Yindula una luyalu lwa nza mvimba lulenda twasila nluta kwa wantu awonso. O unu, wantu ayingi bemonanga mpasi wau vo asukami, kansi akaka bavuama. Kansi, luyalu lwa nz’amvimba lusonganga nkenda lulenda bakula nsatu za wantu awonso yo lungisa zo. Nga wantu balenda sikidisa luyalu lwa mpila yayi?​—Tanga Yeremiya 10:23.

Muna lusansu lwawonso, tuyalu ke tulendanga lungisa nsatu za nkangu ko musungula nsatu z’asukami. Tuyalu twankaka twa nsoki. (Kimpovi 4:1; 8:9) Kansi, Nzambi wa Mpungu-ngolo wasia nsilu vo osikidisa luyalu luvinga vana fulu kia tuyalu twatu twawonso. O Nyadi a luyalu lwalu olungisa nsatu za wantu awonso.​—Tanga Yesaya 11:4; Daniele 2:44.

Yave wa Nzambi wasola Yesu wa Mwan’andi mu kala Nyadi a luyalu lwa nza yawonso. (Luka 1:31-33) Vava kakala ova ntoto, Yesu wasadisanga wantu. Muna luyalu lwandi, Yesu oyikakesa wantu a zula yawonso yo fokola mpasi zawonso.​—Tanga Nkunga 72:8, 12-14.

Nga wantu awonso besinga tambulwila Yesu nze Nyadi au? Nkatu. Kansi, Yave nkwa luzindalalu. (2 Petelo 3:9) Ovananga wantu e lau dia tambulwila Yesu kakala Nyadi au. Ke kolo ko, Yesu ofwasa wantu awonso ambi yo sikidisa luvuvamu ova ntoto.​—Tanga Mika 4:3, 4.