“Nga kuvwanga Nzambi mfunu ko? Ayingi bemonanga vo ke bena yo mfunu a Nzambi ko.” Buka kimosi kia mindembi kwikila batwika nsangu muna internete vo ke bavwidi Nzambi mfunu ko.

Kuna diak’esambu, ayingi muna awana bevovanga vo bekwikilanga mu Nzambi, besonganga muna mavangu mau vo Nzambi kena ko. Salvatore Fisichella wa nlongi a dibundu dia Katolika wavova mu kuma ki’asambidi a dibundu diandi vo: “Avo muntu ututadidi ke kwikila ko vo tw’Akristu, kadi e mpila zingu kieto kiafwanana ye kia mindembi kwikila.”

Akaka ke bekalanga ye ntangwa ya yindula mambu ma Nzambi ko. Kuna kwa yau, Nzambi wavambuka wantu ye kalendi vanga diambu ko muna wete diau. Akaka bevavanga kaka Nzambi vava bekalanga muna mpasi.

Akaka ke besadilanga malongi ma mabundu mau ko kadi beyindulanga vo ke mena kwandi mfunu ko. Muna bonga e nona, kuna Alemanha vana vena wantu nkama, 76 muna yau bekwikilanga vo ke diambi ko nkento yo yakala bazinga kumosi lembi kazala kana una vo malongi ma dibundu diau yo Nkand’a Nzambi utumbanga evangu diadi. (1 Korinto 6:18; Ayibere 13:4) Wantu a mabundu makaka mpe, bebakulanga vo ayingi ke bezingilanga ngwizani ko ye malongi ma mabundu mau. Afidi a mabundu mayingi bekendalalanga wau vo minkwikizi miau bezingilanga nze “mindembi kwikila.”

E nona yayi ifilanga wantu mu kukiyuvula vo: Nga Nzambi kikilu tuvwidi o mfunu? E kiuvu kiaki ke kiampa ko. Kiayikwa kala muna lubantiku lwa Nkand’a Nzambi. Muna baka mvutu za kiuvu kiaki, yambula twafimpa e mpaka ziyikwanga muna nkanda Etuku.