Kuna Kwa Ayibere 7:1-28
7 Kadi Mankizedeke ndioyo wa ntinu a Saleme, ngang’a Nzambi a Mpungu-nene, wakika Abarayama vava kavutukanga kuna vita ina kavondela atinu yo kunsambula,+
2 Abarayama wamvana* e tini kia kumi kia lekwa yawonso. Ntete, e nkumbu andi yasekolwa vo “Ntinu a Unsongi,” i bosi mpe yandi i ntinu a Saleme, i sia vo, “Ntinu a Luvuvamu.”
3 Wakondwa se, wakondwa ngudi, wakondwa luvila, wakondwa lubantiku lwa lumbu ngatu mfoko a zingu, kansi wafwananeswa yo Mwan’a Nzambi, okala kaka nganga yakwele mvu.+
4 Nutala o nene wa muntu ndioyo, ona Abarayama wa nkulu a kanda kavana e tini kia kumi kia wete wa sanzu.+
5 Mun’owu wa Nsiku, wan’a Levi,+ ana batambula kinganga bakanikinua mu tambula e tini kia kumi kwa nkangu,+ i sia vo, kwa mpangi zau, kanele vo yau mpe mbongo* ya Abarayama.
6 Kansi muntu ndiona una vo katuka mu luvila lwau ko, watambula e tini kia kumi kwa Abarayama yo sambula ona wasilwa e nsilu.+
7 Ediadi ke dilendi fidiswa mpaka ko, ndiona wanke wasambulwa kwa ndiona wanene.
8 Ana befwanga yau betambulanga e tini kia kumi, kansi vena ye wankaka otambulanga e tini kia kumi, e Sono ikunsilanga umbangi vo, una moyo.+
9 Dilenda vovua vo, kana nkutu i Levi, ona otambulanga e tini kia kumi, wafuta e tini kia kumi muna Abarayama,
10 kadi kakiwutukila ko muna luvila lwa Abarayama wa nkulu andi,* vava Mankizedeke kayenda kunkika.+
11 Kele vo wantu bavuila nkal’a lunga muna kinganga kia Levi+ (kadi e kinganga kiaki dimosi muna Nsiku wavewa kwa nkangu), nkia mfunu diaka diadi kala vo nganga ankaka katelama, yo yikilwa e kinganga nze kia Mankizedeke+ kansi ke mun’owu wa kinganga kia Arone ko?
12 Kadi, wau vo kinganga kiasobwa, diavavanga mpe vo Nsiku wasobwa.+
13 Ekuma kadi, muntu oyikilwanga mambu mama mu kanda diankaka katuka, dina vo ke mosi ko wasadila vana ziku.+
14 Dialudi vo Mfumu eto mu kanda dia Yuda katuka,+ kansi Mose kavova ko vo muna kanda diadi nganga zituka mo.
15 Ediadi ditomene moneka vava kiatelama nganga ankaka+ wafwanana yo Mankizedeke,+
16 ona wakituka se nganga, kansi ke mu nsiku a kinitu ko, kansi muna nkum’a moyo ulembi fwasakana.+
17 Kadi wasilwa umbangi vo: “Ongeye u nganga yakwele mvu, nze kinganga kia Mankizedeke.”+
18 Dianu vo, nkanikinu wankulu wakatulwa, e kuma kadi watovoka, ke wafwana ko.+
19 Kadi o Nsiku ke wakitula konso lekwa ko se kialunga,+ kansi e vuvu+ kisundidi o wete twavewa kiavanga wo, i kiau kikutufinamesanga kwa Nzambi.+
20 Wau kina vo muna ndofi diavangamena,
21 (kadi vena ye awana batumbilu kinganga ke mu ndofi ko, kansi ndioyo muna ndofi katumbikilwa e kinganga kwa Ndiona wavova vo: “Yave* wadia e ndofi, ke soba ngindu zandi ko,* ‘Ongeye u nganga yakwele mvu’”),+
22 ozevo, Yesu wakituka se lusikidisu lwa kangu disundidi o wete.+
23 Vana ntandu, muna kuma kia lufwa e nganga ke bakwamananga muna salu kiau ko,+ ankaka bavinganga vana fulu kiau,
24 kansi, wau vo Yesu ozinganga yakwele mvu,+ ke muntu ko ovinga muna kinganga kiandi.
25 Dianu vo, wafwana mpe vuluza emvimba awana befinamanga Nzambi muna yandi, e kuma kadi ozinganga kaka muna dodokela muna wete diau.+
26 Kadi diambote kwa yeto twakala ye ngang’ambuta una wau, nkwa kwikizi, wakondwa e mbi,+ wakondwa usafu, wavambuka asumuki, watundidikwa vana ntandu a zulu.+
27 Nswaswani ye nganga zambuta zazina, yandi kavuidi mfunu wa tambika kimenga lumbu ke lumbu ko,+ entete muna masumu ma yandi kibeni, i bosi muna masumu ma nkangu,+ e kuma kadi wavanga wo emvimba mu nkumbu mosi vava kayitambika se kimenga.+
28 Kadi o Nsiku wantu atovoka utumbikanga se nganga zambuta,+ kansi e diambu diadilwa e ndofi+ ina yalandila o Nsiku, diasola o Mwana, ona wazikulwa+ yakwele mvu.
Mvovo vana yand'a lukaya
^ Mvovo wa sina: “wankayila.”
^ Mvovo wa sina: “batuka muna nima.”
^ Mvovo wa sina: “kadi muna luketo lwa nkulu andi kakala.”
^ Yovo “ke kuyibanza ko.”
