Mu zunga kia usukami kia mbanza Montreal yasansukila. Se diame wafwa vava yakala ye ngonde 6, ngudi ame wasala ye mbebe ya yakutulunga-lunga. Mono i mwana ansuka muna wana 8 twawutuka.

Ekolo yakolanga, yakivana muna fu kia nua droga (lekwa ya nkolwa), nsaka za bakila nzimbu, mavangu mansoki yo kangala ye yimpumbulu. Vava yalungisa mvu 10, yayantika sadila akento a ndumba, yadevesanga mpe nzimbu ye kani dia tambula nluta (juros). Nkumbu miayingi yavunanga yo yangalela vunginika wantu mu mpila zayingi. E diambu diadi diakituka se fu kiame.

Vava yalungisa mvu 14, e ndekwa zame za vunginika wantu zawokela. Muna bonga e nona, yasumbanga lolonzi, nlunga mia moko ye nela zayingi za lengwa wolo, kansi mono yasobanga sinsu ya lekwa yayi kimana wantu babanza vo ya wolo kikilu, i bosi yatekololanga yo kwa wantu muna nzila ye muna fulu yaningamena makalu mu ntalu yayingi. Yatoma yangalalanga baka nzimbu mu sazu lembi sala kwayingi. Kuna kwalanda, yabakanga 10.000 ma dolare muna lumbu.

Vava yakala ye mvu 15, yavaikiswa kuna sikola yasingikanga aleke bena vo yimpumbulu, ozevo kiakala diaka ye fulu kia zingila ko. Yalekanga mu nzila, fulu yaningamenanga makalu yovo muna nzo za wantu ana yazayananga yau.

Mu kuma kia mavangu mambi, nkumbu miayingi yakangwanga kwa mapolisia. Wau vo e lekwa yatekanga kiayiyanga yo ko, kiasala siwa mu pelezo ko. Kansi, nzimbu zayingi yafutanga mu kuma kia vunginika wantu, luvunu yo teka e lekwa kondwa kwa nswa wa luyalu. Kiamonanga wonga wa muntu ko kana nkutu vava yayendanga kongola e nzimbu kwa wantu. Wau vo diambu dia vonza diakala, kuna kwalanda yayantika nata nkele. Ezak’e ntangwa, yayendanga kumosi ye buka kia yimpumbulu.

Vava yakala ye mvu 17 i nkumbu antete ya wá oma ma Bibila. Mu kolo kiakina, o nkento ona yazinganga  yandi wayantika longoka e Bibila ye Mbangi za Yave. Kansi, yamona vo e nsiku mia Bibila miampasi muna mio lemvokela, muna kuma kiaki yavambana yo nkento ndioyu yo kwenda zinga yo nkento akaka ona wakala makangu mame.

E mambu masoba vava nkento ndioyu diaka kayantika longoka Bibila ye Mbangi za Yave. Wasoba mpila zingu kiandi, ediadi diansivikisa kadi wakituka se nkwa luzindalalu ye ngemba. Kuna kwalanda, yatambulwila kwenda kuna Seka dia Kintinu dia Mbangi za Yave. Yatoma tambulwa kwa nkangu bakala vo akwa ngemba ye bavelela. Nswaswani kikilu yamona kwa wantu awaya ye awana bakala akundi ame. Tuka muna kileke kiame yakala ye luzolo vo wantu muna nzo eto banzola, kansi ke banzolanga ko ngatu kunsonga ngemba. Mbangi za Yave bansonga e ngemba, ediadi diau kikilu yavavanga. Vava Mbangi za Yave bampana e lau dia longoka Bibila, yatambulwila ye kiese kiawonso.

Mana yalongoka muna Bibila nanga mavuluza moyo ame. Yavanga nkubika ya yiya kumosi ye akundi ame wole kimana yalenda futa e mfuka yakala yau ya vioka 50.000 ma dolare. Diamatondo vo yavutuka manima. Kansi, akundi ame bayenda yiya, muna kuma kiaki mosi wavondwa, wankaka wasiwa mu pelezo.

Ekolo yakwamanana longoka yamona vo nsobani zayingi mfwete vanga. Muna bonga e nona, yalongoka dina Bibila kivovanga muna 1 Korinto 6:10 vo: “Mivi, y’akw’eloko, ya nduvu za vinyo, ya mindia-nzimbu, Kintinu kia Nzambi ke bevwila kio ko.” Vava yatanga e sono kiaki, yadila mu kuma kia mavangu mame mambi. Yabakula vo mfwete soba e mvimba e mpila zingu kiame. (Roma 12:2) Nkwa nsoki ye luvunu yakala.

Kansi, yalongoka mpe muna Bibila vo Yave nkwa nkenda ye nloloki. (Yesaya 1:18) Muna kuma kiaki, yadodokela Yave muna sambu kansadisa kimana yayambula e mpila zingu kiame kiambi. Muna lusadisu lwandi, malembe-malembe yayantika soba fu yame. E mambu masoba vava yakazala yo nkento yazinganga yandi.

Mvu 24 yakala miau yo wana tatu vava twakazala. Owau, diavavanga vo yabaka salu kiambote. Kansi, kiatanga kwayingi ko. Muna kuma kiaki, yadodokela diaka Yave muna sambu kansadisa. I bosi, yayenda vava e salu. Yavovesa mfumu za salu vo yakala ye luzolo lwa soba mpila zingu kiame yo vanga salu kiambote. Ezak’e ntangwa yabazayisanga vo Bibila yalongokanga ye mpe yakala yo luzolo lwa kituka se muntu ambote. Ayingi muna mfumu zazi ke bazola kunkotesa mu salu ko. Lumbu kimosi, vava yazayisa mfumu mosi a salu e mpila zingu kiambi yakala kiau ye una yasobela, wavova vo: “Kizeye ko e kuma, kansi mbwene vo mfwete kukotesa mu salu.” Ngina ye ziku vo zazina i mvutu za sambu yame. Kuna kwalanda, mono yo nkaz’ame twavubwa yo kituka Mbangi za Yave.

O sadila nkanikinu mia Bibila yo kala ye mpila zingu kia Kikristu diansadisa mu kala moyo yamu unu. Ngina ye zingu kia nzo kiakiese. Ngina mpe ye ntona zavelela kadi ngina ye ziku vo Yave wandoloka.

Mvu 14 miviokele kala tuka yakotela mu salu kia ntangwa ke ntangwa yo sadisa akaka bazaya mana Bibila kilonganga, nkaz’ame wangikama mu salu kiaki. Vioka mvu 30, nsadisi kala 22 ma akwame a salu mu yantika sambila Yave. Yakinu kwenda muna nzo zatekela, kikwendanga vuna wantu diaka ko nze una yavanganga. Kansi, owau nkumbu miayingi ikwendanga kubasamunwina e vuvu kiame kia zingila muna nza yampa ina ke ikala ye avunginiki ko.​—Nkunga 37:10, 11.