Nga wakendalala kala yamu tezo kiadila?— * Nanga yeto awonso twakendalala kala. Ezak’e ntangwa, tulenda dila mu kuma kia nkenda. Akaka balenda kutuvunina mambu. Ediadi dilenda kutukendeleka ke wau ko?— Nzambi mpe olenda kendalala avo bamvunini diambu. Owau, yambula twavovela diambu diadi yo zaya una tulenda yangidikila Nzambi yo lembi kunkendeleka.

Nkand’a Nzambi usonganga vo akaka bevovanga vo Nzambi bezolanga, kansi ‘bekumwesanga ntantu’ yo ‘kunkendeleka.’ Kana una vo i wau, ke vena muntu ko olenda lweka e nitu a Yave wa Nzambi, kadi Yandi i Mpungu-ngolo. Owau, yambula twazaya e kuma Yave kemwenanga ntantu vava tulembi vanganga mana kekutuvovesanga.

Wantu antete kavanga o Yave ova ntoto, ntantu zayingi bamwesa. Wantu awaya basiwa muna Paradiso yakala ova ntoto, yayikilwanga vo “mpatu a Edene.” Nga ozeye nkumbu zau?— Ingeta, Adami yo Eva. Owau, tutala dina bavanga edi diakendeleka Nzambi.

Vava Yave kabasia muna mpatu, wabazayisa vo balunga-lunga yo. Wabazayisa mpe vo bawuta wana yo zingila kumosi muna mpatu yayina lembi fwa. Kansi, una Adami yo Eva ke bawutidi wana ko, vabwa diambu diampasi. Nga ozeye dina diavangama?— Mbasi mosi wavukumuna Eva yo Adami kimana bakolamena Yave. Tutala dina diavangama.

Mbasi ndioyu wasadila nioka muna vova. Eva wasia sungididi muna nioka wau kamvovesa vo okituka “nze Nzambi.” Eva wavanga dina nioka kamvovesa. Nga ozeye dina kavanga?—

Eva, wadia nti una Yave kabakanikina vo ke badie ko. Vitila kavanga Eva, Yave wavovesa Adami vo: ‘Konso nti wina muna mpatu, dia kwaku, vo i nti a zayila wete yo bi, kudie wo ko: kadi muna lumbu odia wo, fw’ofwa.’

Eva watoma zaya nkanikinu wau. Kansi, wau vo wakwamanana tala o nti wauna, wamona vo “wambote muna dia, yo wete muna meso . . . ovelele bundu, odidi.” I bosi, wavana kio kwa Adami, ‘yandi mpe, odidi.’ Ekuma kadila kio?—E kuma kadi Adami wa luta zola Eva ke mu Nzambi ko. Adami wavanga luzolo lwa Eva vana fulu kia vanga luzolo lwa Nzambi. Kansi, olemvokela Yave disundidi o mfunu ke mu lemvokela muntu ko.

Nga osungamene nioka yamokena yo Eva? Nze una nkwa ngangu kalenda vanga mu songa vo e bulu yovo teke mu vova kina, muntu mosi wasadila nioka mu songa vo vova kavovanga. Ndinga ya nani yavaikilanga muna nioka?—I ndinga ya “niok’ankulu, una vo, Nkadi ampemba, wa Satana.”

Nga ozeye una olenda yangidikila Yave?—Muna lemvokelanga Yave lumbu yawonso. Satana wavova vo ovukumuna wantu awonso kimana bavanga luzolo lwandi. Kansi, Yave okutuwondelelanga vo: “Lungalala, e mwan’ame [ayakala yovo akento], wamwesa ntim’ame e kiese, Yavana mvutu kwa ndion’okunsemba.” Satana, Yave kevezanga. Satana ovovanga vo olenda vukumuna wantu awonso kimana bansadila. Muna kuma kiaki, vanga mawonso muna yangidika Yave muna kunlemvokelanga yo kunsadila. Nga osia ngolo muna vanga wo?—