Nkia mpila lukau lukuyangidikanga? Tuyangalalanga vava muntu kekutukayilanga kuna mvevo lembi komekenwa. Ekani difilanga muntu mu vana i diambu disundidi o mfunu oku kwa yeto yo kwa Nzambi. Badika e mvovo miavumunwinwa mia Paulu wa ntumwa muna 2 Korinto 9:7.

Ekuma Paulu kasonekena e mvovo miami? Paulu wakasakesa Akristu kuna Korinto kimana basadisa mpangi zau ana bakala mu mpasi kuna Yuda. Nga Paulu wakomekena Akristu kuna Korinto mu vana tukau? Ve, kadi wasoneka vo: “Yambula konso muntu kavanga una kakanini muna ntim’andi, ke ku ntantu ko, ngatu ku nkomena: kadi Nzambi ozolele mvani amvevo.” Yambula twabadika elongi diadi.

“Konso muntu kavanga una kakanini muna ntim’andi.” Paulu wasonga vo Nkristu akieleka, ovananga “una kakanini muna ntim’andi.” Vana ntandu, Nkristu akieleka osianga e sungididi muna nsatu za mpangi zandi za mwanda. Nkwa ngangu mosi wavova vo, o mvovo wa Kingerekia wasekolwa vo “una kakanini” usongele vo “una katekele kana.” O Nkristu akieleka ovavanga zaya e nsatu za mpangi zandi yo kiyuvula vo, adieyi mfwete vanga muna lungisa nsatu zazi?—1 Yoane 3:17.

“Ke ku ntantu ko, ngatu ku nkomena.” Paulu wayika mpila zole za vanina tufwete venga, i sia vo, vanina kuna lukatikisu yovo kuna kingolo. Nkanda mosi uvovanga vo: O muntu ovaninanga kuna lukatikisu yovo kuna kingolo, “okendalalanga vava kevananga e nzimbu zandi.” Ndiona ovaninanga kuna kingolo, ovananga wau vo okomekenwanga. Nani ozolanga tambula lukau luvaninu kuna lukatikisu yovo kuna kingolo?

“Nzambi ozolele mvani amvevo.” Paulu wavova vo, avo Nkristu obakidi nzengo za kaya, kafwete vanina kuna mvevo ye kiese. Dialudi, ovanina kuna mvevo kiese ditwasanga. (Mavangu 20:35) Ndiona ovaninanga kuna mvevo okalanga ye kiese. O mvovo “kuna mvevo” usonganga una muntu kemonanga muna ntima, usonganga mpe kiese kia muntu vana luse lwandi. O mvani amvevo oyangidikanga wantu yo Nzambi. Nsekola imosi ya Nkand’a Nzambi isasilanga sono kiaki mu mpila eyi: “Nzambi ozolanga ndiona ozolanga kaya.”

E mvovo mia vumunwinwa mia Paulu wa ntumwa, i luludiku lusadisanga Nkristu mu vana. Vava tusadilanga e ntangwa eto, ngolo ye mavwa meto, yambula twasadilanga mo kuna ntim’amvevo, kadi tukala ye kiese kia vana kw’akaka, musungula ana bakondelo. Avo tuvanini kuna mvevo, ke tumona kaka kiese ko, kansi tuvwa mpe edienga dia Yave, kadi ‘Nzambi ozolanga mvani amvevo.’