Nga Vena ye Muntu Okuvwanga Kieleka o Mfunu?

Nga wamona kala kinsona? Nga oyindulanga vo ke vena muntu ko olenda kusadisa ngatu bakula e mpasi zaku? Kana nkutu vo wantu bazeye zo, nanga olenda yindula vo ke bekuvwanga mfunu ko.

VAVA mpasi zibwanga, e zingu kieto kilenda kituka nze tembwa kekisinga suka ko. Ezak’e ntangwa, nanga tulenda yindula vo nsoki batukotele, e mpasi zeto zingi, ke tulenda zo zizidila ko. I diadi tuyindulanga vava tuvangwanga diambu ditulwekele ntima, vava tukendelekwanga yovo vava tubwilwanga sumbula kituvangwidi yovo bakama kimbevo kilembi sasuka ye makaka mpe. Nanga tulenda yindula vo ke vena muntu ko olenda kutusadisa yo dimbula e vuvu ye kiyuvula kana akweyi tulenda sololwela lufiaulwisu. Nga vena yo muntu okuvwanga kieleka o mfunu?

“O Nzambi a Fiauzi Wawonso” Mfunu Kekuvwanga

Nzambi oyikilwanga muna Nkand’a Nzambi vo, “Ese dia nkenda, wa Nzambi a fiauzi wawonso.” (2 Korinto 1:⁠3) Nzambi ona una ye nkumbu Yave, otomene wo zaya vo lufiaulwisu tuvwidi o mfunu. Nkand’a Nzambi mpila zayingi usadilanga mvovo “fiauzi” mu kutusonga vo Nzambi kezayanga kaka mpasi zeto ko, kansi una mpe y’ekani dia kutufiaulwisa. O zaya diambu diadi, difwete kutuvan’e ziku vo kana nkutu vo wantu akaka ke bemonanga ko yo bakula mpasi zeto, Yave wa Nzambi ozeye zo.

E ziku kia sia vo Yave ovwanga konso muntu o mfunu, kitoma kieseswanga muna Sono ya Nkand’a Nzambi. Tutanganga muna Nkand’a Nzambi vo: “O meso ma Yave mwawonso mena, matungununa wantu ambi yo wantu ambote.” (Ngana 15:⁠3) Diau adimosi mpe muna Yobi 34:21 tutanganga vo: “O meso mandi memona nzila za muntu, ye ngyenda zandi zawonso.” Yave ozeye mawonso mu kuma kieto, makala mambote yovo mambi, ozeye dina kalenda vanga muna wete dieto. E ziku kiaki kimonekanga mu mana kavova Kanani wa moni yovo ngunza kwa Asa wa Ntinu Ayuda vo: “O meso ma Yave mekwendanga ya kuku ya kuna ova nza yawonso kakumama muna diambu di’awana bena yo ntim’asikila oku kena.”​—⁠2 Tusansu 16:​7, 9.

Vena ye kuma kiakaka kin’o Yave kekututadilanga. Yesu wavova vo: “Ke ven’on’olend’o kwiz’oku ngina ko, ovo o Se, ona wantuma, kekuntunta ko.” (Yoane 6:​44) Yave okutuvwanga o mfunu, omonanga makani ma muntu on’ozolele kunzaya. Avo muntu ozolele toma kunzaya, olenda kunsadisa. Kasikil’owu, kuna República Dominicana, nkento mosi wakala ku lupitalu mu kuma kia kimbevo kia cancer. Wasamba kwa Nzambi kansadisa mu zaya e ludi. I bosi, o nkaz’andi wantwasila finkanda, O Nzambi Adieyi Kevavanga oku kwa Yeto?  * fina kavewa kwa Mbangi mosi a Yave ona wayiza kuna nzo andi. O nkento watanga finkanda fiofio yo bakula vo Nzambi wavana e mvutu za sambu kiandi. Watambulwila longoka Nkand’a Nzambi ye Mbangi za Yave, una kalungisi nkutu ngonde sambanu ko, wayekola zingu kiandi kwa Nzambi yo vubwa.

 Nkand’a Nzambi muna nkanda Nkunga, tutanganga mvovo miayingi mia lukasakeso mia ntozi a nkunga wa mwisi Ayibere wa nkulu, nze i Davidi wa Ntinu ona wayikila Yave vo olunga-lunganga e selo yandi kuna zola. Muna Nkunga 56:8 tutanganga vo Davidi wa Ntinu wadodokela Nzambi vo: “Sia mansanga mame muna mbwat’aku; nga ke mena muna nkand’aku ko e?” Nze una tumwene muna mvovo miami, Davidi wazaya wo vo Yave kazaya kaka mpasi zandi ko, kansi wazaya mpe e nkenda zantwasilanga. Yave wazaya e mpasi za Davidi ye dina diamfilanga mu dila. Kieleka, o Mvangi eto omonanga awonso besianga ngolo za vanga luzolo lwandi, “awana bena yo ntim’asikila oku kena.”

E sono kiakaka kia Nkand’a Nzambi kisonganga vo Nzambi okutuvwanga o mfunu i Nkunga 23. E mvovo miantete mia sono kiaki, mitezanesanga Nzambi ye mvungudi anzodi vo: ‘O Yave i mvungudi ame, kikondwa má ko.’ Kuna Oriente Médio, o mvungudi olunga-lunganga konso meme yo yikila dio muna nkumbu. Lumbu yawonso obokelanga mameme mandi, okiyanga yau yo vava ana balwele. Avo osolwele dimosi dialwala, okusa dio mazi yovo nlongo kimana diasasuka mu nzaki. Avo meme diyelele, o mvungudi wanwikanga dio nlongo mu ngolo yo sadisa dio dialembi lambalala yo fwa. Kalukatikisu ko vo e nona kiaki, kisonganga una Yave ke lunga-lunganga awana bekumfinamanga.

E Sambu ye Lufuluku i Ziku Kisonganga vo Nzambi Okutuvwanga o Mfunu

E nkunga wau ye miakaka ke miasonama kaka mu Nkand’a Nzambi ko mu tanga yo  yangalela mio. Kansi, misonganga una selo ya Nzambi yakwikizi kuna nz’ankulu badodokelanga Yave mu lomba lusadisu lwandi yo songa luyangalalu lwau muna luludiku lwandi ye mpila kabasambulwilanga. E mvovo miami mia luyangalalu misonganga vo selo ya Nzambi kuna nz’ankulu, bakwikilanga vo Nzambi wabavwanga kieleka o mfunu. Vava tutanganga e mvovo miami yo badika mio, dilenda kutusadisa mpe mu bakula vo Nzambi okutuvwanga kieleka o mfunu. Elau katuvana Yave dia sambanga kwa yandi, i ziku kisonganga vo okutuvwanga kieleka o mfunu.

Ezak’e ntangwa, nanga tulenda kendalala kwayingi mu kuma kia mpasi zeto yo yambula samba. Nga diadi dikakidilanga Yave mu lembi zaya e mpasi zeto? Muna Roma 8:26 tutanganga vo: “O mwanda osadisanga lutovoko lueto: kadi nsamba tufwete samba, ke tuzeye yo ko; o mwanda, yandi kibeni, okutudodokelelelanga ye bumu ilembi tatukana.” E sono kiaki kisonganga vo e sambu yavumunwinwa ya selo ya Nzambi kuna nz’ankulu, ilenda kutusadisa mu bakula vo Yave “owanga sambu.”​—⁠Nkunga 65:⁠2.

E vuvu kia lufuluku i ziku kiakaka kisonganga vo Nzambi ovwanga konso muntu o mfunu. Yesu Kristu wavova vo: “E ntangwa ikwiza, ina ikala vo awonso bena muna nkala bewa nding’andi, [Yesu] bevaika.” (Yoane 5:​28, 29) E mvovo wa Kingerekia usadilu ovava una ye nsasa vo ‘nkala wa luyindulu,’ ke nkala kaka ko yovo “ziami.” Ediadi disonganga vo Nzambi osungamenanga mpila muntu kakala vava kakala moyo.

Se badiki dina divavwanga muna fula muntu! Nzambi wafwana zaya mawonso mu kuma kia muntu, kumosi ye mpw’andi, nkal’andi, fu yandi ye luyindulu lwandi lwawonso. (Maku 10:​27) O nyindu a Nzambi ke uvilakananga wantu awaya ko, kana nkutu vo funda dia mvu diviokele kala tuka bafwila. (Yobi 14:​13-15; Luka 20:​38) Muna mpila yayi, mawonso ma ulolo wa wantu awaya bafwa mena muna nyindu a Yave wa Nzambi, mekutukwikidisanga vo Nzambi ovwanga kieleka konso muntu mu yeto o mfunu.

Yave Nsendi

Adieyi tufwete vanga muna zolwa yo vuwa o mfunu kwa Nzambi? Diantete, tufwete songa vo tukumbundanga vuvu yo kulemvokela yo kala ye lukwikilu muna yandi. Paulu wa ntumwa wayika e ngwizani ina vana vena lukwikilu yo yangalela una Nzambi kekutulunga-lunganga. Wasoneka vo: “Ovo vakondelo lukwikilu, ke dilendakana ko, edi dia kunyangidika: okala vo kadi, ndion’okwiza kwa Nzambi, okwikila kaka vo wina, yo kala nsendi awana bekumvavanga.”​—⁠Ayibere 11:⁠6.

Sungamena vo mambu mole mevavwanga muna mpila lukwikilu luyangidikanga Nzambi. Diantete, tufwete “kwikila kaka vo wina” yandi i Mfumu a Nsema, ona tufwete sambila yo lemvokela. Di’ezole, tufwete kwikila vo yandi i “nsendi awana bekumvavanga.” O lukwikilu lwakieleka luvavanga vo twakwikila vo Nzambi ovavanga wete di’awana bekumvavanga yo vanga luzolo lwandi ye okubasenda. Muna longokanga Diambu dia Nzambi yo kunlemvokela, ngeye mpe olenda kala ye lukwikilu lwalu yo vuwa o mfunu kwa Nzambi yo tambula nsendo andi.

Ulolo wa wantu o unu, beyindulanga vo Nzambi ke vwanga wantu mfunu ko. Kansi, nze una tumwene, Nkand’a Nzambi usonganga vo Nzambi ovwanga kieleka o mfunu awana bekumbundanga e vuvu yo kwikila muna yandi. Kana una vo e zingu o unu kiazala ye mpasi, mambu mekutulwekanga o ntima, ntokani ye lukendalalu, katufwete dimbula vuvu ko. Yave wa Nzambi okutuvwanga o mfunu. Kieleka, muna zola kwawonso okutubokelanga twavutuka kwa yandi, okutusadisa. Ntozi a nkunga wavova vo: “Yekek’ezitu diaku kwa Yave, yandi okusikina: keyambula nsongi kanikunwa ko yakwele mvu.”​—⁠Nkunga 55:22.

[Mvovo Vana Yand’a lukaya]

[Babu/​Foto ina muna lukaya lwa 23]

Sono Ilenda Kumika Lukwikilu Lwaku Muna Mpila Nzambi Kekuzolelanga yo Kuvwa o Mfunu

“O meso ma Yave mekwendanga ya kuku ya kuna ova nza yawonso kakumama muna diambu di’awana bena yo ntim’asikila oku kena.”​—2 TUSANSU 16:9

“Sia mansanga mame muna mbwat’aku; nga ke mena muna nkand’aku ko e?”​—NKUNGA 56:8

‘O Yave i mvungudi ame, kikondwa má ko.’​—NKUNGA 23:1

“Ongeye owanga sambu, o wantu awonso kwa ngeye bekwiza.”​—NKUNGA 65:2

“Nga wadi bokela yatambulwila: Wadi si’etima mun’evangu dia moko maku.”​—YOBI 14:⁠15

“Ndion’okwiza kwa Nzambi, okwikila kaka vo wina, yo kala nsendi awana bekumvavanga.”​—AYIBERE 11:6

“Yekek’ezitu diaku kwa Yave, yandi okusikina: keyambula nsongi kanikunwa ko yakwele mvu.”​—NKUNGA 55:22