Ezera 1:1-11
1 Muna mvu wantete wa luyalu lwa Kurese+ wa Ntinu a Parasa, muna lunganesa e diambu dia Yave dina diavovua kwa Yeremiya,+ Yave osikamese mwand’a Kurese wa Ntinu a Parasa kimana kaboka nkoki muna kintinu kiandi kiawonso, osonekene wo mpe muna nkanda,+ oku vo:
2 “I wau wuwu kavovele o Kurese wa Ntinu a Parasa: ‘Yave wa Nzambi a zulu umpene yintinu yawonso ya nza,+ untumini yantungila e nzo muna Yerusaleme,+ ina kuna Yuda.
3 Ovava avo vena yo muntu, una vo wa nkangu andi, yambula Nzambi andi kakala yandi, yambula katomboka kuna Yerusaleme, kuna Yuda, katungulula e nzo a Yave wa Nzambi a Isaele, wa Nzambi aludi, nzo ina yakala muna Yerusaleme.*
4 Konso muntu una vo nzenza,+ kana nkia fulu kena, yambula katambula kwa mfinangani zandi,* palata, wolo, tusalu ye twelezi ye tukau twamvevo twa nzo a Nzambi aludi+ ina kuna Yerusaleme.’”
5 I bosi, ntu mia nzo za mase ma Yuda ye Benyamini ye anganga ye Anelevi—awonso ana bafilwa kwa mwand’a Nzambi—bakubamene kimana batomboka mu tungulula e nzo a Yave ina kuna Yerusaleme.
6 E mfinangani zau zawonso babasadisi, babavene* salanganu ya palata, wolo, tusalu, twelezi, lekwa yantalu ye tukau twawonso twamvevo.
7 Kurese wa Ntinu ovaikisi mpe salanganu ya nzo a Yave ina kabonga Nebukandesa muna Yerusaleme yo sia yo muna nzo a nzambi andi.+
8 Kurese wa Ntinu a Parasa ovene yo vana moko ma Miteredate wa nlundi a tusalu, otangidi yo, ovene yo kwa Sesebasa*+ wa ntu a Yuda.
9 Eyayi i lekwa katanga: Lekwa 30 ya wolo ina nze itunga, 1.000 dia lekwa ya palata ina nze itunga ye itunga 29 yankaka,
10 30 ma pidi yakete ya wolo, 410 dia pidi yakete ya palata ye 1.000 dia salanganu yankaka.
11 E salanganu yawonso ya wolo ye palata, 5.400. Sesebasa watwasa yawonso yayi vava abakami+ bavaika muna Babele yo vutuka kuna Yerusaleme.
Mvovo vana yand'a lukaya
^ Nanga, “katungulula e nzo a Yave, ina muna Yerusaleme.”
^ Mvovo wa sina: “kwa wantu a fulu kiandi.”
^ Mvovo wa sina: “bakumikini moko mau muna.”
^ Dilenda kala vo Zerubabele oyikilu muna Ezera 2:2; 3:8.
