“ZAMBI i mwanda,” ke monekanga kwa wantu ko. (Yoane 4:24) Kansi, Nkand’a Nzambi uvovanga vo vena yo wantu bamona Nzambi. (Ayibere 11:27) Aweyi diambu diadi diavangamena? Nga olenda kikilu mona Nzambi ona ‘olembi monekanga?’—Kolosai 1:15.

Tulenda tezanesa zingu kieto yo muntu una vo mpofo. Avo muntu mpofo, nga disongele vo kalendi bakula ko e lekwa inzungidi? Ve. O mpofo una ye mpila zayingi za zayila wantu, lekwa ye mana mevangamanga vana kena. Mpofo mosi wavova vo, “muntu kemwenanga kaka mu meso ko, kansi muna ngindu mpe.”

Diau adimosi mpe, kana una vo kulendi mona Nzambi muna meso ko, kansi olenda kumona muna “meso ma ntima.” (Efeso 1:18) Badika mambu tatu ofwete vanga.

O mpofo, osadilanga matu ye moko muna bakula e lekwa ina kalendi mona ko. Diau adimosi mpe ngeye, olenda sadila matu ye meso muna fimpa yo bakula lekwa kavanga Nzambi ona olembi monekanga. “Oma ma yandi malembi monakana, matomene moneka tuka kun’esemo dia nza, wau mazayakenene muna lekwa yavangwa.”—Roma 1:20.

Muna bonga nona, badika mpila yavangilwa e nza. Nzambi wavanga ntoto kimana twazinga ye kiese. Vava tudianga bundu kia sukadi, tubakanga e vento yo mwini, yo wá nuni ziyimbilanga, tutoma yanganlalanga. Nga tukau twatu ke tusonganga ko vo Mvangi eto nkwa nzola, ntim’amvevo ye ngemba?

Adieyi olenda longoka mu kuma kia Nzambi muna nsema? Diantete, zulu disonganga nkum’a Nzambi. Akwa ngangu bevovanga vo e nza mu wokela ina muna nzaki zawonso. Vava omonanga zulu dia zala ye ntetembwa, ukiyuvula: ‘Nani wavanga zo?’ Nkand’a Nzambi kikutuzayisanga vo o Mvangi ovwidi “nkuma.” (Yesaya 40:26) E lekwa kavanga o Nzambi ikutusonganga vo yandi i “Mpungu-ngolo.”—Yobi 37:23.

Ngudi mosi una yo wana wole ampofo wavova vo: “O vova i mpila yambote belongokelanga. Ikubazayisanga konso lekwa mbwene yovo diambu ngwidi, ikalanga yakubama muna sasila konso diambu. Mono i meso mau.” Diau adimosi, kana una vo ‘ke vena muntu ko wamona’ Nzambi, Yesu wa mwan’a Nzambi ‘ona wina muna nkat’a S’andi’ okutuzayisanga oma ma yandi. (Yoane 1:18) Nze vangwa kiantete ye Mwan’a mosi kaka a Nzambi, Yesu wakituka se “meso” meto kuna zulu. Yesu wafwana kikilu mu kutuzayisa oma ma Nzambi olembi monekanga.

Tala mana Yesu ona wazinga mvu miayingi yo S’andi kavova mu kuma kia Nzambi:

• Nzambi nsadi afululu. “O S’ame osalanga yamu wau.”—Yoane 5:17.

• Nzambi ozeye nsatu zeto. “O S’eno ozeye eki nukondelo, una ke nwanlombele ko.”—Matai 6:8.

•  Nzambi okutuvananga ina tuvwidi o mfunu. “Es’eno wina kun’ezulu, . . . odungumunanga ntangw’andi vana vena wantu ambi yo wantu ambote, yo nokesanga mvula vana ven’asongi, y’ana balembi songa.”—Matai 5:45.

• Nzambi ovwanga konso muntu o mfunu. “Nga ntietie zole, ke zau ko, zatekwa muna mbiy’e? Kansi vava zina, ke vena imosi ibw’ova ntoto ko, ovo ke mu S’eno ko, vo i nsuki zeno za ntu nkutu, zavwa tangwa. Dianu vo, ke numoni wonga ko, ntietie zingi nusundidi.”—Matai 10:29-31.

E mpila ampofo bebakulwilanga mambu yaswaswana y’awana bemonanga. Kana una vo ampofo ke bemonanga viozi ko, kansi bebakulanga vo viozi kina vo. Nze una mpofo ke lembi mwenanga viozi yovo ntemo, yeto mpe ka tulendi bakula ko oma ma Yave muna ngangu za yeto kibeni. Muna kuma kiaki, Yave watufidila muntu ona watanginina e fu ye kiwuntu kiandi mu mpila yalunga.

O muntu ndioyo i Yesu. (Filipi 2:7) O Yesu kavova kaka oma ma S’andi ko, kansi watusonga mpe fu ya Nzambi. Filipi wa nlongoki a Yesu wanlomba vo: ‘E Mfumu, utusonga o Se.’ Yesu wamvutula vo: ‘Ona umbwene, omwene o Se.’ (Yoane 14:8, 9) Adieyi olenda ‘mona’ mu kuma kia Se muna mavangu ma Yesu?

Yesu muntu ambote kakala, nlembami ye wazolakananga kwa wantu. (Matai 11:28-30) E fu kasonga yafila wantu muna kumfinama. Yesu wakendalala mu kuma kia mpasi z’akaka ye kubasadisa. (Luka 10:17, 21; Yoane 11:32-35) Vava otanganga yovo wá lusansu lwa Yesu muna Bibila, vava lo bakula yo kuyimwena nze kwa ngeye mevoveswanga. Avo obadikidi una Yesu kakadilanga yo wantu, dikusadisa mu toma zaya e fu ya Nzambi yo Kumfinama.

Nsoneki mosi wavova mu kuma kia mpila ina mpofo kebakulwilanga lekwa inzungidi vo: “O mpofo obakulanga mambu muna simba e lekwa, wá nsunga, wá mazu yovo nkuzu ye makaka mpe.” Diau adimosi, vava omonanga nsema, tanga mana Yesu kavova mu kuma kia Se diandi, fimpa una Yesu kasongela fu ya Nzambi, dikusadisa mu toma zaya Yave.

O Yobi ndiona wazinga kuna nz’ankulu wamona e ziku kia diambu diadi. Entete wavova ‘lembi bakula.’ (Yobi 42:3) Kansi vava kabadika masivi ma nsem’a Nzambi Yobi wavova vo: “Nsamu aku yawa wo muna ngw’a matu, kansi owau disu diame dimwene.”—Yobi 42:5.

Ngeye mpe olenda mona e ziku kia diambu diadi. “Ovo okuntomba [Yave], osolok’oko wina.” (1 Tusansu 28:9) Mbangi za Yave bekala ye kiese kia kusadisa mu zaya Nzambi ona olembi monekanga.