NTU A DIAMBU WA FUKWA | NGA E SAMBU KILENDA TWASA NLUTA?
Ekuma Wantu Besambilanga?
“Yakivananga muna nsaka za tá mpanza. Yasambanga kimana yasunda yo tambula nzimbu zayingi. Kansi, ediadi ke diavangama ko.”—Samuel, * Kenya.
“Kuna sikola, e salu twavanganga i vutukila e sambu ina twalongwa.”—Teresa, Filipinas.
“Yasambanga vava yakalanga mu mpasi. Yasambanga mpe mu lomba e ndoloki a masumu yo kala Nkristu ambote.”—Madalene, Gana.
E mvovo mia Samuel, Teresa yo Madalene misonganga vo vena ye kuma yayingi ifilanga wantu mu samba. Wantu ankaka besambanga ye nsi a ntima yawonso, kansi akaka besambanga kaka muna lungisa makani mau. Mafunda ye mafunda ma wantu bazeye o mfunu wa samba, kiakala awana besambanga mu vioka muna kizame, awana besambanga kimana e buka kiau kia somba kiasunda ye ana belombanga luludiku mu kuma kia esi nzo zau yovo kuma yakaka. Kieleka, kana nkutu awana ke bena ye dibundu ko besambanga.
Nga ngeye samba osambanga? Avo i wau, nkia mambu olombanga muna sambu? Diakala vo fu kia samba una kiau yovo ve, nanga olenda kukiyuvula: ‘Nga e sambu nluta kikilu kitwasanga? Nga vena yo muntu owanga e nsambu?’ Nsoneki mosi a lusansu wavova vo o samba, “mpila kaka yavuvikila ntima.” Ayingi muna nganga za mawuku bekwikilanga mpe vo o samba “mpila kaka yavuvikila ntima.” Nga wantu besambanga muna vuvika kaka o ntima yovo besambanga wau vo i fu kiau?
Nkand’a Nzambi usonganga vo e sambu nluta miayingi kitwasanga ke vuvika kaka ntima ko. Usonganga mpe vo vena yo muntu owanga e sambu ilombelwanga mu mpila yambote. Nga ediadi dialudi? Yambula twalanda malongi malende.
^ tini. 3 E nkumbu zasobwa.
