Longoka Muna Nkand’a Nzambi

Nani i Nzambi?

Elongi diadi difimpanga yuvu lenda kiyuvula mu kuma kia Nzambi. Disonganga mpe una lenda zayila mvutu muna Nkand’aku a Nzambi. Mbangi za Yave balenda kusadisa mu zaya mvutu za yuvu yaku.

1. Nani i Nzambi?

Nzambi a ludi i Mvangi a lekwa yawonso. Muna Nkand’a Nzambi oyikilwanga vo “Ntinu a mvu ya mvu.” Ediadi disonganga vo kena ye lubantiku ye nsuka ko. (Lusengomono 15:3) Wau vo Nzambi i Tuku dia moyo, yandi kaka tufwete sambila.—Tanga Lusengomono 4:11.

2. Aweyi kena Nzambi?

Ka vena muntu ko wamona Nzambi kadi yandi Mwanda. Ediadi disonganga vo osundidi vangwa yawonso ya moyo ova nza. (Yoane 1:18; 4:24) E nkal’a Nzambi imonekanga muna lekwa kavanga. Kasikil’owu, vava tutalanga nsema wazala ye nti miyimanga bundu ye mvuma za mpila mu mpila, tubakulanga o zola ye ngangu za Nzambi. O vonga kwa nsema ukutusonganga o nkum’a Nzambi.—Tanga Roma 1:20.

Muna longoka Nkand’a Nzambi tulenda zaya mayingi mu kuma kia kiwuntu kia Nzambi. Kasikil’owu, Nkand’a Nzambi ukutuzayisanga mana kezolanga ye mana kemenganga Nzambi, mpila kekadilanga yo wantu ye mpila kesingikilanga mambu.—Tanga Nkunga 103:7-10.

3. Nga Nzambi una ye nkumbu?

Yesu wavova vo: “E S’eto koko’zulu, yambula nkumbu aku yazitiswa.” (Matai 6:9) Kana una vo Nzambi ovwidi mazina mayingi, nkumbu imosi kaka kena yau. Mu mpila yaswaswana yiyikilwanga muna konso ndinga. Muna Kikongo tuyikilanga yo vo “Yave.”—Tanga Nkunga 83:18.

E nkumbu a Nzambi yakatulwa muna nsekola zayingi za Nkand’a Nzambi yo vingiswa o mazina nze Mfumu yovo Nzambi. Kansi vava kiateka sonekw’o Nkand’a Nzambi, e nkumbu a Yave mu tezo kia 7.000 ma fulu yakala. Yesu wasadilanga nkumbu a Nzambi vava kalonganga Diambu dia Nzambi kwa wantu. Wasadisa wantu bazaya Nzambi.—Tanga Yoane 17:26.

  4. Nga Yave okutuvwanga kieleka mfunu?

Yave osonganga vo okutuvwanga mfunu yo wá sambu yeto. (Nkunga 65:2) Nga mpasi ziwokelanga zisonganga vo Nzambi ke kutuvwanga mfunu ko? Akaka bevovanga vo Nzambi oyambulanga vo twamona mpasi muna kututonta, kansi ediadi ke dialudi ko. Nkand’a Nzambi uvovanga vo: “Ke difwene kwa Nzambi ko, kavanga umpumbulu.”—Yobi 34:10; Tanga Yakobo 1:13.

Nzambi wavana wantu nswa wakuyisolela. Nga ke tuyangalalanga ko wau twasola sadila Nzambi? (Yosua 24:15) Mpasi ziwokelanga mu kuma kia wantu ayingi basola vanga mambu mambi kw’akaka. Yave okendalalanga vava kemonanga mambu mama mambi.—Tanga Etuku 6:5, 6.

Ke kolo ko, Yave osadila Yesu muna sukisa mpasi y’awana betwasanga zo. Yave vwidi kuma kiambote kayambulwila mpasi mu fikolo. Kuna sentu elongi diadi disonga ekuma Nzambi keyambulwilanga mpasi.—Tanga Yesaya 11:4.

5. O Nzambi adieyi kevavanga kwa yeto?

Yave watusema y’etima dia kunzaya ye kunzola. Ozolele vo twazaya e ludi mu kuma kiandi. (1 Timoteo 2:4) Avo tulongokele Nkand’a Nzambi tulenda kunzaya nze Nkundi.—Tanga Ngana 2:4, 5.

Wau vo Yave watuvana moyo, tufwete toma kunzola ke muntu akaka ko. Tulenda songa vo tuzolanga Nzambi muna mokenanga yandi muna sambu yo vanga mana kevavanga oku kwa yeto. (Ngana 15:8) Yave ovavanga mpe vo twazolanga akaka.—Tanga Maku 12:29, 30; 1 Yoane 5:3.

Muna zaya diaka mambu makaka, tala kapu kia 1 kia nkanda wau, wavaikiswa kwa Mbangi za Yave. O Nkand’a NzambI Adieyi Kieleka Kelonganga?

[Foto ina muna lukaya lwa 17]

Nga vena ye kuma kiambote kiayambulwilwa mpasi mu fikolo?