1, 2. Nkia fu besonganga selo ya Yave?

SELO ya Yave bevingilanga kuna luzindalalu lwawonso e ndungan’a nsilu mina ke mialungane ko. Kasikil’owu, Yeremiya wavingilanga e ntangwa ina esi Babele badi fwasa Yuda, i diau kikilu diavangama muna mvu wa 607 Vitila Tandu Kieto. (Yeremiya 25:8-11) Yesaya wasakula vo Yave wadi vutulwisa Ayuda ana bakala mu kinkole kuna Yuda, wavova vo: ‘Akwa kiese ana bekumvingilanga.’ (Yesaya 30:18) Mika mpe wavingilanga e ndungan’a nsilu mia Yave. Wavova vo: Vo i mono “ntala kwa Yave.” (Mika 7:7) Mu mvu miayingi, selo ya Nzambi bakala ye ziku vo Masia yovo Kristu kwiza kekwiza.—Luka 3:15; 1 Petelo 1:10-12. *

² Oyeto mpe o unu, tuvingilanga e ndungan’a ungunza mu kuma kia Kintinu kia Yave. Wau vo Yesu i Ntinu a Kintinu kiaki, ke kolo ko ovuluza selo ya Nzambi mu nza yayi yambi. Ofwasa wantu awonso ambi yo fokola e mpasi zawonso.  (1 Yoane 5:19) Muna kuma kiaki, tufwete kwamanana vingila e lumbu kia Yave kadi kilenda kwiza konso ntangwa. Tuvanga mawonso tulenda kimana twakala twakubama vava e lumbu kiaki kilwaka.

3. Avo se kolo tuvingilanga e mbaninu, adieyi tulenda kiyuvula?

³ Tuvingilanga ye kiese kiawonso e ntangwa ina luzolo lwa Nzambi luvangama ova ntoto. (Matai 6:10) Kansi, avo se kolo kiayingi tuvingilanga e mbaninu, tulenda kiyuvula vo: ‘Ekuma tufwete kwamanena kadila ye vuvu vo e mbaninu ikwiza ke kolo ko?’

4. Ekuma tufwete ‘kwamanena yingila’?

⁴ Yesu wakanikina alongoki andi vo ‘bayingila.’ Ekiaki i kuma tufwete kwamanena kadila ye vuvu vo e mbaninu ikwiza ke kolo ko. (Matai 24:42; Luka 21:34-36) E nkubik’a Yave mpe ikwamanananga kutulukisa vo ‘twasiang’e vuvu yo sutilang’e ngiz’a lumbu kia Nzambi’ yo sia e sungididi muna nsilu a Yave wa nz’ampa.—Tanga 2 Petelo 3:11-13.

5. Nkia kuma kiankaka tuna kiau mu kwamanana vingila e lumbu kia Yave?

⁵ Wau vo muna tandu kiantete diavavanga vo alongoki a Yesu bavingila e lumbu kia Yave, ediadi disongele vo yeto mpe o unu tufwete luta wo vanga. Ekuma? E kuma kadi e sinsu kina Yesu kayika kisonganga e ziku vo wayantika yala se Ntinu muna Kintinu kia Nzambi muna mvu wa 1914. Kisonganga mpe vo mu lumbu yambaninu tuzingilanga yovo ku “mbaninu a tandu” kiaki. Kasikil’owu, nze una Yesu kasakula, e mpasi ova nza mu wokela kaka zina, e nsangu zambote za Kintinu mu samunwa zina mu nza yawonso. (Matai 24:3, 7-14) Yesu kavova ko kana kolo kwa izingila e lumbu yambaninu, ekiaki i kuma tufwete kadila twakubama kadi e mbaninu ilenda lwaka konso ntangwa.

6. Aweyi tuzayidi wo vo e mpasi ova nza wokela kaka ziwokela ekolo e mbaninu ifinamanga?

⁶ Nga e “mbaninu a tandu” i kolo kina umpumbulu usinga wokela kwayingi ova nza? Nkand’a Nzambi uvovanga vo “muna lumbu yambaninu,” wantu bekituka wantu ambi kikilu. (2 Timoteo 3:1, 13; Matai 24:21; Lusengomono 12:12) Muna kuma kiaki, kana una vo e zingu kiampasi kina o unu, tuzeye wo vo e mpasi zikwamanana wokela.

7. Adieyi tulongokele muna Matai 24:37-39 mu kuma kia una ukala e zingu ova nza mu lumbu yambaninu?

⁷ Akaka balenda yindula vo vitila e “mpasi zayingi” zayantika, vita zikala muna nsi zawonso ye wantu ayingi beyela yovo fwa e nzala. (Lusengomono 7:14) Kansi, avo diadi divangamene, wantu awonso bezaya wo vo ungunza wa Nkand’a Nzambi mu lungana wina. Ediadi ditoma moneka kana nkutu kw’awana ke besianga sungididi ko mu dina Nkand’a Nzambi uvovanga. Sungamena dio vo Yesu wavova vo muna lumbu yambaninu, wantu ayingi ‘ke bezaya wo ko.’ Bekuyivana muna mambu ma zingu kia lumbu ke lumbu yo sivika vava lumbu kia Yave kikwiza. (Tanga Matai 24:37-39.) Muna kuma kiaki, ke tufwete vingila ko vo e mpasi ova nza zavioka e tezo vitila e kolo kia “mpasi zayingi” kiayantika kimana wantu bakwikila vo e mbaninu ifinamene.—Luka 17:20; 2 Petelo 3:3, 4.

8. Wau vo tusianga e sungididi muna sinsu kavana o Yesu, nkia ziku tuna kiau?

 ⁸ Yesu wavana alandi andi e sinsu mu kubalukisa mu kuma kia kolo kina bezingila. Alongoki a Yesu ke beyambulanga yingila ko. (Matai 24:27, 42) Tuka muna mvu wa 1914, mambu mayingi mena muna sinsu kayika o Yesu mu lungana mena. Tuna kikilu ye ziku vo mu lumbu yambaninu tuzingilanga, i sia vo, “mbaninu a tandu” kiaki. Yave wasikidisa kala e lumbu kesinga fwasa e nza yayi yambi iyalwanga kwa Satana.

9. Ekuma tufwete kwamanena kadila ye vuvu vo e mbaninu ikwiza ke kolo ko?

⁹ Kansi, ekuma tufwete kwamanena kadila ye vuvu vo e mbaninu ikwiza ke kolo ko? E kuma kadi Yesu Kristu tulemvokelanga. Tumonanga mpe vo e sinsu kina Yesu kayika mu kuma kia lumbu ya mbaninu mu lungana kina. Tukwikilanga vo e mbaninu ifinamene, ke mu kuma kia sia ko vo tubundanga e vuvu mu mawonso tuwanga, kansi mu kuma kia sia vo tuna ye ziku vo ungunza wa Nkand’a Nzambi mu lungana una. Tufwete yingila yo kala wakubama vava mbaninu ikwiza.

10, 11. (a) Ekuma Yesu kavovesela alongoki andi vo ‘bayingila’? (b) Adieyi Yesu kavovesa alongoki andi mu vanga avo e mbaninu ke yizidi ko nze una bavingilanga? (Tala e fwaniswa kuna lubantiku lwa longi.)

¹⁰ Ayingi muna yeto se kolo tusambilanga Yave ye kwikizi kiawonso yo vingila e ngiz’a lumbu kiandi. Kiakala vo se kolo tuvingilanga, tufwete kwamanana vingila e ngiz’a lumbu kiaki. Tufwete kala twakubama vava Yesu kekwiza fwasa e nza ya Satana. Sungamena dina Yesu kavovesa alongoki andi vo bavanga: “Nutoma tala, nuyingila yo samba: kadi ke nuzeye yo ko, e ntangwa. Diau adimosi yo muntu una muna nsi akaka, on’ovwidi sisa nzo andi, yo vana ntaudi zandi e wisa, konso muntu e salu kiandi, yo kanikina nemavitu kayingila. Dianu vo, nuyingila: kadi ke nuzeye yo ko, e ntangwa ikwiz’e mfumu a nzo, kana masika, ovo’dingidingi, ovo nsusu antete, ovo mene-mene; unkwa kwizila kuna kinsalukisa, kanuwana ku nsi a tulu. Owu inuvovese, kw’awonso mpovele wo, Nuyingila.”—Maku 13:33-37.

¹¹ Vava alongoki a Yesu babakula vo Yesu wayantika yala muna mvu wa 1914, bazaya wo vo e mbaninu ilenda kwiza konso ntangwa. Muna kuma kiaki, bakubama mu kuma kia lumbu kiaki muna kuyivana emvimba muna salu kia samuna e nsangu zambote. Yesu wavova vo olenda kwiza mu “nsusu antete, ovo mene-mene.” Avo ediadi divangamene, adieyi alongoki andi bafwete vanga? Yesu wavova vo: “Nuyingila.” Kansi kana nkutu vo se kolo kiayingi tuvingilanga, ediadi ke disongele ko vo e mbaninu kwandá ina yovo ke ikwiza ko ekolo yeto twakinu moyo.

12. Adieyi Kabakuke kayuvula kwa Yave? Nkia mvutu kamvana o Nzambi?

 ¹² Kabakuke wa ngunza wavingila kuna luzindalalu lwawonso ekolo kasamunanga e nsangu za lufwasu lwa Yerusaleme. Ngunza zankaka ana bazinga vitila yandi, basamuna mpe nsangu zazi mu mvu miayingi. Kabakuke wamona una umpumbulu yo kondwa kwa unsongi kwawokelelanga lutila mvu miavioka. Wasamba kwa Yave mu lomba lusadisu, wayuvula vo: “E Yave nkia kolo mboka”? Kana una vo Yave kavova ko e ntangwa yadi kwiza e mbaninu, wasia nsilu kwa Kabakuke vo: “Ke kivekama ko.” Yave wavovesa mpe Kabakuke vo “vingila kio.”—Tanga Kabakuke 1:1-4; 2:3.

13. Adieyi kafwana yindula o Kabakuke? Ekuma e ngindu zazi zadi kadila za vonza?

¹³ Yindula kele vo Kabakuke wayambula vingila e mbaninu yo vova vo: ‘Se kolo kiayingi ivingilanga lufwasu lwa Yerusaleme. E mbaninu ke ikwiza wau ko. Ke dina kwandi mfunu ko yakwamanana samuna e nsangu za lufwasu lwa mbanza yayi. Akaka balenda sala e salu kiaki.’ Adieyi diadi bwa kele vo kakala ye ngindu zazi? Wadi vidisa e dienga dia Yave. Kele vo kakadi wakubama ko vava mbaninu yayiza, wadi vidisa moyo andi.

14. Ekuma tuvutulwila matondo kwa Yave wau katulukisa mu kwamanana vingila e mbaninu?

¹⁴ Yindula vo mu nz’ampa wina. Mawonso masakulwa mu kuma kia lumbu ya mbaninu malungane nze una Yave kavova. E vuvu kiaku muna Yave kiwokele, una ye ziku vo olungisa mawonso kasila o nsilu. (Tanga Yosua 23:14.) Ovutwidi matondo kwa Yave wau kasikidisa ntangwa yambote ya twasa e mbaninu yo lukisa nkangu andi mu kwamanana yingila.—Mavangu 1:7; 1 Petelo 4:7.

15, 16. Ekuma tufwete vangila mawonso tulenda mu samuna e nsangu zambote mu lumbu yayi yambaninu?

¹⁵ E nkubik’a Yave ikwamanana kutusungamesa o mfunu wa sia e salu kia Yave vana fulu kiantete muna zingu kieto. Ediadi ke dikutusadisanga kaka ko mu kuyivana muna salu kia Nzambi, kansi mu bakula mpe vo e nsangu tusamunanga za nzaki. Tuna ye ziku vo e sinsu kayika o Yesu mu lungana kina mu lumbu yeto ye ke kolo ko e mbaninu ikwiza. Muna kuma kiaki,  tusianga Yave vana fulu kiantete muna zingu kieto yo kwamanana samuna e nsangu zambote za Kintinu.—Matai 6:33; Maku 13:10.

¹⁶ Vava tusamunanga e nsangu zambote kw’akaka, tukubasadisanga kimana bavuluka vava e nza ya Satana ifwaswa ke kolo ko. Kimosi muna sumbula kiampwena kiavangama muna kalunga mu mvu wa 1945, i vava kiadimuka e nzaza yayikilwanga vo Wilhelm Gustloff. Mazunda ye mazunda ma wantu bafwa. Mpangi mosi ankento yo nkaz’andi bavuluka vava kiadimuka nzaza yayi. Osungamenanga vo kana nkutu vava e nzaza yadimukanga, nkento mosi wabokomokanga ye dilu vo: “Ekwe nkutu zame, ekwe nkutu zame!” Ekwe nsanga miame mia wolo! Miawonso midimukini. E lekwa yame yawonso ivididi!” Kansi, akaka bakala muna nzaza babakula dina diasunda o mfunu ye bavanga wawonso mu vuluza mioyo mia wantu. O unu, e mioyo mia wantu mu vonza mina. Yeto mpe tufwete tanginina e mbandu a wantu awaya yo sia sungididi muna salu kia samuna e nsangu zambote. Tufwete vanga mawonso tulenda mu sadisa wantu bavuluka vava kifwaswa e nza yayi.

17. Ekuma tufwete kadila ye ziku vo e mbaninu ilenda kwiza konso ntangwa?

¹⁷ Tumonanga kikilu e ziku vo ungunza wa Nkand’a Nzambi mu lungana wina, e mbaninu ya nza  yayi yambi ifinamene kikilu. Tuvingilanga e ntangwa ina ‘mpaka kumi’ ye ‘bulu kiansisi’ befwasa Babele Anene, i sia vo, nsambila zawonso zaluvunu. (Lusengomono 17:16) Ka tufwete yindula ko vo ntangwa yayingi diaka isidi vitila diambu diadi diavangama. Ke tuvilakani ko vo Nzambi ‘osia muna ntima miau’ e ngindu za fwasa nsambila zaluvunu. Ediadi dilenda vangama mu nzaki zawonso ye konso ntangwa. (Lusengomono 17:17) E mbaninu a nza ya Satana ifinamene kikilu. Muna kuma kiaki, tufwete lemvokela lulukisu lwa Yesu vo: “Se nutomi kulunga-lunga kweno, e ntima mieno ke miazemboka yo mvunda yo wuyana yo lunzumbulu lua zingu kiaki, ke nwasalukiswa kwa lumbu kiakina, nz’esokolo.” (Luka 21:34, 35; Lusengomono 16:15) Yambula twakwamanana yingila yo kuyivana muna salu kia Yave yo kala ye vuvu vo ‘osadila ana bekumvingilanga.’—Yesaya 64:4.

18. Nkia kiuvu tubakila e mvutu muna longi dilanda?

¹⁸ Ekolo tuvingilanga e mbaninu a nza yayi yambi, tufwete lemvokela longi dia Yuda ona wavova vo: ‘Azolwa, wau nukuvangamesena muna lukwikilu lueno luavauka kikilu yo sambilanga muna mwand’avelela, nusikila muna zola kwa Nzambi, nusiang’e vuvu kia nkenda za Mfumu eto Yesu Kristu yamu moyo a mvu ya mvu.’ (Yuda 20, 21) Kansi, aweyi tulenda songela vo tuvingilanga e nz’ampa yo kuyibadikila nze vika sia vo tukotele kala muna nz’ampa? Tubadika diambu diadi muna longi dilanda.