Muna malongi mavitidi, nanga omwene vo Kintinu kia Nzambi mfunu kikilu kina kwa Mbangi za Yave. Nanga osivikidi e nsilu mia Kintinu kia Nzambi tubadikidi. Kansi, nanga olenda kukiyuvula kana vo nsilu miami miakieleka.

Dialudi vo fwete kala ye ngangu kimana walembi kwikila mu konso diambu owanga. (Ngana 14:15) Avo ovangidi wo, e ngangu zaku zikala nze za esi Beroya kuna nz’ankulu. * Vava bazayiswa nsangu zambote za Kintinu, esi Beroya ke batambulwila kaka ko lembi kala ye ziku kana vo e nsangu zazina zaludi. Kansi, bafimpa e Sono muna zaya ‘kana vo mambu mama i una mena.’ (Mavangu 17:11) Kuna kwalanda, bakala ye ziku vo e nsangu zambote bawa mu Diambu dia Nzambi kikilu zatuka.

Mbangi za Yave kuna ngemba zawonso balombele wavanga diau adimosi. Muna nkubika eto ya longi dia Bibila dia ngovo, tuvene lau dia tezanesa mana Mbangi za Yave bekwikilanga mu kuma kia Kintinu kia Nzambi ye mana melongwanga muna Bibila.

Vana ntandu, longi diaku dia Bibila dilenda kusadisa mu zaya e mvutu za yuvu yayi ya mfunu:

• Akweyi twatuka?

• Adieyi i kani dia zingu?

• Ekuma Nzambi keyambulwilanga e mpasi?

•   Adieyi dikutubwilanga vava tufwanga?

• Nga e nza ifwaswa mvimba?

• Azeyi i nsabi muna kala ye zingu kia nzo kiakiese?

Vana ntandu, e longi dia Bibila dikusadisa muna “finama Nzambi.” (Yakobo 4:8) Ekolo okwamanana finama Nzambi, e Kintinu kia Nzambi kikutwasila nluta owau ye nsambu zakwele mvu. Yesu wasamba kwa S’andi vo: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.”—Yoane 17:3.