi akuswa besadilanga longi dina muna kingana kiaki? Nkia nluta dikubatwasilanga (3) Aweyi konso muntu mu yeto kalenda vuila nluta muna kingana kia Yesu o unu?

3. Mu mvu miavioka, aweyi nkanda mieto miasasilanga e kingana kia Yesu kia ndumba kumi? Adieyi diavilakanuanga?

³ Muna longi diviokele, twalongokele vo mu mvu miami, o ntaudi akwikizi otomesanga e mpila ya sasila tusansu twa Nkand’a Nzambi. O unu o ntaudi akwikizi otoma sianga sungididi mu dina tulenda longoka, ke mu nsas’a ungunza ko. Kasikil’owu, badika kingana kia Yesu kia ndumba kumi. Mu mvu miavioka e nkanda mieto miavovanga vo e mini, mazi ye natinwa, lekwa yovo muntu kiasunzulanga. Nga o sia e sungididi mu mambu makete-kete diafilanga mu vilakana longi diamfunu dina muna kingana? E mvutu za kiuvu kiaki zamfunu kikilu.

4. Muna kingana kiaki, aweyi tuzayidi kana (a) ani i toko diansompi? (b) Aki nani i ndumba kumi?

⁴ Yambula twabadika e mbut’a diambu dina muna kingana kia Yesu. Entete yindula wantu beyikwanga muna kingana kia ndumba kumi. Nani i toko diansompi? Yesu. Tuzeye wo kadi vitila katá kingana kiaki, Yesu yandi kibeni wakiyikila vo toko diansompi. (Luka 5:34, 35) Aki nani i ndumba kumi? I “finkambi-kambi” fia Akristu akuswa. Aweyi tuzayidi wo? Muna kingana, e ndumba bafwete kala bakubama ye mini yau yakwama vava toko diansompi kekwiza. Tala dina Yesu kavovesa alandi andi akuswa: “Se nukamina nlele mieno muna tuketo, e mini yeno yakwamanga; nukalanga nze wantu betalanga mfumu au, vava ketuka kuna nkinzi a longo.” (Luka 12:32, 35, 36) Vana ntandu, Paulu wa ntumwa ye Yoane wa ntumwa batezanesa alandi a Kristu akuswa ye ndumb’a mwenze. (2 Korinto 11:2; Lusengomono 14:4) Muna kuma kiaki, tulenda bakula vo o luludiku ye lulukisu luna muna Matai 25:1-13 kwa alandi a Yesu akuswa luvewanga.

5. Aweyi Yesu kasengomwena e ntangwa ye kolo kilungana kingana kiandi?

⁵ O luludiku lwa Yesu nkia ntangwa ye kolo luyikanga? Dina Yesu kavova kuna mfoko a kingana dikutusadisanga mu zaya e mvutu. Wavova vo: “O nsompi olueke.” (Matai 25:10) Muna Eyingidilu dia 15 Yuli a mvu wa 2013, twalongokele vo ungunza wa Yesu muna Matai kapu kia 24 ye 25 nkumbu nana uyikanga “ngiza” a  Yesu. Vava Yesu kayika e ngiz’andi, wavovela e kolo kia “mpasi zayingi” vava kekwiza fundisa yo fwasa e nza yayi yambi. Muna kuma kiaki, tulenda vova vo e kingana kia Yesu lumbu yambaninu kiyikanga, kansi osinga ‘kwiza’ muna kolo kia mpasi zayingi.

6. Nkia mbut’a diambu tulongokele muna kingana kia Yesu?

⁶ Nkia mbut’a diambu tulongokele muna kingana kiaki? Sungamena dina divovelwanga mu lusansu lwalu lwa Nkand’a Nzambi. Muna Matai kapu kia 24, Yesu wavovela “ntaudi akwikizi yo lulungalalu.” E ntaudi ndioyo i buka kiakete kia akuswa ana bevita o ntu vana vena alandi a Kristu mu lumbu yambaninu. Yesu walukisa wantu awaya vo bakwamanana songa kwikizi. Muna kapu kia 25, Yesu wasadila kingana kia ndumba kumi mu vana luludiku kwa alandi andi awonso akuswa mu lumbu yambaninu. Wabavovesa vo bakwamanana ‘yingila’ kimana balembi vidisa o nsendo au wa kwenda zingila kuna zulu. (Matai 25:13) Owau, yambula twafimpa kingana kiaki yo zaya una akuswa besadilanga luludiku lwalu.

7, 8. (a) weyi ndumba za ngangu bakadila bakubama? (b) Aweyi akuswa benena bakubama?

⁷ Muna kingana, Yesu wakiesesa vo nswaswani ye ndumba za mazowa, e ndumba za ngangu bakubama bakala vava toko diansompi kalwaka. Ekuma? E kuma kadi bayingilanga. Diavavanga vo e ndumba kumi bakwamanana yingila ye mini yau yakwama mu fuku wawonso. Nswaswani ye ndumba tanu za mazowa, e ndumba tanu za ngangu bakubama bakala kadi basumba mazi mafwana mu kuma kia mini yau. Aweyi Akristu akuswa bekubamenanga mu kuma kia ngiz’a Yesu?

⁸ Akristu akuswa bakubama bena mu lungisa kiyekwa kiau yakuna mbaninu. Bazeye wo vo muna sala e salu kia Nzambi, divavanga vo babembola mavua ye zingu kiambote kia nza yayi ya Satana. Bakubama kikilu bena mu vanga wo. Bena y’etima dia sadila Yave ye kwikizi kiawonso, ke mu kuma kia mbaninu ko ifinamene, kansi, mu kuma kia zola bena kwau muna yandi ye muna Mwan’andi. Bekwamanananga songa kwikizi, ke beyambulanga ko vo basambukilwa kwa fu yambi ya nza yayi, nze loko dia vuama ye mavangu ma zumba. Nze ndumba za ngangu ana bakala bakubama ye mini yau, akuswa bekwamanananga kezima, ekolo bevingilanga kuna luzindalalu lwawonso e ngiz’a toko diansompi, kana nkutu dilenda moneka vo mu zingila kena.—Filipi 2:15.

9. (a) kia lulukisu Yesu kavana mu kuma kia leka tulu? (b) Adieyi akuswa bevanganga vava bewanga e kazu vo “Tala nsompi?” (Tala mpe mvovo vana yanda.)

 ⁹ E ndumba za ngangu bakubama mpe bakala muna ngiz’a toko diansompi kadi bayingilanga. Kansi muna kingana, e ndumba kumi zawonso ‘batonza yo leka’ ekolo bavingilanga e toko diansompi ona wamonekenanga vo zingila kwayingi kazingilanga. Kansi, nga Akristu akuswa o unu balenda mpe ‘leka tulu,’ i sia vo, fwa e diya ekolo bevingilanga e ngiz’a Kristu? Elo. Yesu wazaya wo vo kana nkutu muntu una ye luzolo lwa vingila olenda yoya yo fwa e diya ekolo ­kevingilanga ngiz’andi. Muna kuma kiaki, Akristu ­akuswa bevanganga mawonso balenda mu kwamanana yingila. Mu nkia mpila? Muna kingana, e ndumba kumi bawá e kazu oku vo: “Tala nsompi!” Kansi, ndumba za ngangu kaka bakwamanana yingila. (Matai 25:5, 6; 26:41) Diau dimosi, omu lumbu yayi yambaninu, Akristu akuswa bewanga e kazu oku vo: “Tala nsompi!” Betambulwilanga e ziku kisonganga vo ke kolo ko Yesu okwiza ye bakubama kikilu bena mu kuma kia ngiz’andi. * Yambula twabadika e mfoko a kingana kia Yesu eki kiyikanga kolo kiasikididi.

10. Adieyi tufwete kiyuvula mu kuma kia mbokena vana vena ndumba za ngangu ye ndumba za mazowa?

¹⁰ Kuna mfoko a kingana, e ndumba za mazowa balomba kwa ndumba za ngangu vo babavana mazi basia muna mini yau. Kansi, e ndumba za ngangu ke bazola kubasadisa ko. (Tanga Matai 25:8, 9.) Kansi, nkia ntangwa Akristu akuswa ke bazola sadisa muntu ko ona wavavanga lusadisu? Sungamena e ntangwa ye kolo kilungana e kingana kiaki. Yesu wa toko diansompi okwiza fundisa kuna mfoko a mpasi zayingi. Muna kuma kiaki, nanga e mbokena zazi zisonganga dina divangama vitila mfoko a kolo kia mpasi zayingi. Ekuma tuvovele wo? E kuma kadi muna kolo kiakina akuswa bekuyisilwa kala e dimbu kiansuka.

11. (a) dieyi divangama vitila mpasi zayingi zayantika? (b) Adieyi ndumba za ngangu bazola vova vava bavovesa ndumba za mazowa vo benda sumba mazi?

¹¹ Ozevo, vitila e mpasi zayingi zayantika, Akristu akuswa awonso akwa kwiziki ana bekala ova ntoto, bekuyisilwa e dimbu kiansuka. (Lusengomono 7:1-4) Muna kolo kiakina, ke vekala diaka ye lukatikisu ko vo ku zulu bekwenda. Kansi, yindula e kolo kivitila e mpasi zayingi. Adieyi dibwila Akristu akuswa ana bayambula yingila yovo songa kwikizi? Ke besiwa dimbu kia nsuka ko. Muna kolo kiakina, Akristu ankaka akwikizi bekuswa muna mwanda mu vingiswa vana fulu kiau. Vava e mpasi zayingi ziyantika, e ndumba za  mazowa bekendalala vava bemona lufwasu lwa Babele Anene. Muna kolo kiakina kaka bebakula vo ke bakubama ko mu kuma kia ngiz’a Yesu. Muna ntangwa yiyina, adieyi divangama vava belomba lusadisu? E mvutu zina mu kingana kiaki. E ndumba za ngangu ke bazola vana mazi mau ko kwa ndumba za mazowa, kansi babavovesa vo benda sumba mazi. Wau vo mu ola ya “dingi-dingi,” ke vekala muntu ko wadi kubatekela mazi. E ntangwa yakiviokela!

12. (a) Muna kolo kia mpasi zayingi, nga akuswa ana bayambula songa kwikizi vitila basiwa dimbu kia nsuka? (b) Adieyi dibwila awana bena nze ndumba za mazowa?

¹² Muna kolo kia mpasi zayingi, Akristu akuswa akwa kwikizi ke besadisa konso muntu ko ona wayambula songa kwikizi. E ntangwa ya kubasadisa ke ikala diaka ko. Ozevo, adieyi dibwila ana bayambula songa kwikizi? Badika dina diabwila ndumba za mazowa ana ke basumba mazi ko. Tutanganga vo: “O nsompi olueke; ana bakubama bakotele yandi kuna nkinzi: e kielo kizikamene.” Vava Yesu kekwiza muna nkembo andi kuna mfoko a mpasi zayingi, onata Akristu akuswa akwa kwikizi kuna zulu. (Matai 24:31; 25:10; Yoane 14:1-3; 1 Tesalonika 4:17) Kansi, Yesu obembola ana bayambula songa kwikizi. Nze ndumba za mazowa, nanga bevova vo: “E mfumu, e mfumu, utuziulwila.” Nkia mvutu kekubavana o Yesu? Diankenda kikilu kadi okubavovesa nze una kevovesa awana bena nze nkombo: “Kieleka inusamunwini vo, kinuzeye kwame ko.”—Matai 7:21-23; 25:11, 12.

13. (a) Ekuma ke tufwete banzila ko vo Akristu akuswa ayingi beyambula songa kwikizi? (b) Ekuma tulenda vovela vo kingana kia Yesu kisonganga e vuvu kakala kiau muna Akristu akuswa? (Tala fwaniswa kuna lubantiku lwa longi.)

¹³ Nga Yesu edi kavova vo akuswa ayingi beyambula songa kwikizi yo vava vo bavingiswa? Ve. Muna Matai kapu kia 24 tutanganga vo Yesu walukisa ntaudi akwikizi yo lulungalalu kalembi kituka ntaudi ambi. Ediadi ke disongele ko vo i diau kavingilanga vo diavangama. Diau dimosi, e kingana kia ndumba kumi kina se lulukisu. Nze una vakadila ye ndumba tanu za mazowa ye ndumba tanu za ngangu, konso Nkristu akuswa kafwete sola kala wakubama yo yingila. Avo ke wau ko, olenda kituka zowa yo yambula songa kwikizi. Paulu lulukisu lwau lumosi kavana kwa mpangi zandi akuswa. (Tanga Ayibere 6:4-9; tezanesa ye Nsiku 30:19.) Kana una vo lulukisu lwasikididi kabavana, wakala mpe ye vuvu vo mpangi zandi besinga tambula nsendo au. O lulukisu luna muna kingana kia ndumba kumi, lusonganga vo Yesu vuvu kiaki mpe kakala kiau muna Akristu akuswa. Ozeye wo vo konso Nkristu akuswa olenda sikila ye kwikizi yo tambula nsendo kuna zulu.

14. Ekuma “mameme makaka” balenda mpe vuila nluta muna kingana kia ndumba kumi?

 ¹⁴ Muna kingana kiaki, Yesu Akristu akuswa kayika. Kana una vo i wau, nga “mameme makaka” balenda mpe vwa nluta muna kingana kia Yesu? (Yoane 10:16) Elo. E longi dina muna kingana kiaki i diadi: ‘Kwamanana yingila.’ Lumbu kimosi Yesu wavova vo: “Owu inuvovese, kw’awonso mpovele wo, Nuyingila.” (Maku 13:37) Edi Yesu kevavanga vo alongoki andi awonso bakala bakubama yo kwamanana yingila. Akristu awonso balenda kwau tanginina e mbandu ambote ya Akristu akuswa, ana besianga e salu kia umbangi vana fulu kiantete muna zingu kiau. Sungamena vo e ndumba za mazowa balomba mazi kwa ndumba za ngangu. E ndomb’au ke yalungiswa ko. Ediadi dikutusungamesanga vo yeto kibeni tufwete sola kana vo tusikila ye kwikizi muna Nzambi, kala twakubama yo kwamanana yingila. Ke muntu ko olenda wo vanga vana fulu kieto. Yeto awonso mbalu tutá kwa Yesu Kristu wa Mfundisi ansongi, ona okwiza ke kolo ko. Muna kuma kiaki, tufwete kala twakubama.

15. Ekuma Akristu awonso bevingidilanga ye kiese kiawonso e longo lwa Kristu yo nzitikil’andi?

¹⁵ Akristu awonso bevingilanga ye kiese kiawonso e longo luyikwanga muna kingana kia Yesu. Kuna sentu, vava kivioka e vita ya Armangedo, Akristu akuswa bekituka se nkaz’a Kristu. (Lusengomono 19:7-9) Awonso bezingila ova ntoto bevua nluta mia longo lwalu lukala kuna zulu. Ekuma? Kadi longo lwalu lutwasa luyalu lwa lunga kwa wantu awonso. Kiakala vo vuvu kia kwenda kuna zulu tuna kiau yovo kia zingila ova ntoto, yambula yeto awonso twakala twakubama yo kwamanana yingila. Avo tuvangidi wo, tuvua nsambu zina Yave katusila nsilu.