Nki i Kintinu kia Nzambi?

AWEYI i ntu a diambu w’elongi dia Yesu? Yandi kibeni Yesu wayikila dio vo, Kintinu kia Nzambi. (Luka 4:​43) Vava kalonganga, nkumbu miayingi nkangu bawa e mvovo wa Kintinu. Nga dia basivikisa? Nga banyuvula, nki i Kintinu? Ve. E kiuvu kiaki ke kina ko muna Nsangu Zambote zasoneka antumwa. Nga bakizayila oma ma Kintinu kia Nzambi?

Elo, e Kintinu kiaki kiasonama muna Sono yankulu ina Ayuda bayikilanga vo yavauka, yitoma songanga e nsas’a Kintinu ye dina kivanga. O unu mpe, tulenda zaya mayingi mu kuma kia Kintinu. Yambula twafimpa mambu nsambwadi kelonganga Nkand’a Nzambi, mu kuma kia Kintinu. Mambu matatu mantete mazayakana kw’Ayuda a nz’ankulu yamu lumbu ya Yesu. E matatu malende yandi kibeni Kristu ye ntumwa zandi balonga mo muna tandu kiantete. Edi diansuka mu tandu kieto diazayakana.

1. Kintinu kia Nzambi, luyalu lwakieleka, olu lusikila yakwele mvu. Ungunza wantete wa Nkand’a Nzambi usonganga vo Nzambi ofila nkûdi mu kûla akwikidi. Nkûdi ndioyo wayikilwa vo “mbongo,” osukisa mpasi zawonso zatwasa ukolami wa Adami, Eva yo Satana. (Etuku 3:​15) I bosi, Davidi wa Ntinu akwikizi wavoveswa diambu diakiese mu kuma kia “mbongo,” yovo Masia. Okituka se Ntinu a Kintinu. E Kintinu kiaki kiaswaswana ye tuyalu twawonso. Kisikila yakwele mvu.​—⁠2 Samuele 7:​12-14.

2. Kintinu kia Nzambi kifwasa tuyalu twawonso twa wantu. Daniele wa ngunza wamona ndandani za tuyalu twa ngolo twa nz’amvimba muna mona-meso, e tuyalu twatu tuyalanga yamu lumbu yeto. Tala mbaninu a kiese kamona muna mona-meso yayi: “Muna lumbu y’atinu awana, o Nzambi ezulu otongeka kintinu, kina ke kibangalakeswa ko yakwele mvu, ngatu vingilwa untinu wandi kwa nkangu akaka; kansi kikosomona yo sukisa yintinu yayi yawonso, kitongama mpe yakwele mvu.” Elo, yintinu yawonso yovo tuyalu twa nza yayi, kumosi ye vita zau, lubangamu ye umpuki, usukiswa yakwele mvu. Nze una usonganga ungunza wa  Daniele, Kintinu kia Nzambi ke kolo ko kiyala nza yawonso. (Daniele 2:​44, 45) Kieleka, Kintinu kiaki kaka kiyala nsema wawonso. *

3. Kintinu kia Nzambi kisukisa vita, mayela, nzala yo lufwa. Ungunza wa kiese wa Nkand’a Nzambi usonganga dina kivanga Kintinu kia Nzambi ova ntoto. Luyalu lwalu lusinga vanga mana e nkubika za wantu ke zilendanga vanga ko. Se badiki, e nkele miawonso mifwaswa yakwele mvu! “Osima vita yakuna nsuk’a nza.” (Nkunga 46:⁠9) Ke vekala diaka madotolo ko ye nzo za wukila yimbevo. O ntungi kevova ko vo: “Yela nyela.” (Yesaya 33:​24) E nzala ye mvengele ke mikala diaka ko. “O ulolo wa masa ukala muna nsi.” (Nkunga 72:​16) E salu kia zika mafwa, nkunga mia mafwa, ziami, nzo za nzizi za lundila mafwa ye ntantu zisuka emvimba. O lufwa luna vo i ntantu eto antete osukiswa emvimba. Nzambi “osinkisi fwa yakwele mvu; o Mfumu Yave okunguna mansanga muna ndose zawonso.”​—⁠Yesaya 25:⁠8.

4. E Ntinu a Kintinu kia Nzambi wasolwa kwa Nzambi. Masia ke yandi kibeni wakisola ko ngatu solwa kwa wantu alembi lunga. Yandi kibeni Yave wansola. E zina dia Masia ye dia Kristu ditoma songanga eziku kia diambu diadi. Mvovo miami miau miole misonganga vo “Kuswa.” Ozevo, e Ntinu solwa kasolwa kwa mfumu andi, Yave. Nzambi wavova mu kuma kiandi vo: “Tala ntaudi ame ona nsikidisa; wa nsolw’ame, muna ndion’o moyo ame umwenanga wete: omu yandi nsidi mwand’ame; ovaikisa unsongi kwa zula.” (Yesaya 42:1; Matai 12:​17, 18) Nani otomene zaya Ntinu ona tuvwidi mfunu avo ke Mvangi eto ko?

5. Ntinu a Kintinu kia Nzambi wasonga o zitu wandi vana ndose a wantu awonso. Yesu wa mwisi Nazarete wasonga e ziku vo yandi i Masia wasilw’o nsilu. Wawutukila muna luvila luna kasikidisa o Nzambi. (Etuku 22:18; 1 Tusansu 17:11; Matai 1:⁠1) Vava kakala ova ntoto, walungisa ungunza wayingi wasonama kuna nz’ankulu mu kuma kia Masia. Wasilwa mpe umbangi tuka kun’ezulu vo yandi i Masia. Mu nkia mpila? Tuka kun’ezulu, Nzambi wansunzula vo Mwan’andi; mbasi zasia umbangi vo Yesu i Masia ona wasilwa o nsilu. Yesu wavanga masivi mayingi vana ntenda a nkongolo. Awonso ana bamona masivi mandi batoma dio bakula vo mu nkuma Nzambi kavangila mo. * Yesu nkumbu miayingi kasonga e mpila Ntinu kekala. Kakala kaka ye nkuma wa sadisa wantu ko, kansi wakala mpe ye luzolo lwa vanga wo. (Matai 8:​1-3) Wasonga o zola, nkenda, unkabu ye lulembamu. Mawonso kavanga vava kakala ova ntoto masonama muna Nkand’a Nzambi kimana awonso batanganga mo.

6. Wantu 144.000 beyala kumosi yo Kristu muna Kintinu kia Nzambi. Yesu wasia nsilu kwa ntumwa zandi kumosi ye akaka vo kumosi beyala kun’ezulu. Wayikila e buka kiaki vo “finkambi-kambi.” (Luka 12:​32) I bosi, Yoane wa ntumwa wavoveswa vo lutangu lwa fikambi-kambi fiafi, 144.000. Salu kiamfunu besala kun’ezulu, beyala nze atinu ye sala kumosi yo Kristu se anganga.​—⁠Lusengomono 5:​9, 10; 14:​1, 3. 

7. Kintinu kia Nzambi kiyalanga kun’ezulu, ke kolo ko kiyala nza yawonso. E diambu diadi dia nsuka muna mambu nsambwadi, i ludi kiamfunu tulenda longoka. Nkand’a Nzambi utoma songanga e ziku vo Yesu wavewa e wisa se Ntinu kun’ezulu. Owau oyalanga, ke kolo ko oyala nza yawonso muna lungisa ungunza owu tulongokele. Kansi, aweyi tulenda kadila ye ziku vo Kintinu kia Nzambi mu yala kina owau? Nkia ntangwa kiyal’e nza yawonso?

y[Mvovo Vana Yand’a lukaya]