Ezera 6:1-22
6 Ozevo, Dareyuse wa Ntinu ovene nswa, bavavulwidi nkanda* muna malundilu ma lekwa yantalu ya Babele.
2 Muna lûmbu lwa Akimeta, muna mvivu a Madai, mwasoloka o nkanda una wasonama lusansu vo:
3 “Muna mvu wantete wa luyalu lwa Kurese wa Ntinu, o Kurese wa Ntinu wavana nswa wau mu kuma kia nzo a Nzambi muna Yerusaleme vo:+ ‘Yambula e nzo yatungululwa kimana yakala se fulu kia kelela yimenga ye nkubilwa zandi zasidikiswa; o lá wandi yinkoso 60, o lambuka kwandi yinkoso 60,*+
4 ye nlonga ntatu mia matadi mampwena ye nlonga mosi wa mabaya;+ e nzimbu zisadilwa, muna nzo a ntinu zituka.+
5 Vana ntandu, e salanganu ya wolo ye palata ya nzo a Nzambi, ina Nebukandesa kabonga muna tempelo kuna Yerusaleme yo nata yo kuna Babele,+ yambula yavutulwa kimana yasiwa muna fulu yandi muna tempelo kuna Yerusaleme, yasiwa muna nzo a Nzambi.’+
6 “I dianu vo, e Tatenai wa nguvulu a mvivu a Simu dia Nzadi* yo Seta-bozenai ye akweno, alandi a nguvulu a mvivu a Simu dia Nzadi+—nuvavuka mo.
7 Ke nusie nkaku ko muna salu kia nzo yoyo ya Nzambi. O nguvulu a Ayuda ye akuluntu a Ayuda betungulula e nzo yayi ya Nzambi vana fulu kiandi.
8 Vana ntandu, inukanikini mana nufwete vanga kwa akuluntu awaya a Ayuda muna tungulula e nzo yoyo ya Nzambi: Muna lusalu lwa ntinu,+ muna mpaku ya mvivu a Simu dia Nzadi,* i mutuka mfutu uvewa kwa wantu awaya kimana bakwamanana sala e salu kiaki, lembi ningama.+
9 Konso kina kivuilu o mfunu—kana wan’a ngombe,+ kana vaka ya mameme,+ kana wan’a mameme+ se tukau kwa Nzambi a zulu, masa,+ mungwa,+ vinyu+ yo mazi,+ wauna wavova nganga zina muna Yerusaleme—i kivanua kwa yau lumbu ke lumbu, ke kikondi ko,
10 kimana bakwamanana sunzula tukau tuyangidika Nzambi a zulu, basambila muna wete dia moyo a ntinu yo wan’andi.+
11 Nkanikini mpe vo konso ona okulula nsiku wau, yambula muna nzo andi mwakatulwa o nti, kamanikwa* mûna, e nzo andi ikituka se kozo kia* ndonga mu kuma kia sumu diadi.
12 O Nzambi a zulu ona wasia mo nkumbu andi,+ ofwasa ntinu miawonso ye nkangu mina milambula o koko muna kulula nkanikinu wau yo fwasa nzo yoyo ya Nzambi ina koko Yerusaleme. Omono, Dareyuse, nsikidisi nkanikinu wau. Yambula wasadilwa vana vau.”
13 O Tetanai wa nguvulu a mvivu a Simu dia Nzadi* yo Seta-bozenai+ ye akwau, vana vau bavangidi mawonso katuma Dareyuse wa Ntinu.
14 Akuluntu a Ayuda wau bakasakeso muna nsakula za Kangai+ wa ngunza yo Zakariya+ wa ntekelo a Ido, bakwamanene tunga,+ e salu kinungunukini; bamanisi yo tunga mun’owu wa nkanikinu a Nzambi a Isaele+ ye nkanikinu a Kurese+ yo Dareyuse+ yo Antakesate wa Ntinu+ a Parasa.
15 Bamanisi tunga e nzo yoyo muna lumbu kiatatu kia ngonde ya Ada,* muna mvu una wasambanu wa luyalu lwa Dareyuse wa Ntinu.
16 I bosi, Aneyisaele, anganga ye Anelevi+ ye ayaluki ankaka ana batuka kuna kinkole, basunzwidi* e nzo yayi ya Nzambi kuna kiese.
17 Muna sunzula e nzo ya Nzambi, basunzwidi 100 wan’a ngombe, 200 za vaka ya mameme, 400 za wan’a mameme, muna lukau lwa sumu dia Isaele yawonso, basunzwidi vaka 12 ya nkombo, mun’owu wa lutangu lwa makanda kumi ye zole ma Isaele.+
18 Basidi anganga muna buka yau, Anelevi muna buka yau, muna salu kia Nzambi kuna Yerusaleme,+ nze una wasonama muna nkand’a Mose.+
19 Abakami ana batuka kuna kinkole badia e Nduta kina kia 14 kia ngonde antete.+
20 Anganga ye Anelevi bamana kuyivelelesa,+ yau awonso bavelela; bavonda e bulu ya Nduta mu kuma kia abakami awonso batuka kuna kinkole, ye akwau anganga yo yau kibeni.
21 Aneyisaele ana batuka muna kinkole badia e Nduta kumosi ye awonso babayikama muna sambila* Yave wa Nzambi a Isaele yo kuyivambula muna mavangu mambi ma zula ya nsi.+
22 Badia mpe e Lambu dia Mbolo Zakondwa Mfuna+ mu lumbu nsambwadi kuna kiese, kadi o Yave wabamwesa kiese yo vilula ntim’a ntinu a Asuri muna wete diau+ kimana kabasadisa* muna salu kia nzo a Nzambi aludi, wa Nzambi a Isaele.
Mvovo vana yand'a lukaya
^ Mvovo wa sina: “nzo a nkanda.”
^ E mvivu a simu dia Nzadi i zunga ya weste a Uferate.
^ E mvivu a simu dia Nzadi i zunga ya weste a Uferate.
^ Nanga, “fuku; fuku dia mbole.”
^ Yovo “kakomenua.”
^ E mvivu a simu dia Nzadi i zunga ya weste a Uferate.
^ Yovo “batambikidi.”
^ Mvovo wa sina: “tomba.”
^ Mvovo wa sina: “kabakumika o moko.”
