Ezera 4:1-24
4 Vava e mbeni za Yuda ye Benyamini+ bawá vo ana batuka kuna kinkole+ bayantikidi tunga tempelo a Yave wa Nzambi a Isaele,
2 vana vau bele kwa Zerubabele ye kwa ntu mia nzo za mase, babavovese vo: “Yambula twanuyikama; kadi yeto mpe, Nzambi eno tusambilanga*+ yo kunkelela yimenga tuka muna lumbu ya Esa-kadone wa Ntinu+ a Asuri ona watutwasa mwamu.”+
3 Kansi, Zerubabele yo Yesua ye akaka muna ntu mia nzo za mase ma Isaele babavovese vo: “Ke nutunga yeto nzo a Nzambi eto ko,+ kadi yeto kibeni kaka tutunga e nzo a Yave wa Nzambi a Isaele, wauna katukanikina Kurese wa Ntinu a Parasa.”+
4 Dianu vo, esi nsi bayoyesanga* Ayuda yo kubatokanesa kimana bayambula yo tunga.+
5 Bafutanga aludiki kimana bafukisa nkubika zau+ e lumbu yawonso ya luyalu lwa Kurese wa ntinu a Parasa yamuna luyalu lwa Dareyuse wa ntinu+ a Parasa.
6 Muna lubantiku lwa luyalu lwa Akasurose, basonekene nkanda muna funda esi Yuda ye Yerusaleme.
7 Muna lumbu ya Antakesate wa Ntinu a Parasa, Biselame, Miteredate, Tabele ye akwau, basonekene nkanda kwa Antakesate wa ntinu; basekwele nkanda muna Ki-aramiti,+ basonekene wo muna masono ma Ki-aramiti.*
8 *Rekume wa ntu a mbanda-mbanda ye Simesai wa nsoneki basonekene nkanda kwa Antakesate wa Ntinu mu kuma kia Yerusaleme, oku vo:
9 (Nkand’a Rekume wa ntu a mbanda-mbanda yo Simesai wa nsoneki ye akwau, afundisi, alandi a nguvulu, asoneki, esi Ereke,+ esi Babele, esi Susa,+ i sia vo, esi Elame,+
10 y’esi zula yankaka ina Asenapa wanene ye nkwa tunda kanata kuna kinkole yo kubasia muna mbanza za Samaria+ ye mvivu miankaka kuna Simu dia Nzadi,* owau
11 o mama i mambu masonama muna nkanda una batwikila Antakesate wa Ntinu.)
“Kwa Antakesate wa Ntinu, tuka kwa ntaudi zaku, nkangu a zunga kia este kuna Simu dia Nzadi:* Owau
12 e ntinu zaya wo vo Ayuda ana bayiza oku twina tuka kwa ngeye, balwaka muna Yerusaleme. Bayantika tungulula e mbanza ya ukolami ye umpumbulu, se bemanisa e yaka+ yo tungulula e nkubilwa.
13 Yambula ntinu kazaya wo vo, avo mbanza yayi itungulwilu, e yaka yandi yafokoka, ke befuta mpaku ko, vaku,+ ngatu mpaku ya nzila, ediadi mfwilu ditwasa muna tusalu twa atinu.
14 Wau vo mungw’a lûmbu lwa ntinu tudianga,* ke diansongi ko twazinga moko yo tala kaka ekolo e vua dia ntinu dibebeswanga, i kuma tutwikidi e nsangu zazi kwa ntinu,
15 kimana watoma fimpa nkanda wa tusansu twa akulu aku.+ Osinga solola muna nkanda wa tusansu vo e mbanza yayi, mbanza ya ukolami ye umpumbulu, mfwilu itwasanga kwa atinu ye mvivu, tuka kuna nz’ankulu o nkangu a mbanza yayi wantu kaka befilanga muna ukolami. Kiaki i kuma yafwasilwa.+
16 Tuzolele zayisa kwa ntinu vo, avo mbanza yayi itungulwilu, e yaka yandi ifokokele, kukala diaka ye wisa* ko muna mvivu una kuna Simu dia Nzadi.”*+
17 O ntinu otwikidi mvutu kwa Rekume wa ntu a mbanda-mbanda yo Simesai wa nsoneki ye akwau ana bakala kuna Samaria ye akaka muna mvivu a Simu dia Nzadi:*
“Kiambote! Tala,
18 o nkanda una nuatutwikidi, utangilu mu mpila yakiá* ova ngina.
19 Ntumini wantu bavanga lufimpu, disolokele vo e mbanza yayi tuka kolo atinu itelamenanga, ukolami ye nkindu zitukanga mo.+
20 Muna Yerusaleme mwakala atinu angolo ana bayalanga mvivu wawonso wa Simu dia Nzadi,* bafutwanga mpaku, vaku ye mpaku ya nzila.
21 Ozevo, nusima wantu awaya bayambula salu kiaki, kimana e mbanza yalembi tungululwa yavana ivana o nswa.
22 Nuyikenga, ke nuvezi nkanikinu wau ko, kinumana e vua dia ntinu dialembi fwaswa.”+
23 Vava kiatangwa nkanda wa Antakesate wa Ntinu vana vena Rekume, Simesai wa nsoneki ye akwau, vana vau bele kuna Yerusaleme yo makesa basimini e salu kia Ayuda.
24 Muna kuma kiaki, e salu kia nzo a Nzambi kianingama muna Yerusaleme; kianingama yamuna mvu wanzole wa luyalu lwa Dareyuse wa Ntinu a Parasa.+
Mvovo vana yand'a lukaya
^ Mvovo wa sina: “tutombanga.”
^ Mvovo wa sina: “zezesa moko ma.”
^ Nanga wasonekwa muna Ki-aramiti i bosi wasekolwa.
^ Ezera 4:8 yakuna 6:18 entete mu Ki-aramiti yasonekenua.
^ E mvivu a simu dia Nzadi i zunga ya weste a Uferate.
^ E mvivu a simu dia Nzadi i zunga ya weste a Uferate.
^ Yovo “mfutu a lûmbu tutambulanga.”
^ Yovo “kunku.”
^ E mvivu a simu dia Nzadi i zunga ya weste a Uferate.
^ E mvivu a simu dia Nzadi i zunga ya weste a Uferate.
^ Nanga, usekwelo yo tangwa.
^ E mvivu a simu dia Nzadi i zunga ya weste a Uferate.
