Vioka tezo kia nkama yá za mvu tuka nkand’a nsuka a sono kia Kiyibere wasonekwa, o ungunza wa Mika mu kuma kia Masia walungana: Yesu wawutukila kuna Beteleme. Vioka mvu 30, i sia vo, muna mvu a 29 wa tandu kieto, e ndambu antete ya ungunza wa Daniele mu kuma kia ngiz’a Masia walungana. Yesu wavubwa ye Nzambi wankusa yo mwand’avelela. Muna ntangwa yasikidiswa, Masia wa Mbongo yasilwa o nsilu, wayiza.

Vana vau, Yesu wayantika salu kia ‘samuna nsangu zambote za kintinu kia Nzambi.’ (Luka 8:1) Nze una wasakulwa, Yesu wasonga vo nkwa ngemba kakala, nlembami ye watokanenanga ewete diakaka. Malongi mandi ma nzolwa nluta matwasanga, wawukanga mpe wantu bakala ye “mayela mawonso ye yimbevo,” kadi Nzambi wakala yandi. (Matai 4:23) Wantu a mpila zawonso bayendanga kwa Yesu yo vova vo: “Tusolwele Masia.”—Yoane 1:41.

Yesu wasakula vo una luyalu lwandi ke lwayadidi ko, e nza yadi kala ye vita, nzakama za ntoto ye mpasi zakaka. Muna kuma kiaki, wawondelela wantu awonso vo, “nuyingila.”—Maku 13:37.

Yesu muntu alunga kakala ye wakwamanana lemvokela Nzambi, kansi wakala ye mbeni ezi zamvondesa. Lufwa lwandi lwatuvana elau dia vwa moyo a mvu ya mvu una Adami yo Eva bavidisa.

Lufwa lwa Yesu ungunza lwalungisa. Vioka lumbu tatu, Nzambi wafula Yesu se vangwa kia mwanda kia nkuma. I bosi, Yesu wamoneka kwa vioka 500 za alongoki andi. Una katombokele ko kuna zulu, wavana kiyekwa kw’alongoki andi kia samuna nsangu zambote mu kuma kiandi ye Kintinu kiandi kwa “zula yawonso.” (Matai 28:19) Yamu nkia tezo balungisila kiyekwa kiaki?

—Dibongelo muna Matai, Maku, Luka, Yoane, 1 Korinto.