Wantete wa Samuele 25:1-44
25 Kuna kwalanda o Samuele+ ofwidi; Isaele yawonso bakutakene, bandididi yo kunzika vana ndambu a nzo andi kuna Rama.+ I bosi, Davidi okulumukini kuna makanga ma Parani.
2 Muna Maone+ mwakala muntu wasadilanga kuna Kamele.*+ Mvuama kikilu kakala; wakala ye 3.000 ma mameme, 1.000 dia nkombo, wasakanga mika mia mameme mandi kuna Kamele.
3 Nkumbu andi Nabale,+ nkumbu a nkaz’andi Abingaile.+ Nkaz’andi nkwa ngangu ye nkento ambote-mbote, kansi yakala diandi musi nzo a Kalebe+ nkwa ntima wabala ye fu yambi kakala yau.+
4 Davidi owidi muna makanga vo Nabale mika mia mameme mandi kasakanga.
5 Muna kuma kiaki, Davidi untwikidi matoko kumi, ubavovese vo: “Nutomboka kuna Kamele kwa Nabale, vava nulwaka nunyuvula mavimpi muna nkumbu ame.
6 Luvova vo: ‘Zinga kwaku e mfumu, mavimpi* kwa ngeye ye nzo aku yawonso ye yawonso una yau.
7 Owau ngwidi wo vo mika mia mameme osâkanga. Avungudi aku vava bakala yeto ke twabavanga mbi ko,+ ke bavidisa mpe lekwa ko ekolo bakala kuna Kamele.
8 Yuvula matoko maku, bekuzayisa wo. Yambula matoko mame bakala ye dienga vana meso maku, kadi twizidi mu ntangw’a kiese.* Idodokele, vana kwa ntaudi zaku yo kwa mwan’aku Davidi konso lekwa una kiau.’”+
9 Matoko ma Davidi bele, bavovele mawonso mama kwa Nabale muna nkumbu a Davidi. Vava bamene vova,
10 Nabale ovutwidi kwa selo ya Davidi vo: “Nani i Davidi? Nani i mwan’a Yisai? E lumbu yayi, vena ye selo yayingi betinanga mfumu zau.+
11 Ekuma mfwete bongela mbolo zame, maza ye mbizi zina mpondèle asâki ame a mika, yavana zo kwa wantu ana kizeye ko kana akweyi batukidi?”
12 I dianu vo, matoko ma Davidi bavutukidi yo kunzayisa mambu mama mawonso.
13 Vana vau Davidi ovovese wantu andi vo: “Yeno awonso lusia nsosolo muna luketo!”+ Awonso basidi nsosolo muna luketo, Davidi mpe osidi nsosolo andi muna luketo, tezo kia 400 za wantu batombokele ye Davidi, 200 basidi ye funda.
14 Muna kolo kiakina, ntaudi mosi ozayisi kwa Abingaile wa nkaz’a Nabale vo: “Tala, Davidi otumini matoko mandi tuka kuna makanga muna kayisa mfumu eto, kansi yandi ubatiangwini.+
15 Wantu awaya batuvanga o wete. Ke batuvanga mbi ko, ke twavidisa lekwa ko ekolo bakala yeto muna yana.+
16 Bakala nze yaka kia lutaninu kwa yeto, fuku yo mwini, e ntangwa zawonso twakala yau vava twavungulanga mameme.
17 Owau vava zaya dina ovanga, kadi ediadi mpasi kikilu ditwasa kwa mfumu eto y’esi nzo andi awonso,+ kadi yandi muntu ambi,*+ kavena muntu ko olenda kumvovesa diambu.”
18 Muna kuma kiaki, Abingaile+ ozabukidi, obongele 200 za mbolo ye nkalu zole zanene za vinyu ye mameme tanu makubikwa, sea tanu* za masa makangwa ye mbolo 100 za sangwa bundu ya uva zayuma, ye 200 za mbumba mia bundu ya nsanda, osidi yo vana mabuluku.+
19 Ovovese matoko mandi vo: “Nuenda viti, ikunulanda.” Kansi kavovele diambu ko kwa nkaz’andi Nabale.
20 Abingaile vava kayendanga vana buluku yo kulumuka muna nzila yaswekama ya mongo, owanane yo Davidi ye wantu.
21 Davidi ovovele vo: “Mpasi zankatu yamona vava yalunda mavua ma muntu ndioyo muna makanga. Kavavila lekwa ko muna mavua mandi mawonso,+ owau umvutulwidi e mbi muna wete.+
22 Yambula Nzambi katumba mbeni za Davidi yo sakisa wo, avo ngiambwidi vo kana mwan’ayakala* mosi kasala moyo muna kanda dia Nabale vava kukia.”
23 Vava Abingaile kamwene Davidi, ozabukidi, okulumukini vana buluku, ofukamene vana vena Davidi, ovumbamene.
24 Obwidi vana malu mandi, ovovele vo: “E mfumu ame, yambula e tumbu kiakala kwa mono; yambula selo kiaku kavovesa, wá mvovo mia selo kiaku.
25 E mfumu ame, idodokele, kusie sungididi ko kwa kimpumbulu kiaki, Nabale,+ kadi nze nkumbu andi i una mpe kena. Nabale* i nkumbu andi, zowa kwandi. Kansi, mono selo kiaku kimwene matoko ma mfumu ame ko ana watumini.
26 Owau, e mfumu ame, ndidi e ndofi muna Yave wa Nzambi amoyo, ye muna nkal’aku, Yave usimini+ walembi bwa muna nkanu a menga+ yo landa kunda muna moko maku. Yambula mbeni zaku ye ana bevava vanga e mbi kwa mfumu ame bakala nze Nabale.
27 Owau, yambula lukau lwalu+ lutwese* selo kiaku kwa mfumu ame lwavanua kwa matoko ana belandanga mfumu ame.+
28 Dodokolo, loloka e sumu dia ntaudi aku, kadi Yave otungila mfumu ame e nzo isikila yakwele mvu,+ kadi mfumu ame onuananga vita za Yave,+ ke vena mbi ko isolokele muna ngeye muna lumbu yaku yawonso.+
29 Vava muntu kekutelamena muna kulakama yo vava katula moyo aku, e moyo a mfumu ame uswekama muna nkutu a moyo vana vena Yave wa Nzambi aku, kansi e mioyo mia mbeni zaku otuba mio kwandá, nze matadi matubilu muna nsinga watubila matadi.
30 Yave vava kevangila e mfumu ame mawonso mambote kasila o nsilu yo kukitula se mfumu muna Isaele,+
31 kukendalala ntima ko ngatu kuyibanza* mu kuma kia bungula menga ma munkondwa-kuma yovo mu kuma kia kuyilandila e kunda.+ Vava Yave kevanga o wete kwa mfumu ame, yindula selo kiaku.”
32 Davidi ovovese Abingaile vo: “Yambula Yave wa Nzambi a Isaele kakembelwa ona utumini kwa mono o unu wawanana yame!
33 Yambula ngangu zaku zasambulwa! Yambula wasambulwa wau unsimini o unu muna nkanu a menga+ yo kukilandila e kunda.
34 Ndidi e ndofi muna Yave wa Nzambi a Isaele wa Nzambi amoyo ona unkakididi muna kuvanga e mbi,+ kele vo kwizi kunkika mu nzaki ko,+ mbazi muna mene ke vadi sala kana nkutu yakala* dimosi ko muna nzo a Nabale.”+
35 Muna diadi, Davidi otambwidi lekwa ina kantwasidi, umvovese vo: “Tomboka kuna nzo aku kuna luvuvamu. Tala, ngwididi e nding’aku, ivanga mana olombele.”
36 Abingaile vava kavutuka kwa Nabale, oyandi wadianga e lambu nze ntinu muna nzo andi. Nabale* wayangalala kikilu kakala yo kolwa. Abingaile kamvovesa kana diambu dimosi ko yavana kuma kwakiá.
37 Muna mene, vava e nkolw’a Nabale yamana, nkaz’andi unzayisi mambu mawonso. Ntim’andi ukitukidi nze wa muntu wafwa. Okitukidi nze tadi.
38 Vava kiavioka lumbu kumi, Yave owende Nabale, ofwidi.
39 Davidi vava kawidi wo vo Nabale ofwidi, ovovele vo: “Yambula Yave kakembelwa, wau katadidi diambu diame,+ umvevuele muna luvezo lwa Nabale+ yo sima selo kiandi mu vanga diambu diambi.+ E mbi ya Nabale, Yave ovutwidi yo muna ntu andi!” I bosi, Davidi otumini nsamu kwa Abingaile, unlombele vo kakala nkaz’andi.
40 Vava selo ya Davidi balweke kwa Abingaile kuna Kamele, bamvovese vo: “Davidi ututumini kwa ngeye twanata kimana wakituka se nkaz’andi.”
41 Vana vau otelamene, ofukamene, ovovele vo: “Tala, selo kiaku una ye luzolo lwakala se selo ona osukulanga malu+ ma selo ya mfumu ame.”
42 Abingaile+ otelamene muna nzaki, wele manta vana buluku, e selo yandi tanu yamakento banlende; wele landi matoko ma Davidi, okitukidi se nkaz’andi.
43 Davidi wasompa mpe Akinoame + wa musi Yizerele,+ yau awole bakala se akazi andi.+
44 Kansi, Saulu ovene mwan’andi Mikale+ wa nkaz’a Davidi kwa Paleti+ wa mwan’a Laisi, wa musi Ngalimi.
Mvovo vana yand'a lukaya
^ Mbanza imosi muna Yuda; ke Mongo a Kamele ko.
^ Yovo “luvuvamu.”
^ Mvovo wa sina: “lumbu kiambote.”
^ Yovo “wakondwa o mfunu.”
^ Mvovo wa sina: “ndiona osubilanga muna yaka.” Mvovo a luvezo muna Kiyibere, wan’amakala uyikanga.
^ Ina ye nsasa vo: “Tunga; Zowa.”
^ Mvovo wa sina: “nsambu zitwese.”
^ Mvovo wa sina: “kubwa ko ngatu tá sakuba.”
^ Mvovo wa sina: “ndiona osubilanga muna yaka.” Mvovo a luvezo muna Kiyibere, wan’amakala uyikanga.
^ Mvovo wa sina: “Ntim’a Nabale.”
