Aweyi Olenda Bakulwila o Nkand’a Nzambi

3. Tambulwila Lusadisu Lw’akaka

Vava Edward John Eyre wa nsatuludi kavanga nkangalu wampasi yo lwaka muna Ndimba Nullarbor, Mingutukila mia zunga kiakina basonga Eyre e mpila kalenda tekela maza muna sima ki’esenge ye una kalenda bakila maza muna nti wa eucalipto. O tonda lusadisu lw’awana bazeye e zunga, lwavuluza Eyre.

NZE una usonganga e nona kiaki, muna sunda diambu diampasi, divavanga vo watambulwila lusadisu lw’awana batomene zaya mpasi zozo. Diau adimosi mpe dilenda vangama vava oyantikang’o tanga Nkand’a Nzambi.

Yesu kavavanga ko vo alandi andi babakula o Nkand’a Nzambi kondwa lusadisu lw’akaka. Lumbu kimosi, ‘wabatendwela e ntima bazay’e sono.’ (Luka 24:​45) Yesu wazaya wo vo atangi a Nkand’a Nzambi lusadisu bavwidi o mfunu muna bakula malongi ma Nkand’a Nzambi.

Lusadisu lwa Nani?

Yesu wakanikina alandi andi akieleka bavana lusadisu lwalu. Una katombokele kun’ezulu ko Yesu wakanikina vo: “Nwenda, nwakitula wantu a zula yawonso s’alongoki, . . . nwabalonga vo balunda mambu mawonso inukanikini.” (Matai 28:​19, 20) E salu kiantete kia Akristu i longa, ediadi divavanga vo basasila una nkanikinu mia Nkand’a Nzambi milenda sadilwa muna zingu kia lumbu ke lumbu. Akristu akieleka besadisanga akaka mu bakula o Nkand’a Nzambi.

Vioka fikolo, vava Yesu kavana nkanikinu wau kwa alandi andi, diambu di’esivi diavangama. Nkand’a Nzambi ukutuzayisanga mu kuma kia muntu wasadilanga kuna lumbu lwa ntinu a Etiopia ona watanganga ungunza wa Yesaya. Vakala ye tini kia ungunza katanganga kabakulanga ko. E tini kia ungunza kabakulanga ko owu kivovanga: “Nze mwan’ememe, vana vena nsâki a mika wabutama, i mbatuna kalembi batuna nu’andi: Muna lusakalalu luandi e mfundisw’andi yakatulwa: E mbandu andi, nani okumbulula yo? E kuma kadi, o moyo andi ukatwilu ova nza.”​—⁠Mavangu 8:​32, 33; Yesaya 53:​7, 8.

Mbanda-banda wayuvula Filipo wa Nkristu ona watoma zaya e Sono vo: “O ngunza, nani kayikìdi dio? Yandi kibeni, ovo muntu akaka.” (Mavangu 8:​34) O Ntiopia wa nkwa nkwikizi, ku Yerusaleme kayenda sambilanga yo lomba luludiku lwa Nzambi muna sambu. Watanganga kuna lulembamu y’etima  diawonso. Kana una vo iwau, kabakulanga ko etini katanganga. Kuna lulembamu lwawonso walomba lusadisu kwa Filipo. E mpila Filipo kasasila e sono, yayangidika kikilu Mbanda-banda yamu tezo kia kumfila mu kituka se Nkristu.​—⁠Mavangu 8:​35-39.

Mbangi za Yave bekwamanananga sala e salu kavanga Filipo ye Akristu akaka a tandu kiantete. Muna tezo kia 235 za nsi, Ambangi za Yave kuna mvevo wawonso, besadisanga akaka mu bakula dina kieleka kelonganga o Nkand’a Nzambi. Bevanganga wo muna mokena yo wantu oma ma Nkand’a Nzambi. E mpila yayi ya longela Nkand’a Nzambi kwa wantu ivavanga vo bafimpa dina Nkand’a Nzambi kevovanga mu kuma kia diambu edi yovo diakaka. *​—⁠Tala babu “Mvutu za Sikila za Yuvu ya Nkand’a Nzambi.”

“Yuvu Yame Yawonso Yavaninwa e Mvutu”

Steven, Valvanera yo Jo-Anne ana bayikilu kala mun’elongi diantete bayantika longoka Nkand’a Nzambi ye Mbangi za Yave. Steven wavova vo: “Edi dikunsivikisanga i zaya vo vava ntezanesanga e miaka nsiku mia Nkand’a Nzambi, nkumbu miayingi iwananga kaka e mvutu muna Nkand’a Nzambi. Una kiayantikidi longoka ko Nkand’a Nzambi ye Mbangi za Yave, ke vakala muntu ko wansasilanga oma ma Nkand’a Nzambi. Olwalu lwakala se luvevoko lwampwena mu zaya vo Nkand’a Nzambi uvananga mvutu zasikila.”

Valvanera wavova vo: “Mawonso yalongwa kwa Mbangi za Yave ma ludi kikilu. Ke mu kuma kia sia ko vo ‘dibundu’ dialonga mo kansi mu kuma kia zaya vo mu Nkand’a Nzambi matuka.” Jo-Anne wavova vo: “Ozaya vo e yuvu yame yawonso yavaninwa e mvutu muna Nkand’a Nzambi, diansadisa muna vumina ona Wasonekesa wo kadi wazaya wo vo wantu balenda kala ye yuvu yayingi yampimpita ye mu Nkand’a Nzambi kaka balenda sololwela e mvutu zasikila.”

Nga ozeye mosi muna Mbangi za Yave? Ekuma olembi kunlombela kasonga una uvangilwanga elongi dia Nkand’a Nzambi? Avo kuzeye Mbangi za Yave ko vanga luzolo lwa soneka mu konso nzila zina muna lukaya lwa 2 lw’Eyingidilu diadi. Muna lusadisu lwa mwand’avelela a Nzambi, ngindu za songa ye lusadisu lw’alongi a zikuka a Nkand’a Nzambi, kukala ye mpasi ko muna bakula e Diambu dia Nzambi. Olenda bakula Nkand’a Nzambi.

[Mvovo Vana Yand’a lukaya]

[Babu/​Foto ina muna lukaya lwa 7]

Mvutu Zasikila za Yuvu ya Nkand’a Nzambi

E miaka ntu mia mambu belongokanga Ambangi za Yave mun’elongi diau dia Nkand’a Nzambi i miami:

• Adieyi i kani dia Nzambi mu kuma kia ntoto?

• Amafwa akweyi bena?

• Nga mu “lumbu yambaninu” tuzingilanga?

• Ekuma Nzambi keyambulwilanga e mpasi?

• Aweyi olenda kitulwila zingu kia nzo se kiakiese?

[Mafoto zina muna lukaya lwa 7]

O NKAND’A NZAMBI ADIEYI Kieleka KELONGANGA?