Aweyi Olenda Bakulwila Nkand’a Nzambi

2. Kutangi wo ye Ngindu Zalembi Songa ko

Nga una ye nkundi ona wazayisa e diambu diambi mu kuma kia muntu ndiona olembele zaya? Vava owawana ye muntu ndioyo, nga e mvovo mia nkundi aku mikufila mu lembi mona umbangu ye fu yandi yambote? Diau adimosi mpe dilenda vangama mu kuma kia Nkand’a Nzambi.

PAULU wa ntumwa walukisa dina dilenda vangama avo tutanga Nkand’a Nzambi ye ngindu zalembi songa. Paulu wasoneka mu kuma kia Ayuda a lumbu yandi vo: “Ibasididi o umbangi vo bena y’etima dia Nzambi, kansi ke mun’owu wa visa kia zaya ko.”​—⁠Roma 10:⁠2.

Kana una vo e Sono ya Kiyibere yatoma kiesesa vo Yesu i Masia, akaka muna Ayuda awaya a tandu kiantete, kebantambulwila ko. Yesu wa Nazarete walungisa ungunza wawonso ye mana masonama muna Nkand’a Nzambi mu kuma kiandi. Kieleka, e ngindu zalembi songa zavunzanesa Ayuda ayingi a lumbu yandi mu lembi bakula Diambu dia Nzambi.

Adieyi tulenda longoka muna nona kiaki? Diamfunu twatanganga Nkand’a Nzambi ye ngindu zasonga. E ngindu zalembi songa zilenda fila muntu mu lembi bakula e ludi kia Nkand’a Nzambi.

Kasikil’owu, nlongi a mambu ma dibundu kuna mbanza ya Carolina do Norte, Estados Unidos wavova vo Nkand’a Nzambi “i nkanda wa wantu wazala ye ngindu za wantu ye konso muntu ye ngindu zandi. Ke vena ngindu kana zimosi ko zilenda kutuvana luludiku lwa mpila tulenda zingila.” Kele vo muntu otangidi Nkand’a Nzambi nze “nkanda wa muntu” ke nze nkanda wa Nzambi ko, obembola mana kayangalele ko.

Nswaswani ye ngindu zazi, Nkand’a Nzambi ukutukasakesanga vo twatanganga wo ye sungididi kiawonso. Mu kuma kia esi Beroya a lumbu ya Paulu, Nkand’a Nzambi uvovanga vo: “Batambulwidi e diambu kuna mvevo  a ntima, e lumbu yawonso bafimpidinge e sono, o mambu mama, kana wau mena.” (Mavangu 17:​11) Nze esi Beroya, diamfunu wakatula ngindu zalembi songa mu kuma kia Nkand’a Nzambi yo tanganga wo ye ngindu zasikila muna bakula wo. O tanga Diambu dia Nzambi ye ngindu zasonga, dikutusadisa mu zaya o Nsonekesi a mambu mama ma kiese.