Wanzole wa Samuele 5:1-25
5 Kuna kwalanda, makanda mawonso ma Isaele bezidi kwa Davidi kuna Keberone,+ bavovele vo: “Tala, yeto tu menga mamosi.*+
2 Vava Saulu kakala ntinu eto, ngeye wavitanga o ntu muna vita za Isaele.*+ Yave wavovesa vo: ‘Ngeye ovungula nkangu ame Isaele, okala se ntu a Isaele.’”+
3 Akuluntu awonso a Isaele bele kwa ntinu kuna Keberone, Davidi wa Ntinu okangidi yau e kangu+ kuna Keberone vana ndose a Yave. Bakusidi Davidi mazi kakala se ntinu a Isaele.+
4 Davidi mvu 30 kakala miau vava kayantika yala, mvu 40 kayala.+
5 Mvu 7 ye ngonde 6 kayala Yuda muna Keberone ye muna Yerusaleme+ mvu 33 kayala Isaele yawonso ye Yuda.
6 O ntinu ye nkangu andi bele kuna Yerusaleme mu nuanisa Aneyebuse+ ana bazingilanga muna zunga kiakina. Bavezele Davidi vo: “Kukota mwamu ko! Kana nkutu ampofo ye atedingi yinga bekuyinga.” Edi babenze vo ‘Davidi kalendi mo kota ko.’+
7 Kansi, Davidi obakidi e swekameno diangolo dia Zione, dina vo, i Mbanz’a Davidi o unu.+
8 E lumbu kiakina Davidi ovovele vo: “Awana banuanisi Aneyebuse bafwete kwendela muna nzil’a maza ya nsi a ntoto bavonda ‘ampofo ye atedingi’ ana kamenganga Davidi.” I kuma diavovelwa vo: “Ampofo ye atedingi ke balendi kota mu nzo yayi ko.”
9 I bosi Davidi oyantikidi zingila muna swekameno diangolo diayikilwanga vo Mbanz’a Davidi; Davidi ozietese dio e yaka ye nzo zankaka tuka kuna Kundubulu*+ yamuna kati.+
10 O nkum’a Davidi wawokelanga kaka,+ o Yave wa Nzambi a vu wakala yandi.+
11 Kirami wa ntinu + a Turo otumini anati a nsangu kwa Davidi ye mabaya ma nsedele+ ye avadi a nti ye atungi a nzo muna tunga e yaka, mu tungila Davidi e nzo.*+
12 Davidi wabakula wo vo Yave unsikidisi se ntinu a Isaele+ yo tundidika kintinu kiandi+ muna wete dia nkangu andi Isaele.+
13 Vava kayaluka kuna Keberone, Davidi obakidi diaka makangu+ ye akento ayingi muna Yerusaleme, Davidi owutidi diaka wan’amakala yo wan’amakento.+
14 Ezazi i nkumbu za wan’andi bawutukila muna Yerusaleme: Samua, Sobabe, Natani,+ Solomo,+
15 Yibeka, Elesua, Nefenge, Yafia,
16 Elisama, Eleyada yo Elefelete.
17 Afelesetia vava bawá wo vo Davidi okusilu mazi kakala se ntinu a Isaele,+ Afelesetia awonso bele vava Davidi.+ Vava Davidi kawa wo, okulumukini kuna swekameno diangolo.+
18 Afelesetia bezidi, bamwangane muna Ndimb’a Refa.+
19 Davidi oyuvuidi Yave,+ oku vo: “Nga yatomboka mu nuanisa Afelesetia? Nga okubayekola ova moko mame?” Yave ovutwidi Davidi vo: “Tomboka, kadi yekola iyekola Afelesetia vana moko maku.”+
20 Davidi wele kuna Bale-perasime, ubatufakesele kûna. Muna kuma kiaki, ovovele vo: “Yave okukulwisi mbeni zame+ ova ngina nga nkukul’a maza.” I kuma Davidi kayikila fulu kiakina vo Bale-perasime.*+
21 Afelesetia basisidi teke yau vavana, Davidi yo nkangu andi babongele yo.
22 I bosi Afelesetia bezidi diaka, bamwangane muna Ndimb’a Refa.+
23 Davidi oyuvuidi Yave, kansi Nzambi umvutwidi vo: “Kubanuanisina kuna ntwala ko. Ubabalukila kuna nima, wabanuanisina vana mantalani ye nti mia baka.
24 Avo owidi e zú dia nsindu mia wantu kuna ntandu a nti mia baka, ubanuanisa kadi Yave ovita kuna ntwal’aku muna tufakesa vu kia Afelesetia.”
25 Davidi ovangidi una Yave kankanikini, otufakese Afelesetia+ tuka kuna Ngeba+ yakuna Ngeze.+
Mvovo vana yand'a lukaya
^ Yovo “yeto tu visi yaku ye nitu aku.”
^ Mvovo wa sina: “ngeye wavaikisa yo kotesa Isaele.”
^ Yovo “Milo.” Mvovo wa Kiyibere una ye nsasa vo “zadisa.”
^ Yovo “lûmbu.”
^ Ina ye nsasa vo: “Mfumu a Nkukula.”
