FINAMA NZAMBI
Yave ‘Kesianga Mpambula Ko’
Nga wamona kala e mpasi za siwa e mpambula? Nga wavezwa kala, lembi vewa salu mu kuma kia nkanda aku a nitu yovo lusansu lwaku? Avo i wau, zaya wo vo ke ngeye kaka ko wabwila e diambu diadi. Kansi, e nsangu zambote ezi: Mambu mama mevangamanga kaka mu nza, ke kun’ezulu ko. Petelo wa ntumwa wavova kuna ziku kiawonso vo: ‘Nzambi kesianga mpambula ko.’—Tanga Mavangu 10:34, 35.
Petelo wayika mvovo miami vava kakala muna nzo ya Koneleo wa mwisi Zula. O Petelo wa Nyuda, wazingilanga mu ntangwa ina Ayuda babadikilanga esi zula vo bafunzuka yo lembi vanga yau kikundi. Ekuma Petelo kakotela mu nzo ya Koneleo? E kuma kadi, Yave wa Nzambi wantuma. Nzambi wavovesa Petelo muna mona-meso kansonga vo: ‘Yambula yikila lekwa ina Nzambi kavelelese vo yafunzuka.’ Petelo kazaya wo ko vo vitila lumbu kiakina, muna mona-meso kasongwa Koneleo, wamona mbasi ona wamvovesa vo kabokela Petelo. (Mavangu 10:1-15) Vava kabakula luzolo lwa Yave, Petelo kayambula vova ko.
O Petelo wavova vo: ‘Kieleka mbwene wo vo o Nzambi kesianga mpambula ko.’ (Mavangu 10:34) E mvovo wa Kingerekia wasekolwa vo “sia mpambula,” usongele vo “tala ndose.” Nkwa ngangu mosi wasasila mvovo wau mu mpila eyi: “E mvovo wau uyikilanga mfundisi ona otalanga ndose a muntu yo baka nzengo. Kabakidi nzengo zazi ko wau vo muntu kuma kavwidi kansi, mu kuma kia ndose andi.” Nzambi kesianga mpambula ko mu kuma kia nkanda a nitu yovo nsi.
Kansi, Yave ntim’eto ketalanga. (1 Samuele 16:7; Ngana 21:2) Petelo wavova diaka vo: “Muna zula yawonso, on’okumvumina yo vanga nsongi, wina y’edienga oku kena.” (Mavangu 10:35) Ovumina Nzambi disongele vo kunzitisa, kumbunda e vuvu yo lembi vanga dina kemenganga. O vanga oma mansongi disongele vo vanga edi diambote vana meso ma Nzambi. Yave oyangalelanga ntima wa ndiona okumvuminanga yo vanga edi diambote.—Nsiku 10:12, 13.
Vava Yave ketalanga ova ntoto, kanda dimosi kaka kemonanga, kanda dia wantu
Avo wasiwa kala mpambula, olenda kasakeswa mu mvovo mia Petelo mu kuma kia Nzambi. O Yave otuntanga wantu a zula yawonso muna nsambila aludi. (Yoane 6:44; Mavangu 17:26, 27) Nzambi owanga e sambu y’asambidi andi awonso, lembi tala nkanda a nitu yovo zula kiau. (1 Ntinu 8:41-43) Tulenda kala ye vuvu vo vava Yave ketalanga ova ntoto, kanda dimosi kaka kemonanga, kanda dia wantu. Nga ozolele longoka mambu makaka mu kuma kia Nzambi ona olembi sianga mpambula?
Ntangilu a Nkand’a Nzambi mu Ngonde ya Yuni
