Sambu

6 Sambu Nga Kilenda Kutusadisa?

NGA sambu kilenda kututwasila e nluta? Elo, Nkand’a Nzambi uyikanga vo e sambu ya selo yakwikizi ya Nzambi nluta kikilu yabatwasila. (Luka 22:40; Yakobo 5:13) Kieleka, e sambu kilenda kutusadisa mu mpila zawonso, mu mwanda mu ngindu ye mu nitu. Mu nkia mpila?

Yindula vo mwan’aku bamvene lukau, nga okunlonga vo kayangalala kaka yovo okunlonga kavutula matondo? Vava tusonganga luyangalalu lweto muna mavangu, tusianga e sungididi kieto mun’evangu diadi yo kasakesa dio. Nga i diau mpe divangamanga vava tusambanga kwa Nzambi? I diau kikilu. Tubadika eyaka nona.

Sambu kia matondo. Vava tuvutulanga matondo kwa S’eto ezulu muna mawete kekutuvanganga, tusianga e sungididi mu nsambu kekutuvananga. Ediadi dikututwasilanga e kiese.—Filipi 4:6.

Nona: Yesu wavutula matondo kwa S’andi wau kawa e sambu kiandi yo vanina kio e mvutu.—Yoane 11:41.

Sambu kia lomba luloloko. Vava tulombanga luloloko kwa Nzambi, tulonganga e ntona zeto yo songa vo tuvilukidi kikilu o ntima yo zaya e ngyelele eto. Tuvevokanga mpe mu fu kia kuyitumba.

Nona: Davidi wasamba mu songa luviluku lwandi lwa ntima ye ntantu zandi.—Nkunga 51.

Lombanga luludiku ye ngangu muna sambu. O lomba kwa Yave vo katuvana luludiku ye ngangu muna baka nzengo zambote, dilenda kutusadisa mu kala alembami. Dilenda kutusadisa mpe mu sungamena vo ke twalunga ko yo bunda e vuvu kwa S’eto ezulu.—Ngana 3:5, 6.

Nona: Solomo kuna lembama kwawonso walomba luludiku ye ngangu muna yala Isaele.—1 Ntinu 3:5-12.

Sambu muna ntangw’ampasi. Vava tuziulanga ntima mieto kwa Nzambi muna ntangw’ampasi, tuvevolanga o ntima yo bunda vuvu kwa Yave ke mu yeto kibeni ko.—Nkunga 62:8.

Nona: Asa wa ntinu wasamba vava kanwaniswa kwa makesa mangolo ma mbeni.—2 Tusansu 14:11.

Sambu muna wete dia akaka. E sambu ya mpila yayi ikutusadisanga mu sunda e loko yo songa e ngemba ye nkenda kw’akaka.

Nona: Yesu wasamba mun’ewete dia alongoki andi.—Yoane 17:9-17.

Sambu kia lusanisinu. Vava tusanisinanga Yave mu kuma kia mavangu mandi m’esivi ye fu yandi, tutoma kunzitisanga ye kunzola. E sambu ya mpila yayi mpe ilenda kutusadisa mu finama Nzambi w’Eseto.

Nona: Davidi wakembelela Nzambi ye kiese kiawonso mu kuma kia mavangu mandi.—Nkunga 8.

E nsambu zakaka tulenda vwa mu kuma kia sambu i “luvuvamu lua Nzambi, luna luviokele nyindu wawonso.” (Filipi 4:7) O kala ye luvuvamu mu nza yayi yazala ye mpasi, i nsambu kikilu. Lukututwasilanga mpe mavimpi mabiza. (Ngana 14:30) Nga tuvwanga luvuvamu lwalu mu ngolo za yeto kibeni yovo vena ye diambu diakaka dikutusadisanga?

[Mvovo mia Sina muna lukaya lwa 10]

E sambu nluta miayingi yikututwasilanga mu nitu, mu ngindu ye muna mwanda