Mavangu Mambi Mefokoka Emvimba!

NZAMBI watuvana e Diambu diandi diavumunwinwa dikutusonganga ekuma wantu bevangilanga mambu mambi. Watuvana mpe o nswa wa kuyisolela kimana twakala ye volo mu lembi vanga mambu mambi. (Nsiku 30:15, 16, 19) Wau tuzeye diambu diadi, tulenda bakula makani mambi tuna mau yo vanga mawonso tulenda muna katula mo. O kala ye volo mu lembi vanga mambu mambi dilenda kututwasila kiese ye kw’awana batuzungidi.—Nkunga 1:1.

Kansi, kana nkutu nkia ngolo konso muntu mu yeto kalenda vanga mu venga mambu mambi, o wantu bezadisanga e nza ye mavangu mansoki. Nkand’a Nzambi  ulukisanga vo: “Zay’edi, ovo, muna lumbu yambaninu mukwiza ntangwa zampasi. Kadi wantu bekal’akwa kuzola, minzola-nzimbu, akwa lusanu, akwa lulendo, akwa lutiangu, akolami ese yo ngudi, ntokozi, mindembi-velela, minkondwa-ungudi, minkondwa-ngwawani, akw’ekumbu, minkondwa-volo, akwa lunzi, mindembi zola mawete, ayekodi, akwa nswatakesa, akwa lungumvi-ngumvi, azodi ekembo ke mu Nzambi ko; bena ye nsunsu za vumina Nzambi, kansi bakadidi wo, o nkuma: awana mpe ubavengomokena.”—2 Timoteo 3:1-5, NW.

Nanga omwene e mvovo “lumbu yambaninu” muna mvovo mia ungunza miyikilu ova ntandu. Nkia nsasa una kwa ngeye? Wantu ayingi bebakulanga vo e mvovo “lumbu yambaninu” uyikanga diambu dilweke kumfoko. Nkia diambu diadi? Tala nsilu kesianga o Nzambi muna Diambu diandi.

Yimpumbulu bekendonwa emvimba.

“Finkolo-kolo kaka, e kimpumbulu, ladi: Kan’otomene tala fulu kiandi, nkantu kwandi. Alembami bevwa nza; beyangalela muna mawete mayingi.”—NKUNGA 37:10, 11.

“O Yave olungalung’awonso banzolele; kansi yimpumbulu yawonso ikefwasakesa.”—NKUNGA 145:20.

Ke vekala diaka lubangamu ko.

“Kadi okôla nkondami vava kekaza; yo nsukami ona kena ya nsadisi ko. Okûla mioyo miau muna lubangamu ye ngungula.”—NKUNGA 72:12, 14.

“Muna vuvu kia nsema kibeni wavevoka muna kibundu kia uwolezia, yamuna vevoka kwa nkembo a wan’a Nzambi.”—ROMA 8:21.

Nsatu za wantu zilungiswa.

“Bekala konso muntu kunansi a nsing’andi a vinyo yo kunansi a nsand’andi; ke vekal’on’okubazakamesa ko.”—MIKA 4:4.

“Betunga nzo yo kala mo; bekuna mpatu za vinyo, yo dia bundu yau. Ke betunga ko, wakaka kakala mo; ke bekuna ko wakaka kadia; nze lumbu ya nti ikala lumbu ya nkangu ame, ana nsolele bekwaminin’o mona wete wa salu ya moko mau.”—YESAYA 65:21, 22.

Vekala unsongi.

“O Nzambi, nga kelanda kunda ki’adimbuki andi ko e? ana bekumbokelanga yo fuku yo mwini, . . . . Inusamunwini vo okubalandila-landila kunda.”—LUKA 18:7, 8.

“O Yave ozolele ndungidi, keyambula minkwikizi miandi ko yakwele mvu belungwa-lungwa.”—NKUNGA 37:28.

Unsongi uvingiswa vana fulu ki’eloko.

“Wantu a nza belongwa unsongi.”—YESAYA 26:9.

“Mun’owu wa nsilu andi, tusiang’e vuvu ki’ezulu diampa ye nz’ampa, ina ikalwanga kwa ndungidi.”—2 PETELO 3:13.

Kana Nkutu wau Wantu mu Soba Bena

Kalukatikisu ko vo yeto awonso tuyangalelanga e nsilu miami. Kansi nkia ziku tuna kiau vo e nsilu miami milungana emvimba? Owau tuvwidi ziku yayingi yisonganga vo e nsilu mia Nzambi mialudi kikilu. Ayeyi i ziku yayi? I ziku kia sia vo ulolo wa wantu mu nz’amvimba mu yambula bena fu ki’eloko, mavangu ma zumba ye mansoki, belongokanga unsongi, luvuvamu yo kituka se wantu ambote. O unu tezo kia yazi nsambwadi ya Mbangi za Yave bena muna  kintwadi kia wan’angudi muna zula yawonso, beyambulanga e fu kia sia mpambula vana vena makanda, se kia nitu yo lembi kuyisia mu mambu ma tuyalu yo luzolo lwasaka lwa vwa nzimbu zayingi olu luwokesanga lumengo, nsoki yo bungula menga muna lusansu lwawonso. * E nsobani zazi i ziku kisonganga vo e nsilu mia Nzambi lungana kikilu milungana.

Nki kitwasanga e nsobani zazi? E mvutu za kiuvu kiaki zina muna nsilu akaka wa Nkand’a Nzambi owu wasonekwa kwa Yesaya. Wasoneka vo:

“E dievwa dinangina yo mwan’ememe, e ngo ibubamena yo mwan’a nkombo; mwan’a ngombe yo mwan’a nkosi ye mbizi amazi ikala kumosi; e kingyanangyana kikubafila. . . . E nkosi idia titi nze ngombe. O ngyemo osakanina vana nu’a nioka, o ntauki osia koko vana nu’a mpidi. Ke bevanga mbi yovo fwantakesa ko muna mongo ame avauka: kadi e nza izala yo zayi wa Yave, una mefuka kalunga o maza.”—Yesaya 11:6-9.

Nga ungunza wau uyikanga kaka e ngwizani yikala vana vekala wantu ye bulu? Ve, o ungunza wau mayingi uyikanga. Tala dina kivovanga e tini kiansuka kia kapu kiaki: “E nza izala yo zayi wa Yave.” Nga o zayi wa Nzambi usoba e fu kia bulu? Ve kikilu. Kansi o zayi wau ulenda soba e fu ya wantu. O ungunza wau wasakula mpe vo o wantu ana bena ye fu nze ya bulu besoba yo yima e fu nze ya Kristu kadi belongokanga yo sadila dina kelonganga Nkand’a Nzambi.

Badika e nona kia Pedro. * Wayindulanga vo muna sikidisa unsongi kafwete kota mu buka kia akwa mavangu mansoki. Vava katoma longwa, wafilwa kenda fwasa e vula  dia mapolisi. Ekolo kakubamanga mu vanga wo, wakangwa kwa mapolisi. Pedro ngonde 18 kavanga muna pelezo yo kwamanana muna mavangu mandi ma umpumbulu. Ekolo Pedro kakala muna pelezo, o nkaz’andi wayantika longoka Nkand’a Nzambi ye Mbangi za Yave. Vava kavaika muna pelezo, Pedro mpe wayantika longoka Nkand’a Nzambi, mana kalongokanga mu kuma kia Yave wa Nzambi, mamfila mu soba emvimba mavangu mandi ye mpila zingu kiandi. Pedro wavova vo: “Ivutulanga matondo kwa Yave wau vo kiasidi vonda muntu ko ekolo yakala mu buka kia yimpumbulu. Owau, isadilanga e nsosolo a mwand’a Nzambi una vo i Diambu dia Nzambi mu samuna kwa wantu e nsangu za luvuvamu lwakieleka yo unsongi, i sia vo nsangu za Kintinu kia Nzambi. Pedro wayenda kingula evula dia mapolisi dina kazola fwasa, kansi kayenda y’ekani dia fwasa dio ko, wayenda mu samuna nsangu za luvuvamu kw’awana bezingilanga ko.

O nkuma wa Diambu dia Nzambi wa soba fu ya wantu, ufwete kutufila mu kala ye lukwikilu muna nsilu mia Nzambi vo e  mbi yawonso ifokoka emvimba. Kieleka, o wantu ke bevanga diaka mambu mambi ko, kansi besoba emvimba yakwele mvu. Ke kolo ko Yave ofwasa Nkadi Ampemba wa Satana w’etuku dia mavangu mambi wa vangwa kia mwanda ofilakesanga e nza yayi. Nkand’a Nzambi uvovanga vo: ‘Tuzeye wo vo twa Nzambi twina, e nza yawonso mu wisa kia ndiona wambi ilele.’ (1 Yoane 5:19) Kansi, ke kolo ko ofwaswa. Awonso ke bezolanga soba mpila zingu kiau ko befwaswa mpe. Ekwe mpila kiese tumona mu zinga muna kolo kiakina!

Adieyi tufwete vanga muna vwa e nsambu zazi? Sungamena dio vo o zayi wa Yave i wau usobanga e zingu kia wantu o unu, i wau mpe usoba e zingu kia wantu mu nza yawonso kuna sentu. Muna vwa o zayi wau wa Nkand’a Nzambi yo sadila wo nze una kavanga Pedro, ongeye mpe olenda zinga muna nza “ina ikalwanga kwa ndungidi.” (2 Petelo 3:13) Tuwondelelwanga owau twasadila elau dia vwa o zayi wa Nzambi yo Yesu Kristu ekolo ntangwa yakinu, kadi o zayi wau ukutufila ku moyo a mvu ya mvu.—Yoane 17:3.

[Mvovo Vana Yand’a lukaya]

[Mvovo mia Sina mina muna lukaya lwa 9]

Ongeye mpe olenda zinga muna nza “ina ikalwanga kwa ndungidi.”​—2 PETELO 3:13