Olenda Kala ye Zingu Kiasikila kia Kusentu mu Nkia Mpila?

AWEYI olenda kadila ye zingu kiasikila? Dimosi muna mambu olenda vanga i sadila ngangu zaku mu badika e nluta yovo mfwilu milenda twasa nzengo obakanga o unu.

Dialudi vo dilenda kala diampasi mu bak’e nzengo zilenda kutwasila nluta miakwele mvu. Ekuma? E kuma kadi o unu wantu ayingi bezolanga vwa nluta vana vau. Kasikil’owu, nanga ozeye wo vo o lemvokela nkanikinu mia Nkand’a Nzambi dilenda kusadisa mu kala ye zingu kia nzo kiakiese. (Efeso 5:22–6:4) Kansi muna vwa kiese kiaki, ofwete vaulanga e ntangwa mu kala vamosi y’esi nzo aku yo sia ngolo kimana walembi kituka se mbundu a salu yovo nsaka. Nze dina divangamanga muna mambu makaka ma zingu, ofwete sola vana vena kiese kia kolo kiandwelo ye kiese kiakwele mvu. Aweyi olenda vwila ngangu zilenda kusadisa mu baka nzengo zambote? Vena ye mambu yá ofwete vanga.

1 Yindula Nluta Yovo Mfwilu Milenda Twasa Nzengo Zaku

Vava obakanga nzengo, teka yindula e nluta yovo mfwilu milenda twasa nzengo zaku. Nkand’a Nzambi ulukisanga vo: “O nlungaladi omwene mbi, oswekamene.” (Ngana 22:3) Avo otomene badika e mfwilu milenda twasa nzengo zaku, dikufila mu venga e nzila zilenda kusia mu vonza. Kuna diak’e sambu, avo oyindwidi e nluta milenda twasa nzengo ozolele baka, ediadi dikufila mu baka nzengo zazi.

Ukiyuvula: ‘E nzengo nzolele baka nkia nluta yovo mfwilu zilenda kuntwasila vava vevioka mvu mosi, 10 yovo 20 ma mvu? Aweyi zikumpanga muna ngindu yovo muna nitu? E nzengo zame aweyi zilenda vanga kwa esi nzo ame ye kwa yitu yame?’ E yuvu isundidi o mfunu i yayi: ‘Nga Nzambi oyangalela nzengo zame? Aweyi zivanga muna ngwizani ame yo yandi?’ Wau vo Nkand’a Nzambi wavumunwinwa kwa Nzambi, ulenda kusadisa mu bakula dina dikunyangidikanga yo kulukisa mu kuma kia ntambu mina kulendi mona ko.—Ngana 14:12; 2 Timoteo 3:16.

2 Bak’e Nzengo Ngeye Kibeni

Vana fulu kia bak’e nzengo yau kibeni, ayingi bezolanga tanginina wantu akaka. Kansi, dina divanganga wantu ayingi ke ntangwa zawonso ko ditwasanga nluta. Bak’e nzengo omwene vo zambote kwa ngeye. Badika nona kia Natalie. * Wavova vo: “Longo lwakiese yavavanga. Kansi yamona vo kilendi kala ye longo lwakiese ko avo kiyambwidi ko mpil’a zingu yanatanga. Kuna sikola, akundi awonso akwa ngangu bakala. Kansi, ke babakanga nzengo zambote ko muna zingu kiau. Ke basikilanga ye makangu ko. Nze yau, omono mpe makangu mayingi yakala mau. E mpil’a zingu kiaki kiantwasila mpasi zayingi muna ntima.”

Natalie wayantika longoka Nkand’a Nzambi ye Mbangi za Yave. Wavova vo: “Vana vena Mbangi za Yave, yamona aleke ayingi bakala ye kiese ye akazi bakala ye longo lwakiese. Kana una vo diampasi diakala, malembe-malembe yayantika soba e fu yame.” Nkia nluta diatwasa? Natalie wavova vo: “Yazolanga vo yasompana ye yakala dina ntoma yangalela. Kansi kuna kwalanda, yasompana ye yakala diasambilanga  Yave nze mono. Imonanga vo Nzambi wampana longo lwakiese lutila nkutu luna yayindulanga.”

3 Talanga Kwandá

Muna venga e fu kia sia e sungididi muna nluta olenda vwa owau, ofwete yindulanga e mpila zingu ozolele kala kiau kuna sentu yo sia e ngolo mu lungisa ekani diaku. (Ngana 21:5) Kuyindudi kaka ko e zingu kiankufi kia mvu 70 yovo 80 kina o muntu kalenda zinga. Kansi, yindulanga mpe e zingu kia kwele mvu okala kiau kina Nkand’a Nzambi keyikanga.

Nkand’a Nzambi usonganga vo muna kimenga kia Kristu Yesu kia lukûlu, Nzambi waziula nzila kimana wantu bavwa moyo a mvu ya mvu. (Matai 20:28; Roma 6:23) Nzambi osianga nsilu vo ke kolo ko ekani diandi mu kuma kia wantu ye ntoto dilungana. Awana bezolanga Nzambi bekala y’elau dia zinga yakwele mvu ova ntoto ukituka se paradiso. (Nkunga 37:11; Lusengomono 21:3-5) Ongeye mpe olenda vwa zingu kiaki avo kwandá otalanga.

4 Vanga Mawonso mu Lungisa Makani Maku

Adieyi olenda vanga mu vwa zingu kiaki kuna sentu? Diantete, yantika vwa zayi wa Nzambi. (Yoane 17:3) O zayi wa Nkand’a Nzambi ukusadisa mu kala ye vuvu vo e nsilu mia Nzambi milungana kikilu. Lukwikilu lwalu lulenda kuvana o nkuma wa soba konso diambu mu vwa edienga dia Nzambi.

Badika e nona kia Michael. Wavova vo: “Vava yakala ye mvu 12, yayantika nua malavu mankolwa ye diamba. Yakota muna buka kia yimpumbulu yo mona vo kikuyilungisila mvu 30 ko mfwidi. Nkumbu miayingi yavava kuyivonda mu kuma kia makasi ye mpasi za zingu. Zingu kiakaka kiambote yavavanga, kansi kialendanga kio solola ko.” Ekolo Michael katanganga sikola, mosi muna buka kiau kia yimpumbulu wayantika longoka Nkand’a Nzambi ye Mbangi za Yave. Michael mpe watambulwila longoka.

Mana Michael kalongokanga muna Nkand’a Nzambi masoba e mpila kabadikilanga e zingu kiandi kia kusentu. Wavova vo: “Yalongoka vo kuna sentu, o ntoto ukituka se paradiso muna wantu bezingila kuna luvuvamu ye kondwa wonga. Zingu kiaki yavavanga. O kala ye ngwizani ambote yo Yave diakituka s’ekani diame. Kansi, diampasi diakala muna yangidika Yave. Kana nkutu vava yayantika longoka Nkand’a Nzambi, ezak’e ntangwa yakolwanga malavu. Lumbu kimosi, yavukana nkutu yo mwan’a ndumba mosi.”

Nki kiasadisa Michael mu yambula mavangu mambi yo soba mpila zingu kiandi? Wavova vo: “Mpangi walongokanga yame Nkand’a Nzambi wankasakesa mu tanganga Nkand’a Nzambi lumbu yawonso yo vanga kikundi y’awana bazolele yangidika Nzambi. Yabakula vo akundi yakala yau bamfilanga mu vanga mambu mambi. Kana una vo bakituka nze yitu yame, yayambula kangala yau.”

Michael wayisila makani kalenda lungisa mu nzaki yo sola mambu kafwete sia va fulu kiantete kimana kalungisa ekani diandi dia zingila e ngwizani ye nkanikinu mia Nzambi. Ongeye mpe olenda vanga diau adimosi. Soneka makani olenda lungisa kuna sentu ye mana olenda vanga muna lungisa makani mama. Zayisa makani mama kw’awana balenda kusadisa yo kubalomba vo bazayisa kana vo una mo lungisa.

Kuyambula longoka mu kuma kia Nzambi ko yo lemvokela luludiku lwandi muna zingu kiaku. Owau, vang’e mambu malenda siamisa o zola kwaku muna Nzambi yo muna Diambu diandi. Mu kuma kia muntu ona olemvokelanga nkanikinu mia Nzambi, Nkand’a Nzambi uvovanga vo: ‘Mawonso kevanga mesikila.’—Nkunga 1:1-3.

[Mvovo Vana Yand’a lukaya]