Ezera 7:1-28
7 Kuna kwalanda, muna luyalu lwa Antakesate+ wa Ntinu a Parasa, o Ezera*+ ovutukidi. Yandi i mwan’a Seraya+ wa mwan’a Azariya wa mwan’a Kilekeya,+
2 wa mwan’a Salumi, wa mwan’a Sadoke, wa mwan’a Akitubi,
3 wa mwan’a Amareya, wa mwan’a Azareya,+ wa mwan’a Merayote,
4 wa mwan’a Zerakeya, wa mwan’a Uzi, wa mwan’a Buki,
5 wa mwan’a Abisua, wa mwan’a Finekase,+ wa mwan’a Elaza,+ wa mwan’a Arone+ wa mbut’anganga.
6 O Ezera ndioyu yandi watuka kuna Babele. Oyandi nsoneki kakala ye watoma zaya Nsiku*+ a Mose una Yave wa Nzambi a Isaele kavana. O ntinu wamvana mawonso kalomba kadi koko kwa Yave wa Nzambi andi kwakala yandi.
7 Akaka muna Aneyisaele batomboka, anganga ye Anelevi,+ ayimbidi,+ ayingidi a mavitu+ ye selo ya tempelo,*+ batombokele kuna Yerusaleme, muna mvu wa nsambwadi wa luyalu lwa Antakesate wa Ntinu.
8 Ezera olweke muna Yerusaleme muna ngonde yatanu muna mvu wa nsambwadi wa luyalu lwa ntinu.
9 Muna lumbu kiantete kia ngonde antete, otukidi kuna Babele, olweke muna Yerusaleme kina kiantete kia ngonde yatanu, kadi koko kwambote kwa Nzambi andi kwakala yandi.+
10 Ezera wakubika ntim’andi* muna fimpa Nsiku a Yave, mu lemvokela wo,+ yo longa mîna ye nzengo muna Isaele.+
11 E mama i mambu ma nkanda una Antakesate wa Ntinu kavana kwa Ezera wa nganga ye nsoneki,* watoma zaya nkanikinu mia Yave ye mîna miandi kavana kwa Isaele:
12 * “Antakesate,+ ntinu wa atinu, kuna kwa Ezera wa nganga, wa nsoneki a Nsiku a Nzambi a zulu: Yambula wakala ye luvuvamu lwafwana. O wau,
13 nkanikini vo nkangu wawonso wa Isaele ye anganga ye Anelevi, mu kimfumu kiame, ana bazolele kwenda yaku kuna Yerusaleme, benda kwau.+
14 Kadi otuminu kwa ntinu ye kwa aludiki andi nsambwadi, wavav’o zaya kana vo Nsiku a Nzambi aku wina vana moko maku mu sadilwa wina muna Yuda ye Yerusaleme,
15 wanata palata ye wolo una o ntinu ye mbanda-mbanda zandi bavanini kuna mvevo kwa Nzambi a Isaele, ona okalanga kuna Yerusaleme,
16 ye palata yawonso yo wolo una otambula* mwamu mvivu awonso a Babele yo lukau lwa mvevo bevana o nkangu ye anganga mu kuma kia nzo a Nzambi au muna Yerusaleme.+
17 Muna nzimbu zazi, sumba vana vau, ngombe za makoko+ ye vaka ya mameme+ yo wan’a mameme+ yo tukau twa mbwaza+ ye twa ndua,+ wasunzula to vana ziku dia nzo a Nzambi aku muna Yerusaleme.
18 “Vanga konso dina omwene vo diambote kwa ngeye ye kwa mpangi zaku muna palata ye wolo una usuva, mun’owu wa luzolo lwa Nzambi aku.
19 E salanganu yawonso ina oveno mu kuma kia salu kia nzo a Nzambi aku, tambika yo vana ndose a Nzambi muna Yerusaleme.+
20 Konso lekwa kikondwa muna nzo a Nzambi aku kina ofwete vana, bonga kio muna lusalu lwa ntinu.+
21 “Mono Antakesate wa Ntinu, mpene nswa kwa alundi awonso a lusalu bena koko mvivu a Simu dia Nzadi,* vo konso kina kelomba Ezera+ wa nganga, wa nsoneki a Nsiku a Nzambi a zulu, kiavanua kwa yandi vana vau,
22 yakuna 100 talanta* za palata ye 100 kore* ya masa, ye 100 bata* ya vinyu+ ye 100 bata ya mazi+ yo mungwa+ wakondwa tezo.
23 Konso diambu disikidiswa kwa Nzambi a zulu mu kuma kia nzo a Nzambi a zulu,+ yambula diavangilwa kuna vema, kimana valembi kala makasi muna mvivu mia ntinu yo wan’andi.+
24 Tunuzayisi vo, anganga ye Anelevi, ayimbidi,+ ayingidi a mavitu, selo ya tempelo*+ ye asadi a nzo yayi ya Nzambi ke bafwete futiswa mpaku ko kana vaku,+ ngatu mpaku a nzila.
25 “Ongeye Ezera, muna ngangu za Nzambi zina yaku,* tumbika afundisi ye azengi ankanu, bafundisa nkangu awonso wina kuna mvivu a Simu dia Nzadi,* awonso ana bazeye nsiku mia Nzambi aku; vo i ndiona olembi mio zaya, nunlonga mio.+
26 Konso ona olembi lemvokela Nsiku a Nzambi aku yo nsiku a ntinu, kafwete fundiswa yo vewa tumbu vana vau, kiakala kia lufwa, kana kia yingwa, kana kia futiswa nzimbu yovo siwa mu pelezo.”
27 Yambula kakembelwa o Yave wa Nzambi a mase meto ona osidi muna ntim’a ntinu o luzolo lwa viengesa e nzo a Yave muna Yerusaleme!+
28 Muna walakazi wandi kansonga, mbweno e dienga vana vena ntinu+ ye mbanda-mbanda zandi+ ye mfumu zawonso za nkuma za ntinu. Wau vo koko kwa Yave wa Nzambi ame kuna yame, ozevo nkabukidi,* nkutakese ntu mia Isaele batomboka yame.
Mvovo vana yand'a lukaya
^ Ina ye nsasa vo: “Nsadisi.”
^ Yovo “nsoneki a ngangu kakala.”
^ Yovo “Anetine.” Mvovo wa sina: “ana batambikwa.”
^ Yovo “wasia e tima.”
^ Yovo “nsoneki a mambu.”
^ Ezera 7:12 yakuna 7:26, entete mu Ki-aramiti yasonekenua.
^ Mvovo wa sina: “osolola.”
^ E mvivu a simu dia Nzadi i zunga ya weste a Uferate.
^ Yovo “Anetine.” Mvovo wa sina: “ana batambikwa.”
^ Mvovo wa sina: “mun’owu wa ngangu za Nzambi aku zina ova moko maku.”
^ E mvivu a simu dia Nzadi i zunga ya weste a Uferate.
^ Yovo “nkumamene.”
