Nga Nzambi Otondanga e Nsambila Zawonso?

Mvutu zivewanga i zazi:

▪ “Mabundu mawonso nzila kwandi zaswaswana zifilanga wantu kwa Nzambi.”

▪ “Edi divavwanga, muntu kakala nkwa ziku, ke dina kekwikilanga ko.”

Yesu adieyi kavova?

▪ “Nukotela muna mwelo ambatakani: kadi o mwelo wasâdila, e nzila mpe yasanzuka, ina ya lubukumuku, engi bena, ana bekotela mo. Kadi o mwelo wambatakani, e nzila mpe yamfinangani, ina ya moyo, ke bengi ko ana besolola yo.” (Matai 7:13, 14) Yesu kakwikilanga ko vo mabundu mawonso nzila kwandi zaswaswana zifilanga wantu kwa Nzambi.

▪ “E lumbu kiakina, engi bekumpovesa vo, e Mfumu, e Mfumu, ke yeto ko twasakwila muna nkumbu aku, yo muna nkumbu aku twavaikisila nkwiya, yo muna nkumbu aku twavangila mavangu mayingi mankum’e? I bosi ikubakiesesela wo vo, kianuzaya nkutu ko: nukatuk’ova ngina, yeno avangi a umpumbulu.” (Matai 7:22, 23) Yesu ketondanga awonso ko bevovanga vo yandi belandanga.

ASAMBIDI ayingi belandanga tukwikilu ye tusansu twa yau kibeni. Kansi, adieyi divangamanga wau vo malongi mama ke mena ngwizani ko ye Nkand’a Nzambi? Yesu wasonga e vonza kina mu landa tusansu twa wantu, vava kavova kw’afidi a nsambila a lumbu yandi vo: “Oyeno mpe nuvwidi bololwel’e diambu dia Nzambi muna lusansu lueno.” I bosi kavova e mvovo miami mia Nzambi vo: “O nkangu wau ukunzitisila muna nua; vo i ntima miau, vavuka miampavuka. Nkund’ankatu bekunkundanga, wau vo, o malongi belonganga i nkanikinu mia wantu.”​—Matai 15:1-9; Yesaya 29:13.

Mavangu mpe mfunu mena, ka lukwikilu kaka ko. Nkand’a Nzambi uvovanga mu kuma ki’awana bevovanga vo Nzambi besambilanga: “Bekusanang’o zaya Nzambi; kansi muna mavangu mau nkalu bekumvananga.” (Tito 1:16) Kieleka, Nkand’a Nzambi uvovanga mu kuma ki’awana bezinganga mu lumbu yeto vo: “Azodi ekembo ke mu Nzambi ko; bena ye nsunsu za vumina Nzambi, kansi bakadidi wo, o nkuma: awana mpe ubavengomokena.”​—2 Timoteo 3:4, 5.

Mayingi mevavwanga, ke kala kaka nkwa ziku ko. Ekuma? E kuma kadi o muntu lenda kala ye ziku kia kivunina. O kala ye zayi wa ludi mu kuma kia Nzambi mfunu kwina. (Roma 10:2, 3) O vwa zayi wau yo zingila e ngwizani ye dina kevovanga Nkand’a Nzambi, dilenda kutusadisa mu vwa edienga dia Nzambi. (Matai 7:21) E nsambila aludi ivavanga vo twakala ye ngindu zansongi, lukwikilu lwansongi ye mavangu mansongi. Mavangu mansongi disongele vo wavanganga luzolo lwa Nzambi lumbu yawonso.​—1 Yoane 2:17.

Avo zolele zaya mayingi mu kuma kia dina divovanga Nkand’a Nzambi mu kuma kia Nzambi, mokena ye Mbangi za Yave kimana wavw’elongi dia ngovo dia Nkand’a Nzambi.

[Babu kia muna lukaya lwa 9]

E nsambila aludi ivavanga vo wakala ye ngindu zansongi, lukwikilu lwansongi ye mavangu mansongi