E SALU kia umbangi tusalanga kiamfunu kikilu. Kansi, ke wantu awonso ko tusilanga umbangi bebakulanga o mfunu a salu kiaki. Kana nkutu awana beyangalelanga mana masonama muna Nkand’a Nzambi, ke bemonanga mfunu wa longoka Diambu dia Nzambi ko.

Badika nona kia Gavin. Wayendanga muna tukutakanu kuna Seka dia Kintinu. Kansi, kazolanga longoka Nkand’a Nzambi ko. Gavin wavova vo kazaya mayingi ko mu kuma kia Nkand’a Nzambi ye kazolanga ko vo akaka bazaya wo. Wonga kakala wau wa soba dibundu yovo wa vunwa. Adieyi obenze? Nga Gavin olenda sadiswa mu soba ngindu? Yindula e nluta kalenda vua o muntu muna wá malongi ma Nkand’a Nzambi. Yave wavova kwa Aneyisaele vo: “O mvovo ame ufukumuka nze kime, nze wanga vana yimbanzia.” (Nsiku 31:19, 30; 32:2) Yambula twavovela dina tulenda longoka mu kuma kia kime yovo dime yo tezanesa dio ye salu kieto kia umbangi kimana twazaya una tulenda sadisila “wantu a mpila zawonso.”—1 Timoteo 2:3, 4.

E kime kialembama kikalanga. E kime malembe-malembe kivangamanga ekolo e tembwa kianzizi kikitukanga se matonsi ma maza. Aweyi e mvovo mia Yave ‘miafukumukina nze kime’? Wavoveselanga nkangu andi kuna ngemba, lembama yo zola kwawonso. Tulenda tanginina Yave vava tuzitisanga mana wantu ankaka bekwikilanga. Tukubakasakesanga mu fimpa mana tukubalonganga yo yambula vo babak’e nzengo yau kibeni. Vava tusonganga e ngemba kwa wantu, balenda tambulwila mana tukubazayisanga. Muna mpila yayi, e salu kieto kia umbangi kitwasa nluta.

E kime vuvika kivuvikanga. Tuvuvikanga akaka muna salu kieto kia umbangi vava tuyindulanga e mpila zayingi tulenda kubasadisila mu zaya e ludi. Mpangi mosi una ye nkumbu Chris, ona walomba Gavin vo balongoka Nkand’a Nzambi, kankomekena ko kimana katambulwila. Kansi, wavava mpila zayingi kalenda sadisila Gavin mu yangalela mokena mambu ma Nkand’a Nzambi. Mpangi Chris wavovesa Gavin vo vena ye nsangu zamfunu muna Nkand’a Nzambi, avo olongokele nsangu zazi dikunsadisa mu toma bakula mana melongwanga muna tukutakanu. I bosi, mpangi Chris wanzayisa ungunza wa Nkand’a Nzambi una wankwikidisa vo Nkand’a Nzambi ludi uvovanga. Ediadi diaziula e nzila mu mokena mambu mayingi mesonganga una ungunza wau walunganena. E mbokena zazi zavuvika Gavin yo kumfila mu tambulwila longoka Nkand’a Nzambi.

E kime mfunu kina muna zingu kieto. Muna nsungi a mini miangolo kuna Isaele, ezak’e ntangwa ngonde zayingi ziviokanga lembi noka e mvula. Kele vo ke vakadi nzizi a kime ko, e nti miawonso miadi yuma. Yave wasakula vo mu lumbu yeto vekala ye mvengele, i sia vo, wantu bekala ye “nzal’a wa mambu ma Yave.” (Amose 8:11) Wasia nsilu vo Akristu akuswa bekala “nze dimè ditukidi kwa Yave,” ekolo besamunanga nsangu zambote za Kintinu yo yikamwa kwa “mameme makaka.” (Mika 5:7; Yoane 10:16) E nsangu tusamunanga dimosi muna nkubika kavanga o Yave mu vana moyo kw’awana bena ye nzala za zaya e ludi. Nga tuzayanga o mfunu a nsangu zazi?

E kime i nsambu za Yave. (Nsiku 33:13) E salu kieto kia umbangi kilenda kala se nsambu yovo lukau kw’awana betambulwilanga e nsangu tusamunanga. Dia nsambu diakala kwa Gavin wau kalongoka Nkand’a Nzambi, kadi diansadisa mu solola mvutu muna ulolo wa yuvu kakala yau. Wanungunuka muna mwanda yo vubwa. Owau, okalanga ye kiese kia samuna nsangu zambote za Kintinu kumosi yo nkaz’andi, Joyce.

O tezanesa e salu kia umbangi ye dimè dilenda mpe kutusadisa mu zaya vo e ngolo zina konso muntu mu yeto kevanganga muna salu kiaki mfunu zina. Mu nkia mpila? E tonsi dimosi dia maza ke dilendi vanga diambu ko, kansi avo matonsi mayingi, o ntoto ulenda yondalala. Diau dimosi, e salu tusalanga muna salu kia umbangi kilenda monekena vo kiakete kikilu. Kansi, vava ulolo wa selo ya Yave besalanga entwadi, tulenda sila umbangi “kwa zula yawonso.” (Matai 24:14) Nga e salu kieto kia umbangi kikila se nsambu za Yave kw’akaka? Elo, e nsangu tusamunanga zikala nze dimè, i sia vo, zalembama, za lufiaulwisu yo sadisa wantu mu vua moyo.