E nkel’a za tukau muna tempelo, vana yanzala kia akento zakalanga. O nkanda, O Templo—Seu Ministério e Seus Serviços uvovanga vo: “Muna yaka mwatungwa nkela yovo “mpungi” kumi ye tatu, i muna mwasiwanga tukau.”

E nkela zazina zayikilwanga vo mpungi wau vo zakala nze nkalu, i sia vo nua wakete ye batu dianene. Konso nkela yavangilwa mun’owu wa lukau ifwete siwa, o tukau twatu twasadilwanga mu mpila yaswaswana. Yesu wakala vana yanzala kia akento vava kamona wantu ayingi bavananga tukau kumosi yo nkento a nsona.—Luka 21:1, 2.

Muna nkela ya 1 ye ya 2, mwasiwanga nzimbu za mpaku a tempelo. E Nzimbu zasiwanga muna nkela ya 3 yakuna nkela 7, zasadilwanga muna sumba mayembe, mabaya, ndumbu ye yinzu ya wolo. Vava muntu katwasanga nzimbu zisundidi muna sumba lekwa yayi, diavavanga vo kasia zo muna nkela zakaka. Muna nkela ya 8 i mwasiwanga nzimbu za yimenga y’esumu. Muna nkela ya 9 yakuna 12, mwasiwanga nzimbu za tukau tw’ekuzuka, i sia vo, yimenga ya nuni, tukau mu kuma kia Anazali ye akwa wazi. E nkela ya 13 yasiwanga tukau twamvevo.

Luka wasoneka o nkanda uyikilwanga muna nkumbu andi kumosi yo nkand’a Mavangu. Luka wavova vo: “Yatoma mo kunka mawonso tuka kuna ntete.” Kansi, akwa ngangu ayingi bekatikisanga lusansu lwandi. (Luka 1:3) Nga lusansu lwandi lwa ludi kikilu?

Luka wasoneka mambu ma lusansu lulenda fimpululwa. Muna bonga e nona, Luka wasoneka mazina bayikilwanga e mbanda-mbanda za Roma muna konso mvivu. Kuna Filipi bayikilwanga vo nyazi, kuna Tesalonika vo mfumu z’evata, kuna Efeso vo mingwizi. (Mavangu 16:20; 17:6; 19:31) Luka wayikila Erodi Antipa vo nkumbi, o Sengio Paulu vo nkumbi a Kupero.—Mavangu 13:1, 7.

E mpila ina Luka kasadila mazina mama yamfunu kikilu, kadi e nsobani zavangwanga muna konso mvivu wa Roma, zasobanga mpe mazina ma ayadi a zunga yayina. Bruce Metzger wa nkwa ngangu ofimpanga oma ma Nkand’a Nzambi wavova vo, “mazina meyikwanga muna lusansu lwa Mavangu, ngwizani mena ye fulu ye kolo kiakina.” William Ramsay wa nkwa ngangu wayikila Luka vo “nzingudi a lusansu ona osundidi.”