NTU A DIAMBU WA FUKWA | LUVUNU LUFILANGA WANTU MU LEMBI ZOLA NZAMBI
Luvunu lwa Sia vo Nzambi wa Mpimpita
WANTU ADIEYI BEKWIKILANGA?
Mabundu ma Kikristu kia Kimpangila nze Katolika, Protestante ye Ortodoxa, nzambi mu ntatu bekwikilanga. Nzambi Ese, Nzambi Mwana yo Nzambi Mwand’avelela. Dibundu dia Katolika dilonganga vo nzambi mu ntatu ke nzambi zitatu ko, kansi wantu tatu mu nzambi mosi kaka.”—Nova Enciclopédia Britânica.
LUDI KIA NKAND’A NZAMBI.
Yesu wa Mwan’a Nzambi kasidi vova ko vo yandi yo Se bafwanana. Kansi, wavova vo: “Kwenda nkwenda . . . kwa Se: e kuma kadi, o Se unsundidi.” (Yoane 14:28) Wavovesa mpe kwa mosi muna alongoki andi vo: “Tomboka ntomboka kw’ediame Se, w’edieno Se, y’eyame Nzambi, wa Nzambi eno.”—Yoane 20:17.
Mwand’avelela ke muntu ko. Akristu a tandu kiantete ‘bazala yo mwand’avelela.’ Yave wavova vo: ‘Bungula mbungul’o mwand’ame muna nitu zawonso.’ (Mavangu 2:1-4, 17) O mwand’avelela ke Nzambi mu Ntatu ko, kansi nkum’a Nzambi.
EKUMA DIADI DININA DIAMFUNU?
Karl Rahner yo Herbert Vorgrimler bena vo alongi muna dibundu dia Katolika bavova mu kuma ki’elongi dia Nzambi mu Ntatu vo: “Elongi diadi kana una vo diasengomonwa, kansi ke dibakulwanga ko.” Nga olenda zola muntu olembele zaya? Elongi dia Nzambi mu Ntatu dikakidilanga wantu mu lembi zaya yo zola Nzambi.
Marco, ona oyikilu kala mun’elongi diantete wabadikilanga elongi dia Nzambi mu Ntatu nze nkaku. Wavova vo: “Yabadikilanga Nzambi nze yandi wakiswekanga, wavavuka wantu, wa mpimpita ye katulendi kumfinama ko.” Kansi, Nzambi ke ‘Nzambi wa mvwanga ko.’ (1 Korinto 14:33) Yandi ke kuyiswekanga ko, ozolele vo twanzaya. Yesu wavova vo: ‘Oyeto tusambilanga ona tuzeye.’—Yoane 4:22.
Marco wavova diaka vo: “Vava yalongoka vo Nzambi ke Nzambi mu Ntatu ko, yayantika vanga yandi kikundi.” Avo tukwikidi vo Yave una ye ke Nzambi wa mpimpita ko, ke dikala diampasi ko muna kunzola. Nkand’a Nzambi uvovanga vo: “Ndion’olembi zola, kazeye Nzambi ko, kadi Nzambi i zola.”—1 Yoane 4:8.
