O Wutuluka Nkia Mpila Kuvangamenanga?

MUNA moko kiandi ye Nikodemo, Yesu kasonga kaka ko ekani, y’etuku dia wutuluka, kansi wasonga mpe e mpila muntu kalenda wutulukila. Yesu wavova vo: “O muntu, ovo kalembi wutwa kwa maza yo mwanda, kalendi kota muna kintinu kia Nzambi ko.” (Yoane 3:⁠5) I kuma vo, muntu owutulukanga muna maza yo mwanda. Kansi, o mvovo “maza yo mwanda” nki miyikanga?

Nki i “Maza yo Mwanda”?

Wau vo nlongi kakala muna nsambil’a Yuda, ka lukatikisu ko Nikodemo wazaya wo vo “o mwand’a Nzambi” i ngolo za Nzambi zilenda fila muntu mu vanga masivi. (Etuku 41:38; Luvaiku 31:3; 1 Samuele 10:⁠6) I kuma vo, vava Yesu kasadila e mvovo “mwanda,” Nikodemo wabakula wo vo, mwand’avelela kayika, una vo i ngolo za Nzambi.

Adieyi tuvova mu kuma kia maza kayika Yesu? Yindula dina diateka vangama ye dina dialanda vava kamokena yo Nikodemo. Lusansu lusonganga vo Yoane wa Mvubi ye alongoki a Yesu mu maza bavubilang’o wantu. (Yoane 1:​19, 31; 3:22; 4:​1-3) Luvubu lwalu lwatoma zayakana muna Yerusaleme. I kuma vo, vava Yesu kayika maza, Nikodemo wabakula wo vo Yesu luvubu lwa maza kayika. *

Vubilwa “Muna Mwand’avelela”

Wau vo “wutwa kwa maza” i vubilwa muna maza, o ‘wutwa kwa mwanda’ nki disonganga? Una Nikodemo kamokene ko yo Yesu, o Yoane wa Mvubi wasamuna vo, kuna sentu, wantu ke bevubilwa kaka mu maza ko, kansi bevubilwa mpe muna mwanda. Wavova vo: “Omono inuvubìdi muna maza; vo i yandi [Yesu], okunuvubila muna mwand’avelela.” (Maku 1:​7, 8) Nsangu zambote za soneka Maku zisonganga e nkumbu antete lwavangama luvubu lwa mwanda. Wasoneka vo: “Muna lumbu yayina i kayiz’o Yesu tuka kuna Nazarete a Ngalili, ovubilu kwa Yoane muna Yodani. Vava katombokele aka muna maza, omwene ezulu dibakukini, yo mwanda, nz’eyembe, s’ekunkulumukina.” (Maku 1:​9, 10) Vava kadimunwa muna  Yodani, Yesu wavubwa muna maza. Vava katambula mwand’avelela wakulumuka kun’ezulu, wavubwa muna mwand’avelela.

Vioka mvu ntatu tuka luvubu lwandi, Yesu wazayisa alongoki andi vo: “Ke lumbu yingi ko, nuvubilwa muna mwand’avelela.” (Mavangu 1:⁠5) Nkia ntangwa dia lungana?

Muna lumbu kia Pentikosti ya mvu wa 33 wa tandu kia Kristu, tezo kia 120 m’alongoki a Yesu bakutakana mu nzo mosi muna Yerusaleme. “Kuna kinsalukisa, valueke ezu dituka kun’ezulu, nga mpekomok’a tembwa kiangolo, dizele nzo yawonso, ina bavwende. Vezidi kubamoneka tubini tukuvambulanga, tuna nze tiya; . . . Yawonso bazele yo mwand’avelela.” (Mavangu 2:​1-4) Muna lumbu kiakina, o nkangu muna Yerusaleme wawondelelwa bavubwa muna maza. Petelo wa ntumwa wabavovesa vo: “Nuvilukw’e ntima, yo vubilwa konso muntu vana kena muna nkumbu a Yesu Kristu muna luyambulwilu lua masumu meno; nwatambul’o lukau lwa mwand’avelela.” Aweyi bavanga? “Ana batambwidi e diambu diandi bavubilu; e lumbu kina mwayikama tezo kia mazunda matatu ma wantu.”​—⁠Mavangu 2:​38, 41.

Vubwa Nkumbu Miole

O luvubu lwalu nkia ngwizani luna ye diambu dia wutuluka? Disonganga vo awana bewutulukanga bafwete vubwa nkumbu miole. Sungamena vo Yesu wavubwa ntete muna maza. I bosi katambula mwand’avelela. Diau adimosi mpe, alongoki antete bavubwa muna maza (akaka kwa Yoane wa Mvubi), i bosi batambula mwand’avelela. (Yoane 1:​26-​36) Diau adimosi mpe 3.000 m’alongoki ampa, ntete bavubwa muna maza, i bosi batambula mwand’avelela.

Wau tubakwidi luvubu lwavangama kina kia Pentikosti ya mvu a 33 wa tandu kia Kristu, o muntu nkia mpila kalenda wutulukila o unu e? Wauna wavubilwa antumwa za Yesu y’alongoki antete. Entete muntu kafwete vilukw’e ntima muna masumu mandi, yo yambula mavangu mambi, i bosi kafwete yekola zingu kiandi kwa Yave muna kunsambila yo kunsadila yo songa sinsu kia kiyekola kwandi muna luvubu lwa maza. Kuna kukwiziwa, kele vo Nzambi unsolele kakala se nyadi muna Kintinu kiandi, okunkusa muna mwand’avelela. (O luvubu lwantete lwa maza) mu luzolo lwa muntu yandi kibeni luvangamenanga; vo i (luvubu lwazole muna mwanda) mu luzolo lwa Nzambi luvangamenanga. Avo muntu o vubilu nkumbu miami miau miole, ozevo, o wutulukidi.

Muna moko kiandi yo Nikodemo, ekuma Yesu kasadila e mvovo “wutwa kwa maza yo mwanda”? Muna songa vo awana bevubwanga muna maza yo mwanda e zingu kiau kisobanga emvimba. Elongi dilanda dikiesesa diambu diadi dia wutuluka.

[Mvovo Vana Yand’a lukaya]

[Foto ina muna lukaya lwa 9]

Yoane wavuba Aneyisaele ana bavilukw’e ntima, muna maza