Bibila kivovanga vo e mbaninu lufwasu itwasa: ‘Mukala mpasi zayingi zina ke zateka kala ko tuka kuna lubantiku lwa nza yamu wau . . . E lumbu yayina, kele vo ka ikufikwa ko, nga ke vadi vuluka muntu ko.’ (Matai 24:21, 22) Kansi, Nzambi osianga nsilu vo wantu ayingi bevuluka: “E nza mu vioka ina . . . , kansi ndiona ovanganga luzolo lwa Nzambi, zinga kezinga yakwele mvu.”​—1 Yoane 2:17.

Adieyi ofwete vanga muna vuluka mu nza yayi iviokanga kimana ‘wazinga yakwele mvu?’ Nga ofwete kubika madia yovo mavua? Nkatu. Bibila kikutuzayisanga e mambu tufwete sia va fulu kiantete. Kivovanga vo: ‘Wau vo e lekwa yayi yawonso izeloka nzeloka yayi, nuyindula mpila wantu nufwete kala muna nkadilu yavauka ye mavangu ma vumi wa Nzambi, wau nuvingilanga yo sutila e ngiz’a lumbu kia Yave.’ (2 Petelo 3:10-12) E sono kiaki kisonganga vo e ‘lekwa yayi’ izeloka yovo ifwaswa i tuyalu twa wantu ye awonso beyikamanga tuyalu twatu yo sia luyalu lwa Nzambi kimbeni. Ozevo, avo tukivene muna kubika mavua, ediadi ke dikutuvuluza ko muna lumbu kia lufwasu.

Muna vuluka tufwete sia ngolo za longoka mayingi mu kuma kia Yave wa Nzambi ye fu ikunyangidikanga. (Sefaniya 2:3) Vana fulu kia vukumunwa kwa wantu yo veza mambu mesonganga vo mu lumbu yambaninu tuzingilanga, tufwete ‘vingilanga yo sutila e ngiz’a lumbu kia Yave.’ Mbangi za Yave balenda kusonga muna Bibila dina ofwete vanga owau muna vuluka mu lumbu kiakina.