Wantete wa Ntinu 2:1-46
2 Vava kiafinama lufwa lwandi, Davidi ovene luludiku lwalu kwa mwan’andi Solomo:
2 “Se ifwa kwame.* Muna kuma kiaki, kumama,+ kala yo uyakala.+
3 Lungisa kiyekwa kiaku kuna kwa Yave wa Nzambi aku, muna kangalela muna nzila zandi yo lemvokela mîna miandi, nkanikinu miandi, nzengo zandi ye tuludiku twandi wauna twasonamena muna Nsiku a Mose;+ i nsikila osikila* muna mambu mawonso ovanga ye konso fulu okwenda.
4 Yave olungisa e nsilu una kansila vo: ‘Avo wan’aku betoma sia sungididi muna nzila zau muna diatila ye kwikizi ye ntima wawonso ye moyo*+ wawonso ova ndose ame, muna luvila lwaku ke mukondwa muntu ko* ovuanda vana kunda kia kimfumu kia Isaele.’+
5 “Vana ntandu, ozeye kwaku una kampanga Yoabe wa mwan’a Seruya ye una kavanga kwa mfumu zole za vu kia Isaele, Abene+ wa mwan’a Ne yo Amasa+ wa mwan’a Yete. Wabavonda, wabungula menga+ ma vita muna ntangw’a luvuvamu yo sia menga ma vita muna mpond’andi a luketo ye nsampatu za malu mandi.
6 Dianu vo, kala ye ngangu, kuyambula ko vo mvu zandi zakulumuka muna Ziami*+ kuna luvuvamu.
7 “Vo i wan’a Bazilai+ wa Mungiladi, ubasonga walakazi,* bafwete kala vana vena awana bedilanga vana meza maku, kadi ku sambu diame bakala+ vava yatina Abesalome+ wa mpangi aku.
8 “O Simei mpe wa mwan’a Ngera wa Mbenyamini wa musi Bakurimi, lukufi kena yo ngeye. Yandi wantianguna+ e lumbu kina yayenda kuna Makanaimi;+ kansi vava kakulumuka muna kunkika kuna Yodani, yandila e ndofi muna Yave vo: ‘Kikuvondela muna nsosolo ko.’+
9 Kunyambulwila ko,+ kadi u nkwa ngangu, ozeye dina ofwete kumvanga; okulumuna e mvu zandi yo menga muna Ziami.”*+
10 I bosi, Davidi olele yo mase mandi, ozikilu muna Mbanz’a Davidi.+
11 Mvu 40 i kolo* Davidi kayala muna Isaele. Mvu 7 kayala muna Keberone+ ye mvu 33 kayala muna Yerusaleme.+
12 Solomo ovuende vana kunda kia kimfumu kia Davidi wa se diandi, e kintinu kiandi malembe-malembe kiayantika sikila.+
13 Kuna kwalanda, Adoniya wa mwan’a Kangiti, wizidi kwa Bate-seba wa ngudi a Solomo. Unyuvuidi vo: “E ngiz’aku nga yaluvuvamu?” Ovutwidi vo: “Yaluvuvamu.”
14 Adoniya ovovele vo: “Diambu nzolele kuvovesa.” Bate-seba ovovele vo: “Vova kwaku.”
15 Yandi vo: “Otomene wo zaya vo e kimfumu kiame kiadi kala, wan’a Isaele awonso bavingilanga vo yakala se ntinu,+ kansi e kintinu kiampengomoka yo kwenda kwa mpangi ame, kadi muna luzolo lwa Yave kiakitukila se kiandi.+
16 Owau diambu dimosi kaka nzolele kulomba. Kumpanina nkalu ko.” Umvutwidi vo: “Vova kwaku.”
17 Adoniya ovovele vo: “Dodokolo, vovesa Solomo wa ntinu kampana Abisangi+ wa Nsuneme kakala se nkaz’ame, kadi ke kuvanina nkalu ko.”
18 Muna diadi, Bate-seba ovovele vo: “Ke diambu ko! Se ngienda kuvovela kuna kwa ntinu.”
19 Bate-seba wele kwa Solomo wa Ntinu, kamvovesa oma ma Adoniya. Vana vau ntinu otelamene wele kika ngudi andi, umvumbamene. Ovuende vana kunda kiandi kia kimfumu, otumisi kunda kia kimfumu mu kuma kia ngudi a ntinu, kimana kavuanda kuna lunene lwandi.
20 Bate-seba ovovele vo: “Diambu diakete nzolele kulomba. Kumpanina dio nkalu ko.” Ntinu umvovese vo: “Lomba kwaku e ngudi ame; kikuvanina nkalu ko.”
21 Ovovele vo: “Vana Abisangi wa Nsuneme kwa Adoniya wa mpangi aku kakala se nkaz’andi.”
22 Solomo wa Ntinu ovutwidi kwa ngudi andi vo: “Ekuma olombele Abisangi wa Nsuneme mu kuma kia Adoniya? Unlombela mpe kintinu,+ kadi mbut’ame,+ Abiata wa nganga yo Yoabe+ wa mwan’a Seruya+ bekunyikamanga.”
23 Muna kuma kiaki, Solomo wa Ntinu odidi ndofi muna Yave vo: “Yambula Nzambi kantumba yo sakisa wo vanga, avo Adoniya ke fwa ko wau kalombele diambu diadi.
24 Ndidi e ndofi muna Yave wa Nzambi amoyo, ona unsikidisi+ yo kumvuandisa va kunda kia kimfumu kia Davidi wa se diame, yo kumpana kintinu kiaki ye kwa mbongo ame*+ wauna kasia o nsilu, unu Adoniya vondwa kevondwa.”+
25 Vana vau, Solomo wa Ntinu otumini Benaya+ wa mwan’a Yoyada, wele, owende* Adoniya yo kumvonda.
26 O ntinu ovovese Abiata+ wa nganga vo: “Wenda kuna mavia maku kuna Anatote!+ Lufwa ofwanukinu, kansi kikuvonda ko o unu, kadi ngeye wanata Nkel’a Mfumu Yave vana vena se diame Davidi+ yo mona yandi e mpasi zawonso kamona.”+
27 Muna kuma kiaki, Solomo oyingidi Abiata muna kinganga kia Yave kimana dialungana dina kavova Yave kuna Silo+ mu kuma kia nzo a Ele.+
28 Vava nsangu zalwaka kwa Yoabe—kadi Yoabe wayikama Adoniya,+ kana una vo kayikama Abesalome ko+—Yoabe otinini muna saba kia Yave,+ osimbinini mpoka za ziku.
29 Bazayisi kwa Solomo wa Ntinu vo: “Yoabe otinini muna saba kia Yave, vana ndambu a ziku kena.” Solomo otumini Benaya wa mwan’a Yoyada, oku vo: “Wenda, wamvonda!”
30 Benaya wele muna saba kia Yave, ovovese Yoabe vo: “I wau wuwu kavovele o ntinu, ‘Vaika!’” Kansi, yandi ovovele vo: “Ve, vava ifwila.” Benaya onete nsamu kwa ntinu vo: “I wau wuwu kavovele Yoabe, ezazi i mvutu kampene.”
31 O ntinu umvovese vo: “Vanga una kavovele; umvonda yo kunzika, wakatula menga makondwa-kuma mana Yoabe kabungula vava ngina ye muna nzo a se diame.+
32 Yave ovutula menga mana kabungula muna ntu andi, kadi Davidi wa se diame kazaya wo ko vava kavonda wantu wole muna nsosolo ana bansunda unsongi yo wete: Abene+ wa mwan’a Ne wa mfumu a makesa ma Isaele+ yo Amasa+ wa mwan’a Yete wa mfumu a makesa ma Yuda.+
33 O menga mau mekala muna ntu a Yoabe ye mbongo andi yakwele mvu;+ kansi kuna kwa Davidi ye mbongo andi, nzo andi ye kunda kiandi kia kimfumu, yambula kwakala yo luvuvamu lwa Yave yakwele mvu.”
34 I bosi, Benaya wa mwan’a Yoyada, otombokele, owende Yoabe yo kumvonda, ozikilu muna nzo andi vana makanga.
35 Ntinu otumbikidi Benaya+ wa mwan’a Yoyada se mfumu a makesa vana fulu kia Yoabe, o ntinu osidi Sadoke+ wa nganga vana fulu kia Abiata.
36 Ntinu obokele Simei,+ umvovese vo: “Ukitungila e nzo muna Yerusaleme wazingila mo; kuvaiki mo ko yo kwenda ku fulu kiankaka.
37 Kadi e lumbu kina osauka Ndimb’a Kiderone,+ zaya wo vo fwa ofwa. E menga maku mu ntu aku mekala.”
38 Simei ovutwidi kwa ntinu vo: “Diambote ovovele. Selo kiaku ovanga owu uvovele mfumu ame wa ntinu.” I dianu Simei kakadila lumbu yayingi muna Yerusaleme.
39 Kansi, vava mialuta mvu tatu, ntaudi zole za Simei zitinini kwa Akisi+ wa mwan’a Maka wa ntinu a Ngati. Vava diazayiswa kwa Simei vo: “Tala, e ntaudi zaku zina kuna Ngati,”
40 Simei otelamene, okubikidi e buluku diandi, wele vavi ntaudi zandi kwa Akisi kuna Ngati. Vava Simei katukidi kuna Ngati ye ntaudi zandi,
41 bazayisi kwa Solomo vo: “Simei ovaikidi muna Yerusaleme, wele kuna Ngati, owau ovutukidi.”
42 Muna kuma kiaki, ntinu obokelese Simei, umvovese vo: “Nga kiadisa e ndofi ko muna Yave yo kulukisa vo: ‘E lumbu kina ovaika mwamu, wenda konso fulu, zaya wo vo fwa ofwa’? Kwampovesa ko vo, ‘Edi ovovele diambote; vanga ivanga dio’?+
43 Ekuma kulundidi ndofi a Yave ko ye nkanikinu una yakanikina?”
44 O ntinu ovovese Simei vo: “Muna ntim’aku ozeye e mbi yawonso wavanga kwa Davidi wa se diame,+ Yave ovutula e mbi yayi muna ntu aku.+
45 Kansi o Solomo wa Ntinu osambulwa,+ e kunda kia kimfumu kia Davidi kisikila yakwele mvu vana vena Yave.”
46 Muna diadi o ntinu otumini Benaya wa mwan’a Yoyada, unwende, ofwidi.+
I nsikila kiasikila e kintinu vana moko ma Solomo.+
Mvovo vana yand'a lukaya
^ Mvovo wa sina: “Se ikwenda muna nzila ina ikwendela nza yawonso.”
^ Yovo “okala ye ngangu.”
^ Tala Nsas’a Mvovo.
^ Mvovo wa sina: “ke mukendonua yakala ko muna ngeye.”
^ Yovo “Seol,” i sia vo, ziami ya wantu awonso. Tala Nsas’a Mvovo.
^ Mvovo wa Kiyibere una ye nsasa vo: “zola ye walakazi ulembi suka.” Tala Nsas’a Mvovo. “Zola kulembi suka.”
^ Yovo “Seol,” i sia vo, ziami ya wantu awonso. Tala Nsas’a Mvovo.
^ Mvovo wa sina: “lumbu.”
^ Mvovo wa sina: “ye kuntungila e nzo.”
^ Yovo “oyilamene.”
